பாதாள உலகக்குழு, போதைக் கும்பலுடன் தொடர்புபடுத்தி முஜிபுர் ரஹ்மான் எம்.பி. மீது அவதூறு பரப்பிய நபரிடம் சி.சி.டீ. விசாரணை
பாதாள உலகக்குழுவினர் மற்றும் போதைக் கும்பலுடன் தொடர்புபடுத்தி கொழும்பு மாவட்ட பாராளுமன்ற உறுப்பினர் முஜிபுர் ரஹ்மானுக்கு எதிராக சமூக ஊடகங்களில் பொய் மற்றும் அவதூறு செய்திகளை பரப்பி வந்த நபர் ஒருவரை குற்றத் தடுப்பு பிரிவினர் விசாரணைக்கு உட்படுத்தியுள்ளர்.
பேருவளை பகுதியைச் சேர்ந்த அஸாப் அஹ்மத் என்ற நபரிடமே கொழும்பு குற்றத்தடுப்பு பிரிவினர் இவ்வாறு விசாரணைகளை முன்னெடுத்துள்ளனர். அண்மையில் துபாயில் கைது செய்யப்பட்ட மதூஷ் மற்றும் கஞ்சிபானை இம்ரான் என்பவர்களோடு தொடர்புபடுத்தி பாராளுமன்ற உறுப்பினர் முஜிபுர் ரஹ்மானுக்கு எதிராக சமூக ஊடகங்களில் திட்டமிட்டு பிரசாரம் மேற்கொள்ளப்பட்டிருந்தது.
“ட்ரூ முஸ்லிம்” என்ற வட்ஸ்அப் குழுமத்தை நடாத்தி வரும் பேருவளையைச் சேர்ந்த அஸாப் அஹமட் என்ற நபரே இந்த பொய் மற்றும் அவதூறு பிரசாரத்தை பரப்பி வந்திருப்பதாக தகவல்கள் வெளியாகியுள்ளன.
பாதாள உலகத்துடன் தன்னை தொடர்பு படுத்தி பரப்பப்பட்ட இந்த அவதூறு பிரசாரத்தின் மூலமாக தன்னை ஏனைய குழுக்கள் இலக்கு வைப்பதற்கு சந்தர்ப்பத்தை ஏற்படுத்தி கொடுத்திருப்பதாகவும், தனக்கு மரண அச்சுறுத்தல் ஒன்றை ஏற்படுத்துவதற்கு குறித்த அரசியல் சக்திகள் திட்டமிட்டே இந்த பிரசாரத்தை பரப்பி வந்ததாகவும் முஜிபுர் ரஹ்மான் கொழும்பு குற்றத்தடுப்பு பிரிவில் முறைப்பாடொன்றை அண்மையில் பதிவு செய்திருந்தார்.
இதற்கமையவே குறிப்பிட்ட நபர் குற்றத்தடுப்பு பிரிவினரால் விசாரணைக்கு உட்படுத்தப்பட்டுள்ளார். அத்துடன், முதல்நாள் விசாரணையின் போது, கையடக்கத் தொலைபேசி உள்ளிட்டவற்றை சமர்பிக்காமையினால் மீண்டும் அவருக்கு அழைப்பு விடுக்கப்பட்டுள்ளதாக தெரிவிக்கப்படுகின்றது.
-Vidivelli