மஹிந்த ராஜபக்ஷ தலைமையிலான ஸ்ரீலங்கா பொதுஜன பெரமுனவுடன், ஸ்ரீலங்கா சுதந்திரகட்சி இணைந்து கூட்டணி அமைப்பது தொடர்பில் இறுதித் தீர்மானம் மேற்கொள்ளப்படவில்லை. இவ்வாறு கூட்டணி அமைக்கப்படவுள்ளதாக சிலர் தெரிவித்து வருகின்றமை அவர்களுடைய தனிப்பட்ட நிலைப்பாடாக இருக்கலாம். எனினும் கட்சி ரீதியில் உத்தியோகபூர்வமான தீர்மானமெதுவும் மேற்கொள்ளப்படவில்லை என பாராளுமன்ற உறுப்பினர் துமிந்த திஸாநாயக்க தெரிவித்தார்.
தேசிய அரசாங்கத்திலிருந்து ஸ்ரீலங்கா சுதந்திரக் கட்சி விலகியுள்ள நிலையில் அடுத்த கட்டமாக ஸ்ரீலங்கா பொதுஜன பெரமுனவுடன் இணைந்து கூட்டணி அமைத்து செயற்படவுள்ளதாக தெரிவிக்கப்படும் கருத்துக்கள் தொடர்பில் வினவியபோதே அவர் மேற்கண்டவாறு தெரிவித்தார்.
தொடர்ந்தும் அவர் குறிப்பிடுகையில்,
கடந்த ஒக்டோபர் மாதம் 26 ஆம் திகதியின் பின்னர் நாட்டில் ஏற்பட்டிருந்த அரசியல் நெருக்கடிகளுக்குத் தீர்வு காணப்பட்டுள்ளது. அதன் பின்னர் அரசாங்கத்திலும் கட்சிகளுக்குள்ளும் பல்வேறு மாற்றங்கள் ஏற்பட்டுள்ளன. ஒவ்வொரு கட்சிகளை பிரதிநிதித்துவப்படுத்தும் ஒவ்வொரு உறுப்பினர்களுக்கும் தனிப்பட்ட கருத்துக்கள், ஆலோசனைகள் என்பன காணப்படும். அது குறித்து எம்மால் எதுவும் கூறமுடியாது.
இவ்வாறு தனித்தனியாக முன்வைக்கப்பட்ட கருத்துக்களின் அடிப்படையிலேயே பொதுஜன பெரமுனவுடன் இணைதல் தொடர்பான செய்திகளும் வெளியிடப்படுகின்றன. சிலர் ஊடகங்களில் குறிப்பிடுவதன் மூலமும், பத்திரிகை செய்திகளின் மூலமே நான் இவ்வாறான கருத்துக்களை அவதானித்தேன். எனினும் உத்தியோகபூர்வமாக எந்தவொரு தீர்மானமும் மேற்கொள்ளப்படவில்லை.
அத்தோடு பாராளுமன்றத்தில் சுயாதீனமாக செயற்படுவது குறித்தும் தீர்மானங்கள் எவையும் மேற்கொள்ளப்படவில்லை. ஸ்ரீலங்கா சுதந்திரக் கட்சியின் தலைவர் என்ற அடிப்படையில் ஏனைய கட்சிகளுடன் இணைந்து கூட்டணி அமைத்தல் அல்லது வேறு வழிமுறைகள் குறித்து ஜனாதிபதி மைத்திரிபால சிறிசேனவே தீர்மானிக்க வேண்டும். அவரது ஆலோசனைகளின் பின்னர் கட்சி உறுப்பினர்கள் என்ற ரீதியில் நாம் எமது நிலைப்பாட்டினை அறிவிப்போம் என்றார்.
-Vidivelli