பிரதமர் ஷெய்க் ஹஸீனாவின் அவாமிலீக் கட்சி பங்களாதேஷ் பொதுத் தேர்தலில் வெற்றிபெற்றுள்ளதாக அந்நாட்டின் தேர்தல் ஆணைக்குழு அறிவித்துள்ளது. எனினும் எதிர்க்கட்சிக் கூட்டணி தேர்தல் முடிவுகளை நிராகரித்துள்ளது.
350 ஆசனங்களைக் கொண்ட ஜாதிய சங்ஷாட் என அழைக்கப்படும் பாராளுமன்றத்திற்காக கடந்த ஞாயிற்றுக்கிழமை நடைபெற்ற தேர்தல் 300 ஆசனங்களைக் கைப்பற்றுவதற்கானதாகும், 50 ஆசனங்கள் பெண்களுக்காக ஒதுக்கீடு செய்யப்பட்டுள்ளன.
கடந்த திங்கட்கிழமை 298 ஆசனங்களுக்கான பெறுபேறுகள் வெளியாகியிருந்த நிலையில் 287 ஆசனங்களை அவாமி லீக் தலைமையிலான கூட்டணி கைப்பற்றியிருந்தது. பங்களாதேஷ் தேசியவாதக் கட்சியினை முதன்மையாகக் கொண்ட எதிர்க்கட்சிக் கூட்டணியால் ஆறு ஆசனங்களை மாத்திரமே பெற்றுக்கொள்ள முடிந்தது. அரசாங்கமொன்றை அமைப்பதாயின் ஒரு கட்சிக்கு 151 ஆசனங்கள் அவசியமாகும்.
அவாமி லீக் கட்சிக்கு எனது வாழ்த்துக்களைத் தெரிவித்துக் கொள்கின்றேன் என பெறுபேறுகளை தொலைக்காட்சியில் அறிவித்த தேர்தல் ஆணைக்குழு செயலகத்தின் செயலாளர் ஹலாலுத்தீன் அஹமட் தெரிவித்தார்.
வாக்கெண்ணும் பணி ஆரம்பித்து சில மணி நேரங்களிலேயே பங்களாதேஷ் ஆளும் கட்சி முன்னிலை வகிக்க ஆரம்பித்துவிட்டது. இதனையடுத்து பங்களாதேஷ் தேசியவாதக் கட்சியினை முதன்மையாகக் கொண்ட எதிர்க்கட்சிகளின் கூட்டணியான ஜாதிய ஒயிக்யா முன்னணி அச்சமடைந்தது.
கடந்த ஞாயிற்றுக்கிழமை இரவு அவசரமாக ஏற்பாடு செய்யப்பட்ட செய்தியாளர் மாநாட்டில் இந்தத் தேர்தல் ஒரு கேலிக்கூத்து என ஜாதிய ஒயிக்யா முன்னணி தெரிவித்தது.
நாம் இந்தக் கேலிக்கூத்தான தேர்தலை நிராகரிக்கின்றோம். பக்கசார்பில்லாத நிருவாகத்தின் கீழ் புதிய தேர்தலொன்றை நடத்துமாறு நாம் தேர்தல் ஆணைக்குழுவைக் கோருகின்றோம் என நாட்டின் மதச்சார்பற்ற அரசியல் யாப்பினை வரைந்த 82 வயதான நீதிபதியான கமால் ஹுஸைன் தெரிவித்தார்.
1981 ஆம் ஆண்டிலிருந்து அவாமி லீக் கட்சிக்கு தலைமை தாங்கிவரும் ஷேக் ஹஸீனா, ஒரு தசாப்தகால சிறந்த உள்நாட்டு உற்பத்தி, தைத்த ஆடைகள் ஏற்றுமதி முன்னேற்றம் என்பவற்றின் பின்னணியில் தேர்தலை எதிர்கொள்ளத் தீர்மானித்தார். சீனாவுக்கு அடுத்தாக உலகின் இரண்டாவது மிகப்பெரும் தைத்த ஆடைகளை ஏற்றுமதி செய்யும் நாடாக பங்களாதேஷ் காணப்படுகின்றது.
160 மில்லியன் மக்களைக் கொண்ட தெற்காசிய முஸ்லிம் பெரும்பான்மை நாட்டில் நான்காவது தடவையாக பதவி வகிக்கும் பெண் என்ற சாதனையினை 71 வயதான ஷேக் ஹஸீனா படைத்துள்ளார்.
அண்டை நாடான மியன்மாரிலிருந்து கடுமையான இராணுவ கெடுபிடிகளிலிருந்த தப்பி வந்த சுமார் ஒரு மில்லியன் ரோஹிங்ய அகதிகளுக்கு அடைக்கலம் வழங்கியமைக்காக அவர் பெரிதும் பாராட்டப்பட்டார்.
எனினும் அவரை விமர்சிப்பவர்கள் அவர் சர்வாதிகாரத்துடன் செயற்படுவதாகவும், எதிர்க்கட்சிகளை நசுக்குவதாகவும் தெரிவிக்கின்றனர். அவரது அரசியல் எதிரியும், பங்களாதேஷ் தேசியவாதக் கட்சியின் தலைவியுமான 73 வயதான காலிதா ஸியா ஊழலில் ஈடுபட்டமைக்காக 17 வருட சிறைத் தண்டனை அனுபவித்து வருகின்றார்.
தலைநகர் டாக்காவில் இராணுவத்தினரும் துணைப் படையினரும் கடமையில் ஈடுபடுத்தப்பட்டு போக்குவரத்துக்கள் மட்டுப்படுத்தப்பட்டிருந்த நிலையில் வாக்களிப்பு பெரும்பாலும் சுமுகமாகவே இடம்பெற்றது.
தேர்தல் வன்முறைகளைத் தடுப்பதற்காக சுமார் ஆறு இலட்சம் பாதுகாப்புப் படையினர் கடமையில் ஈடுபடுத்தப்பட்டிருந்த போதிலும் எதிர்நிலைக் கட்சிகளின் அங்கத்தவர்ளுக்கிடையே ஏற்பட்ட மோதல்கள் காரணமாக நாடு முழுவதும் குறைந்தது 17 பேர் கொல்லப்பட்டிருந்தனர்.
-Vidivelli