அரசாங்கத்திற்கு எதிரான அவநம்பிக்கை பிரேரணை சபாநாயகரிடம் சமர்ப்பிப்பு
மஹிந்த, சம்பந்தனின் ஆதரவையும் பெறுவோம் என்கிறது ம.வி.மு.
அரசாங்கத்திற்கு எதிராக மக்கள் விடுதலை முன்னணியின் நம்பிக்கையில்லா பிரேரணை நேற்றுக் காலை சபாநாயகர் கரு ஜயசூரியவிடம் ஒப்ப டைக்கப்பட்டது. அடுத்த பாராளுமன்ற வாரத்தில் சபையில் இதனை எடுத்துக்கொள்ளமுடியும் என நம்புவதாகவும் அதற்கு முன்னர் எதிர்க்கட்சித் தலைவர் மற்றும் தமிழ் தேசிய கூட்டமைப்புடன் பேச்சுவார்த்தை நடத்தி ஆதரவை பெற்றுக்கொள்வதாக ஜே.வி.பி. குறிப்பிடுகின்றது.
கடந்த ஈஸ்டர் தினத்தன்று நடத்தப்பட்ட பயங்கரவாத தாக்குதலை அடுத்து அரசாங்கத்தின் பாதுகாப்பு பலவீனங்கள் மற்றும் பொறுப்பற்ற தன்மைகள் காரணமென குற்றம் சுமத்தி மக்கள் விடுதலை முன்னணி அரசாங்கத்திற்கு எதிராக நம்பிக்கையில்லா பிரேரணை ஒன்றினை கொண்டுவருவதாக கூறிய நிலையில் நேற்றுக் காலை நம்பிக்கையில்லா பிரேரணையை ஜே.வி.பியினர் சபாநாயகர் கரு ஜயசூரியவிடம் பாராளுமன்றத்தில் சமர்ப்பித்தனர். அந்தப் பிரேரணையில் குறிப்பிடப்பட்டுள்ள விடயங்களானது,
- 2019 ஏப்ரல் 21ஆம் திகதி உயிர்த்த ஞாயிறு தினத்தில் கொழும்பு, நீர்கொழும்பு, மட்டக்களப்பு ஆகிய பிரதேசங்களில் இடம்பெற்ற பயங்கரவாதிகளின் தற்கொலை குண்டுத்தாக்குதல் சம்பவங்களில் இலங்கையர்கள் உள்ளிட்ட 250ற்கும் மேற்பட்டவர்கள் கொல்லப்பட்டதுடன் மேலும் 500 பேர் வரையிலானோர் காயமடைந்திருந்தனர். இது தொடர்பாக பிரதமர், அமைச்சரவை மற்றும் அரசாங்கத்திற்கு உத்தியோகபூர்வமாக தகவல்கள் கிடைத்திருந்தபோதும் அது தொடர்பான அக்கறையின்றி கீழ்வரும் செயற்பாடுகளை மேற்கொண்டும், மேற்கொள்ளாமலும் இருந்துள்ளனர். அதில்,
அ) 2019.05.08 அன்று பிரதமர் பாராளுமன்றத்தில் கூறியதன்படி 2014ஆம் ஆண்டு முதல் ஐ.எஸ். சர்வதேச பயங்கரவாத இஸ்லாமிய அடிப்படைவாத அமைப்புடன் இலங்கையிலுள்ள சிலர் தொடர்புகளை பேணியதாகவும், பல்வேறு செயற்பாடுகளில் ஈடுபட்டதாகவும் அறிந்திருந்திருந்துள்ளனர். எனினும் அது தொடர்பாக சரியான நடவடிக்கைகளை முன்னெடுக்கப்படவில்லை,
ஆ) பல்வேறு இஸ்லாமிய மத அடிப்படைவாத அமைப்புகள் முஸ்லிம் சமூகத்தினரிடையே செயற்படுவதாக முஸ்லிம் சமூகத்தினராலேயே அரசாங்கம் மற்றும் பொறுப்பு வாய்ந்த நிறுவனங்களுக்கு அறிவித்திருந்த போதும் அது தொடர்பாக செயற்படாமை,
இ) காத்தான்குடி பிரதேசத்தில் வாழும் மக்களுக்கு பல்வேறு சந்தர்ப்பங்களில் மேற்கொள்ளப்பட்ட அச்சுறுத்தல் மற்றும் தாக்குதல்கள் தொடர்பாக 2019 ஏப்ரல் 21ஆம் திகதி குண்டை வெடிக்க வைத்து உயிரிழந்த சஹ்ரான் ஹாசிம் மற்றும் 2019 ஏப்ரல் 26ஆம் திகதி சாய்ந்தமருதில் குண்டை வெடிக்க வைத்து உயிரிழந்த ஏ.எல்.எம்.நியாஸ் உள்ளிட்டோருக்கு எதிராக நீதிமன்றத்தினால் பிடியாணை பிறப்பிக்கப்பட்டிருந்த போதும் அவர்களை கைது செய்வதற்கு முறையாக சட்டத்தை செயற்படுத்தாமை
ஈ) 2018ஆம் ஆண்டு டிசம்பர் 24ஆம் திகதி மாவனெல்லையில் புத்தர் சிலைக்கு சேதம் விளைவித்தமையுடன் சஹ்ரான் ஹாசிம் உள்ளிட்ட குழுவினர் தொடர்புபட்டிருப்பதாக இலங்கை முஸ்லிம் சபையினால் தேசிய புலனாய்வு பிரிவுக்கு 2018 டிசம்பர் 28ஆம் திகதி அறிவிக்கப்பட்டிருந்த போதும் மற்றும் இந்த தாக்குதல் சம்பவம் தொடர்பாக சந்தேகத்தில் சிலர் கைது செய்யப்பட்டிருந்த போதும் அது தொடர்பான விசாரணகளை முன்னெடுத்து செல்வது தடுக்கப்பட்டு அதில் தலையீடுகள் காணப்பட்டதாக அரசாங்கத்தின் அமைச்சர் ஒருவர் கருத்து தெரிவித்துள்ளமை
உ) இந்த தாக்குதல் இடம்பெறுவதற்கு முன்பிருந்து குறிப்பிடத்தக்களவு இலங்கையர்கள் ஐ.எஸ். இஸ்லாமிய பயங்கரவாத அமைப்புடன் இணைந்து செயற்படுவது தொடர்பான தகவல்கள் தொடர்பாக சட்ட நடவடிக்கைகள் மற்றும் பாதுகாப்பு நடவடிக்கைகளை முன்னெடுக்காமை
ஊ) பாதுகாப்பு சபையின் உறுப்பினரான பிரதமர் பாதுகாப்பு சபை அமர்வுகளில் கலந்துகொள்ளாது நாட்டு மக்களுக்காக அவர் செய்ய வேண்டிய அடிப்படை பொறுப்பை செய்ய தவறியமை,
எ) வெளிநாட்டு உளவு பிரிவினால் இலங்கைக்குள் கத்தோலிக்க தேவாலயங்கள் மற்றும் ஹோட்டல்களை இலக்கு வைத்து தற்கொலை தாக்குதல்களை நடத்தவுள்ளதாகவும் அதனுடன் தொடர்புடைய நபர்கள் மற்றும் அவர்களின் தொலைபேசி இலக்கங்கள், தேசிய அடையாள அட்டை இலக்கம் உள்ளிட்ட சரியான தகவல்களை வழங்கியிருந்த போதும் அந்த தகவல்களின்படி நடவடிக்கையெடுக்க தவறியமை மற்றும் 2019.4.21 ஆம் திகதி அந்த தாக்குதலுக்கு முன்னரும் உளவுப்பிரிவினால் மீண்டும் எச்சரிக்கை விடுத்திருந்த போதும் அது தொடர்பான நடவடிக்கையெடுக்காமை
ஏ) 2019.04.11 அன்று பிரதி பொலிஸ்மா அதிபர் விசேட பாதுகாப்புக்கு பொறுப்பான பிரியலால் தசநாயக்கவினால் ஏப்ரல் 21 தாக்குதல் தொடர்பாக அனுப்பியிருந்த கடிதத்தில் குறிப்பிடப்பட்டுள்ள விடயங்கள் தொடர்பாக நடவடிக்கையெடுக்காமை உள்ளிட்ட விடயங்களுக்கமைய 2019.4.21ஆம் திகதி சிவில் மக்களை இலக்கு வைத்து மேற்கொள்ளப்பட்ட பயங்கரவாத தாக்குதலை தடுப்பதற்கும் மற்றும் சேதங்களை கட்டுப்படுத்துவதற்கும் முடியுமாக இருந்தபோதிலும்
- 2019.04.21ஆம் திகதி இடம்பெற்ற தாக்குதல்களின் பின்னர் பிரதமர் மற்றும் அமைச்சர்களினால் அந்த தாக்குதல்கள் தொடர்பாக பொறுப்புக் கூறாது அந்தப் பொறுப்புகளை வேறு தரப்பினர் மீது சுமத்துவதற்கு முயற்சித்துள்ளதுடன் அமைச்சர்கள் பொறுப்பற்ற வகையில் பொய்யான கருத்துக்களை வெளியிட்டு நாட்டை பாதுகாப்பற்ற நிலைமைக்கு கொண்டு செல்லும் வகையில் நடந்துகொண்டுள்ளனர்.
- 2019.04.21ஆம் திகதி உயிர்த்த ஞாயிறு தாக்குதல் தொடர்பாக கைது செய்யப்பட்டுள்ள சந்தேக நபர்கள் தொடர்பான விசாரணை செயற்பாடுகளுக்கு இடையூறுகளை ஏற்படுத்தி அந்தக் குற்றச் செயல்கள் தொடர்பாக சட்டத்தை செயற்படுத்துவதற்கு இடையூறுகளை மேற்கொண்டோ அல்லது தடுத்து நிறுத்தியோ அரசாங்கத்தின் சில அமைச்சர்கள் செயற்பட்டுள்ளனர்.
- 2019.04.21ஆம் திகதி பயங்கரவாத தாக்குதல்களின் பின்னர் மேலும் அவ்வாறான தாக்குதல்கள் மற்றும் வன்முறை செயற்பாடுகளை கட்டுப்படுத்துவதற்கான சட்ட திட்டங்கள் அரசாங்கத்திடம் இருக்கின்ற போதும் 2019.05.13ஆம் திகதி கம்பஹா பிரதேசத்திலும் வடமேல் மாகாணத்திலும் இடம்பெற்ற அடிப்படையாவத வன்முறை செயற்பாடுகளால் கொலை, சொத்து சேதங்கள் ஏற்பட்டுள்ளன. இவ்வாறான சம்பவங்கள் இடம்பெறுவதை தடுக்க தவறியமை,
- உயிர்த்த ஞாயிறு தாக்குதல் இடம்பெற்று ஒரு மாதமாகியுள்ள போதும் நாட்டில் பொருளாதாரத்தை மீள கட்டியெழுப்ப முடியாது போயுள்ளதாகவும் நாட்டில் பாடசாலைகள் மற்றும் பல்கலைக்கழக கல்வி செயற்பாடுகளை மீளக் கட்டியெழுப்ப முடியாது போயுள்ளதாகவும் அரச மற்றும் தனியார் துறைகளை மீண்டும் இயல்பு நிலைக்கு கொண்டுவரத் தவறியுள்ளதாகவும் அரசாங்கம் என்ற வகையில் நாட்டு மக்களுக்கு நிறைவேற்ற வேண்டிய பொறுப்புகளிலிருந்து விலகி செயற்பட்டுள்ளதாகவும்,
- 2019.04.21ஆம் திகதி தாக்குதல்களை தடுக்க முடியாமையினாலும் அதன் பின்னர் நாட்டில் பாதுகாப்பு நிலைமை மற்றும் சிவில் வாழ்க்கையை இயல்பு நிலைக்கு கொண்டு வராமையினாலும் ஏற்பட்டுள்ள பாதுகாப்பற்ற தன்மையால் நாட்டின் உள்ளக நடவடிக்கைகளில் தலையிடுவதற்கு வெளிநாடுகளுக்கு இடமளித்து செயற்படுவதாகவும் இலங்கை ஜனநாயக சோஷலிச அரசாங்கம் தொடர்பாக மேலும் நம்பிக்கை கொள்ள முடியாது போயுள்ளதாக பாராளுமன்றத்தில் யோசனையை முன்வைக்கின்றோம் என குறிப்பிடப்பட்டுள்ளது.
இந்நிலையில் நேற்றைய தினம் இது குறித்து ஜே.வி.பியினர் பாராளுமன்றத்தில் செய்தியாளர் சந்திப்பொன்றையும் நடத்தினர். இதில் கலந்துகொண்ட கட்சியின் தலைவர் அனுரகுமார திசாநாயக,
நாம் கொண்டுவரும் நம்பிக்கையில்லா பிரேரணையின் காரணிகளை முழுமையாக படித்துப்பார்த்தால் நாம் ஏன் இந்தப் பிரேரணையை கொண்டுவருகின்றோம் என்பது தெரியவரும். ஏற்கனவே பொது எதிரணி அமைச்சர் ரிஷாத் பதியுதீனுக்கு எதிராக நம்பிக்கையில்லா பிரேரணை ஒன்றினை கொண்டுவருகின்றது. அதன் பின்னரே நாம் நம்பிக்கையில்லா பிரேரணையை முன்வைத்துள்ளோம். ஆகவே முதலில் அவர்களின் பிரேரணையை எடுத்துகொண்டு அதன் பின்னரே எமது பிரேரணை முன்னெடுக்கப்படும். எனினும் இந்த நம்பிகையில்லா பிரேரணைக்கும் நாம் கொண்டுவரும் பிரேரணைக்கும் இடையில் வேறுபாடுகள் உள்ளன. இன்று சபாநாகர் கரு ஜயசூரியவிடம் எமது பிரேரணையை கையளித்துள்ளோம். இதில் பாராளுமன்றத்தை பிரதிநிதித்துவப்படுத்தும் ஜே.வி.பியின் ஆறு உறுப்பினர்களும் கைச்சாத்திட்டுள்ளோம். அடுத்த பாராளுமன்ற வாரத்தில் இதனை சபைக்கு எடுக்கப்படுமென நாம் நம்புகின்றோம். நாம் அரசாங்கத்தை காப்பாற்ற இவற்றை செய்வதாக ராஜபக் ஷ அணியில் ஒருசிலர் குற்றம் சுமத்தி வருகின்றனர். ஆனால் இந்த அரசாங்கத்தில் நாம் எந்த சலுகையும் பெற்றுக்கொண்டு அவர்களை காப்பாற்ற ஒருபோதும் நடவடிக்கை எடுக்கவில்லை. ஆனால் எம்மை விமர்சிக்கும் சிலர் பிரதமர், ஜனாதிபதியிடம் சலுகைகளை பெற்றுக்கொண்டு தம்மை பாதுகாத்துக்கொண்டதை நாம் அறிவோம். இவர்கள் என்ன நோக்கத்துக்காக நம்பிக்கையில்லா பிரேரணைக்கும் எமது பிரேரனைக்கும் இடையில் உள்ள வித்தியாசத்தை அவதானிக்கும் போதே அதனை அறிந்துகொள்ள முடியும். எமக்குள்ள ஒரே நோக்கம் இந்த அரசாங்கத்தை வீழ்த்துவது மட்டுமேயாகும்.
அதேபோல் இதற்கு முன்னர் இவர்கள் பல நம்பிக்கையில்லா பிரேரணை கொண்டுவரப்பட்ட போதும் அதற்கு நாம் ஆதரவு தெரிவித்தோம். ஆகவே அவர்களின் பிரேரணையில் இதில் என்ன செய்வது என்பது குறித்து நாம் தீர்மானம் எடுக்கவில்லை.
ஆனால் ஒருபோதும் நாம் கள்வர்களை, குற்றவாளிகளை காப்பாற்ற செயற்பட மாட்டோம், ஆனால் இவர்களில் பலர் அரசாங்கத்தை காப்பாற்றவே நடவடிக்கை எடுத்தனர். குறிப்பாக கடந்த ஆண்டு கள்ளத்தனமாக ஒரு அரசாங்கத்தை அமைக்க ராஜபக் ஷ கூட்டணி முயற்சித்த போது ரிஷாத் பதியுதீனுடன் பேச்சுவர்த்தை நடத்தினர். ஒருவேளை அப்போது ரிஷாத் மஹிந்த தரப்புடன் இணைந்திருந்தால் இன்று அவரை தலையில் வைத்து போற்றியிருப்பார்கள். ஆகவே இவர்களின் செயற்பாடுகள் என்ன என்பது எமக்கு நன்றாகவே தெரியும். எவ்வாறு இருப்பினும் அடுத்த அமர்வுகளுக்கு இதற்கான ஆதரவை பெற்றுக்கொள்ள பிரதான எதிர்க்கட்சி மற்றும் தமிழ் தேசிய கூட்டமைப்பு மற்றும் ஏனைய தரப்புடன் பேச்சுவார்த்தை நடத்தி எமக்கான ஆதரவை பெற்றுக்கொள்ள நடவடிக்கை எடுப்போம். உண்மையாக குற்றவாளிகளை தண்டிக்க நினைக்கும் அனைவரின் ஆதரவையும் நாம் இதில் எதிர்பார்க்கின்றோம் என்றார்.
-Vidivelli