எவன்கார்ட் நிறுவனம் ஊடாக அரசுக்கு 1140 கோடி ரூபா நட்டம்
கோத்தா உள்ளிட்ட எண்மருக்கு எதிரான வழக்கு ஏப்ரல் 29 வரை ஒத்திவைப்பு
எவன்கார்ட் நிறுவனத்துக்கு மிதக்கும் ஆயுதக் களஞ்சியத்தை முன்னெடுத்துச்செல்ல அனுமதியளித்ததன் ஊடாக அரசாங்கத்துக்கு 1140 கோடி ரூபா நட்டதை ஏற்படுத்தியதாக முன்னாள் பாதுகாப்பு செயலர் கோத்தாபய ராஜபக் ஷ உள்ளிட்ட 8 பேருக்கு எதிராக இலஞ்ச ஊழல் ஆணைக்குழு தொடர்ந்துள்ள வழக்கு விசாரணைகளை எதிர்வரும் ஏப்ரல் 29 ஆம் திகதிவரை கொழும்பு பிரதான நீதிவான் நீதிமன்றம் ஒத்திவைத்தது. கொழும்பு பிரதான நீதிவான் லங்கா ஜயரத்ன இதனை இவ்வாறு ஒத்திவைத்தார்.
இந்த வழக்கு தொடர்பில் மேன்முறையீட்டு நீதிமன்றினால் இடைக்கால தடை உத்தரவொன்று அமுலிலுள்ள நிலையில், உயர் நீதிமன்றின் உத்தரவொன்று கிடைக்கும்வரை இவ்வாறு குறித்த மனு ஒத்திவைக்கப்பட்டது.
எவன்கார்ட் விவகாரத்தில் அரசுக்கு 1140 கோடி ரூபா நட்டமேற்படுத்தியமை தொடர்பில் இலஞ்ச ஊழல் ஆணைக்குழு 19 குற்றச்சாட்டுக்களின் கீழ், கொழும்பு பிரதான நீதிவான் முன்னிலையில் கோத்தாபய ராஜபக் ஷ உள்ளிட்ட 8 பேருக்கு எதிராக வழக்கு தொடர்ந்துள்ளது.
கோத்தாபய ராஜபக் ஷ, முன்னாள் மேலதிக பாதுகபு செயலர் சுஜாதா தமயந்தி ஜயரத்ன, இராணுவத்தின் முன்னாள் மேஜர் ஜெனரல் வடுகே பாலித பியசிறி பெர்னாண்டோ, கருணாரத்ன பண்டா எகொடவல, முன்னாள் கடற்படை தளபதி அட்மிரல் சோமதிலக திஸாநாயக்க, எவன்கார்ட் நிறுவன தலைவர் மேஜர் நிசங்க சேனாதிபதி, முன்னாள் கடற்படை தளபதி அட்மிரல் ஜயநாத் குமாரசிறி கொலம்பகே, முன்னாள் கடற்படை தளபதி வைஸ் அட்மிரல் பிரான்சிஸ் டயஸ் ஜயரத்ன பெரேரா ஆகியோருக்கு எதிராகவே இந்த வழக்கு தாக்கல் செய்யப்பட்டிருந்தது.
2012 ஆம் ஆண்டு ஆகஸ்ட் மாதம் 7 ஆம் திகதி முதல் 2015 ஜனவரி மாதம் 8 ஆம் திகதி வரையிலான காலப்பகுதியில் கொழும்பில் எவன்கார்ட் மெரிடைம்ஸ் சேர்விசஸ் தனியார் நிறுவனத்துக்கு, மிதமிஞ்சிய சலுகை, சட்ட விரோதமான பிரதிபலன் அல்லது அனுசரணை அல்லது அனுகூலம் ஒன்றினை பெற்றுக்கொடுப்பதை நோக்கக் கொண்டு அல்லது அவ்வாறு இடம்பெறுமென அறிந்திருந்தும் குறித்த நிறுவனத்துக்கு மிதக்கும் ஆயுதக் களஞ்சியத்தை அமைக்க அனுமதி கொடுத்ததன் ஊடாக ஊழல் எனும் குற்றத்தை புரிந்தமை, அதற்கு உதவி ஒத்தாசை புரிந்தமை உள்ளிட்ட குற்றச்சாட்டுக்களே இந்த 8 பேருக்கும் எதிராக சுமத்தப்பட்டுள்ளமை குறிப்பிடத்தக்கது.
-Vidivelli