தீவிரவாத கும்பலுக்கு எதிராக செயற்பட்டதால் எனது இணைப்பு செயலாளருக்கும் எனக்கும் அச்சுறுத்தல் ஏற்பட்டது
நாம் அஞ்சி பின்வாங்க மாட்டோம் என்கிறார் கபீர்
தீவிரவாத கும்பலுக்கு எதிராக முதலில் களத்திலிறங்கி நாங்கள் செயற்பட்டதால் எனது இணைப்புச் செயலாளருக்கும், எனக்கும் மரண அச்சுறுத்தல் ஏற்பட்டது.
என்றாலும் நாங்கள் அச்சுறுத்தல்களுக்கு அஞ்சி பின்வாங்காமல் புலனாய்வுப் பிரிவுக்குத் தேவையான தகவல்களை தொடர்ந்தும் வழங்கி வருகின்றோமென நெடுஞ்சாலைகள், வீதி அபிவிருத்தி மற்றும் பெற்றோலிய வளத்துறை அமைச்சர் கபீர் ஹாஷிம் தெரிவித்தார்.
‘ரன் மாவத்’ வேலைத்திட்டத்தின் கீழ் அரநாயக்க கடுகங்க – நாரங்கம்மான இடையிலான வீதி அபிவிருத்தி திட்ட அங்குரார்ப்பாண நிகழ்வில் பிரதம அதிதியாகக் கலந்துகொண்டு உரையாற்றும்போதே அவர் மேற்கண்டவாறு தெரிவித்தார்.
அவர் அங்கு மேலும் கூறியதாவது:-
“ஏப்ரல் 21ஆம் திகதி நாட்டில் ஏற்பட்ட அசாதாரண நிலை நாட்டுக்குப் பெரும் பிரச்சினையாக அமைந்தது. இந்த தீவிரவாத குண்டுத்தாக்குதல் சர்வதேச தீவிரவாதத்தின் ஓர் அங்கமாகவே இடம்பெற்றது. இந்த தீவிரவாதிகள் அமெரிக்காவின் வாஷிங்டன் நகர், நிவ்யோர்க் நகர், ஜேர்மனி, பிரான்ஸ், இந்தோனேஷியா, மலேசியா போன்ற சகல நாடுகளிலும் இவ்வாறான பயங்கரவாத தாக்குதல்களை நடத்தியுள்ளது.
இலங்கையில் நடத்த தீவிரவாத தாக்குதலுடன் தொடர்புடையவர்கள் முஸ்லிம்கள் என்பது கண்டறியப்பட்டது. நானும் ஒரு முஸ்லிம். இந்த சம்பவம் தொடர்பில் நான் பாராளுமன்றத்தில் உரையாற்றும்போது இந்த தீவிராத செயலை செய்தவர்கள் இஸ்லாம் மார்க்கத்தை முறையாகப் பின்பற்றுபவர்களாக இருக்க முடியாது என்பதை முதலில் குறிப்பிட்டிருந்தேன். இஸ்லாத்தை முறையாக பின்பற்றுபவராக இருந்தால் ஒருபோதும் இவ்வாறான செயலை செய்ய முடியாது. இந்த தீவிரவாதிகள் இஸ்லாத்தை பின்பற்றுவர்கள் கிடையாது; நான் பின்பற்றும் மார்க்கத்தைச் சேர்ந்தவர்கள் அல்ல.
எனவே, இந்த கும்பல் புறக்கணிக்கப்பட வேண்டியவர்கள். இவ்வாறான சிறு தீவிரவாத அடிப்படைவாதிகள் சகல இனத்திலும் உள்ளனர். இவ்வாறான செயற்பாடுகளை பெரும்பான்மை முஸ்லிம்கள் முற்றிலும் புறக்கணிக்கின்றனர்.
இந்த செயற்பாடு முதலில் மாவனெல்லையில் இருந்தே ஆரம்பமாகியது. சில மாதங்களுக்கு முன்பு மாவனெல்லையில் ஒரு கும்பல் புத்தர்சிலைகள் தாக்கி சேதமாக்கியிருந்தது. இதன்போது நான் அதற்கு எதிராக செயற்பட்டதுடன் சம்பந்தப்பட்டவர்களை கைது செய்வதற்கு நடவடிக்கை எடுத்திருந்தேன். அதனை நாங்கள் சிறப்பாகவே முன்னெடுத்திருந்தோம்.
அத்துடன் இந்த சம்பவத்துடன் சம்பந்தப்பட்ட மற்றவர்களை கைது செய்ய குற்றப்புலனாய்வு பிரிவினருடன் இணைந்து நாங்கள் வேலைத்திட்டமொன்றை முன்னெடுத்திருந்தோம்.
புலனாய்வுப் பிரிவுடன் எனது இணைப்புச் செயலாளர் தஸ்லீம் இணைந்து செயற்பட்டார். புலனாய்வு பிரிவுடன் இணைந்து தகவல்களை வழங்கியமையாலும், வணாத்தவில்லு பகுதியில் மேற்கொள்ளப்பட்ட சுற்றிவளைப்புக்கு உதவி செய்தமையாலும் எனது இணைப்புச்; செயலாளர் தஸ்லீம் மீது இந்த தீவிரவாதிகள் துப்பாக்கிச்சூடு நடத்தினர். அவர் இன்னும் வைத்தியசாலையில் சிகிச்சை பெற்று வருகின்றார்.
இந்த தீவிரவாத கும்பலுக்கு எதிராக முதலில் நாங்கள் முன்வந்து செயற்பட்டதால் எனது இணைப்புச் செயலாளருக்கும், எனக்கும் மரண அச்சுறுத்தல் ஏற்பட்டது. என்றாலும் நாங்கள் பின்வாங்காமல் புலனாய்வு பிரிவுக்கு தேவையான தகவல்களை தொடர்ந்தும் வழங்கி வருகின்றோம்.
இந்தப் பிரச்சினை ஏற்பட்ட பின்னர் இந்த விடயத்தில் அரசு சரியாக செயற்படவில்லை என அரசின் மீது விரல் நீட்டி குற்றம்சாட்டுகின்றனர்.
அமெரிக்காவிலோ, ஐரோப்பாவிலோ இவ்வாறான தீவிரவாத செயற்பாடுகளை கட்டுப்படுத்த பல மாதங்கள், வருடங்கள் சென்றிருக்கின்றன. ஆனால், இரண்டு வாரங்களில் இந்த தீவிரவாதிகளின் முழுமையான வலைப்பின்னலை இல்லாமல் செய்ய எமது பாதுகாப்பு தரப்புக்கு முடியுமாகியுள்ளது. தற்போது இதனுடன் சம்பந்தப்பட்ட முக்கிய நபர்களை கைது செய்துவிட்டனர். இக்குழுக்களுடன் சிறு தொடர்பையேனும் வைத்துள்ளவர்களை கைது செய்யவும் பாதுகாப்பு தரப்பு முஸ்லிம் மக்களிடன் ஒத்துழைப்போடு தேடுதல் நடவடிக்கைகளை முன்னெடுத்துள்ளனர்.
இத்தீவிரவாதத்தை எம்மால் இரண்டு வாரங்களில் முழுமையாக கட்டுப்படுத்த முடிந்துள்ளது. இதனைப் பற்றி எவரும் கதைப்பதில்லை. நாங்கள் பலத்த சவால்களுக்கு மத்தியில் வாழ்ந்து கொண்டிருக்கின்றோம். இந்த நாட்டுக்கு ஏராளமான பிரச்சினைகள் ஏற்பட்டுள்ளன. அவ்வாறான சந்தர்ப்பங்களில் நாங்கள் இலங்கையர்கள் என்ற ரீதியில் ஒன்றாக இருந்தமையினால் அந்த சவால்களை தோற்கடிக்க எம்மால் முடியமானது. அரசாங்கம் என்ற ரீதியில் எவ்வாறான பிரச்சினைகள் – சவால்கள் வந்தாலும் மக்களின் தேவைகளை நாங்கள் மறக்கவில்லை.
எதிர்வரும் ஜனாதிபதி தேர்தலில் எவரும் எதிர்பார்க்காத ஒருவர் ஜனாதிபதி வேட்பாளராக நிறுத்தப்படவுள்ளார். எவர் என்ன செய்தாலும் அடுத்த ஜனவரி மாதம் தெரிவாகும் புதிய ஜனாதிபதி ஜக்கிய தேசிய கட்சியைச் சேர்ந்தவராக இருப்பார். அதற்கான வேலைத்திட்டங்களை ஐ.தே.க. முன்னெடுத்துள்ளது”- என்றார்.
-Vidivelli