சிங்களவர்கள் முஸ்லிம்களின் வர்த்தக நிலையங்களைப் பகிஷ்கரியுங்கள். முஸ்லிம் கடைகளுக்குச் செல்லாதீர்கள். அந்தக் கடைகளில் உண்ணவோ, அருந்தவோ வேண்டாம்’ என கண்டி அஸ்கிரிய பீட மகாநாயக்க தேரர் வரக்காகொட ஞானரத்ன தேரர் அறை கூவல் விடுத்துள்ளார்.
கண்டி, யட்டிநுவர, தியகெலினாவ கித்சிரிமெவன் ரஜமகா விகாரையில் இடம்பெற்ற நிகழ்வொன்றில் கலந்துகொண்டு உரை நிகழ்த்துகையிலேயே இவ்வாறு தெரிவித்தார்.
அங்கு அவர் தொடர்ந்தும் உரை நிகழ்த்துகையில் தெரிவித்ததாவது;
“முஸ்லிம்கள் சிங்கள மக்களை அழிப்பதற்கு எடுத்த செயற்பாடுகள் இப்போது வெளிச்சத்துக்கு வந்துள்ளன. சிங்கள மக்கள் எச்சரிக்கையாக இருக்க வேண்டும். சிங்கள பெண்களுக்கு கருத்தடை சத்திர சிகிச்சை செய்த முஸ்லிம் டாக்டர் ஒருவர் தொடர்பில் ஊடகங்கள் பகிரங்கப்படுத்தியுள்ளன. அந்த முஸ்லிம் டாக்டரை கல்லெறிந்து கொல்ல வேண்டுமென பலர் என்னிடம் கூறினார்கள்.
இவ்வாறான இனத்துரோகிகளை சுதந்திரமாக விடக்கூடாது என சீலம் இருக்கும் (சில்) பெண்கள் என்னிடம் கூறினார்கள். அவரை கல்லால் அடித்துக்கொல்ல வேண்டும் என்றார்கள். நான் அப்படிக்கூற மாட்டேன். ஆனால் செய்யப்பட வேண்டியது அதுதான்.
ஐக்கிய தேசியக் கட்சியின் ஆட்சியாளர்கள் நாட்டை நேசிப்பவர்களல்ல. சமல் ராஜபக் ஷவை ஜனாதிபதியாக்குவதற்கு ஒன்றிணையுங்கள் என்று பாராளுமன்ற உறுப்பினர் மயந்த திசாநாயக்கவுக்கு வேண்டுகோள் விடுத்தார்.
இந்த நிகழ்வில் பாராளுமன்ற உறுப்பினர் மயந்த திசாநாயக்கவும் கலந்து கொண்டிருந்தமை குறிப்பிடத்தக்கது.
-Vidivelli