பொதுஜன பெரமுன கட்சியுடன் ஒன்றுபட்டிருக்கும் சிங்கள பெளத்த மக்களை பிளவுபடுத்தவே ஞானசார தேரர் சிங்கள ராஜ்ஜியம் அமைக்க ஒன்றுபடுமாறு அழைப்பு விடுத்திருக்கின்றார். அத்துடன் ஜனாதிபதி தனது தேர்தல் பிரசாரத்துக்கே அவரை சிறையிலிருந்து விடுதலை செய்திருக்கின்றார் என்று தேச விடுதலை கட்சியின் பிரதித்தலைவர் கலகம தம்மரங்சி தேரர் தெரிவித்தார்.
சோசலிச மக்கள் முன்னணி நேற்று கொழும்பில் நடத்திய செய்தியாளர் சந்திப்பில் கலந்துகொண்டு கருத்து தெரிவிக்கையிலேயே இவ்வாறு குறிப்பிட்டார்.
அவர் அங்கு தொடர்ந்து தெரிவிக்கையில், ஞானசார தேரர் சிறைத்தண்டனையை அனுபவித்துவந்த நிலையில் அவரை விடுவிப்பதற்காக பாராளுமன்ற உறுப்பினர் திலங்க சுமதிபாலவே ஜனாதிபதியின் பிரதிநிதியாக இருந்து செயற்பட்டார். அதேபோன்று கண்டியில் பொதுபலசேனா மாநாடு நடத்தவும் திலங்க சுமதிபாலவே முன்னின்று செயற்பட்டிருக்கின்றார். அவரின் இந்த விடயங்களை நாங்கள் விமர்சிக்கவில்லை. ஆனால் ஞானசார தேரரை ஜனாதிபதியின் தேர்தல் பிரசாரத்துக்கு முன்னிலைப்படுத்தவே இந்த நடவடிக்கைகளை மேற்கொண்டிருக்கின்றார். அதற்காகத்தான் அவரை சிறையிலிருந்து விடுவிக்கவும் நடவடிக்கை எடுக்கப்பட்டிருக்கின்றது.
மேலும் அரசாங்கத்தின் நடவடிக்கைகளில் விரக்தியுற்றிருக்கும் நாட்டு மக்கள் தற்போது பொதுஜன பெரமுன கட்சியுடன் ஒன்றுபட்டு வருகின்றனர். குறிப்பாக, சிங்கள பெளத்த மக்கள் மஹிந்த ராஜபக் ஷ மீது நம்பிக்கைவைத்து இணைந்து செயற்பட ஆரம்பித்திருக்கின்றனர். தேரர்களும் எம்முடனே இருக்கின்றனர். இதனை பிளவுபடுத்தி பெளத்தர்களை எம்மிலிருந்து தூரமாக்கவே தற்போது பொதுபலசேனா முயற்சிக்கின்றது. அதற்காகவே கண்டியில் ஞாயிற்றுக்கிழமை நடத்திய கூட்டத்தில், சிங்கள ராஜ்ஜியம் ஒன்றை அமைக்க ஒன்றுபடுமாறு ஞானசார தேரர் அழைப்பு விடுத்திருக்கின்றார்.
அத்துடன் பெளத்த ராஜ்ஜியம் அமைப்பதற்கும் அதிகமான சிங்களவர்கள் பாராளுமன்றத்துக்கு செல்வதற்கும் நாங்கள் எதிர்ப்பில்லை. என்றாலும் சிங்கள பெளத்தர்கள் பொதுஜன பெரமுனவுடன் இணைந்திருக்கும் நிலையில் திடீரென இவ்வாறு அழைப்பு விடுவது பெளத்தர்களை பிளவுபடுத்தும் முயற்சியாகும். பாராளுமன்ற உறுப்பினர் திலங்க சுமதிபால இரண்டு பக்கமும் காலை வைத்துக்கொண்டு செயற்படுகின்றார். மேலும், கடந்த காலங்களில் ஜாதிக ஹெல உறுமயவும் பெளத்த கொடியை தூக்கிப்பிடித்துக்கொண்டு பெளத்த ராஜ்ஜியம் அமைக்கப்போவதாக தெரிவித்துக்கொண்டே அரசியலுக்கு வந்தது. தற்போது பொதுபலசேனா என்ற பெயரில் அதனை முன்கொண்டுசெல்ல நடவடிக்கை எடுக்கப்பட்டிருக்கின்றது. அதனால் சிங்கள மக்கள் இரவில் விழுந்த குழியில் பகலில் விழாமல் சிந்தித்து செயற்படவேண்டும் என்றார்.
எம்.ஆர்.எம்.வஸீம்
vidivelli