கலாநிதி அமீரலி,
மேர்டொக் பல்கலைக்கழகம்,
மேற்கு அவுஸ்திரேலியா
அறிமுகம்
இந்தக் கட்டுரைக்கு அறிமுகமாக ஒரு விடயத்தை வாசகர்களுக்கு விளக்க விரும்புகிறேன். தீவிரவாதம், பயங்கரவாதம், தீவிரவாதிகள், பயங்கரவாதிகள் ஆகிய சொற்களுக்கு சட்டவியல் அடிப்படையிலான ஒரு வரைவிலக்கணம் இன்றுவரை எந்த மொழியிலும் இல்லை. அவை அரசியல் தலைவர்கள் தமது அநியாயங்களையும், கொலைகளையும், அழிவுகளையும் மறைப்பதற்காகக் கையாளும் ஒரு சொற்போர்வை.
2001 புரட்டாதி பதினொன்றில் அமெரிக்க முதலாளித்துவக் கோட்டை ஒன்றின்மீது நான்கு விமானங்களை மோதி உயிர்ச் சேதங்களையும் அழிவுகளையும் ஏற்படுத்திய அல்கைதாமீது அமெரிக்க அரசு சூட்டிய மகுடமே இஸ்லாமியப் பயங்கரவாதமென்ற பெயர். அமெரிக்காவுடன் ஒசாமா பின் லாதனும் அவரின் போராளிகளும் இணைந்து ஆப்கானிஸ்தானிலிருந்து ருஷ்யாவை விரட்டியடிக்கப் போரிட்டபோது தலிபானும் அல்கைதாவும் விடுதலை வீரர்கள், ஆனால் அமெரிக்கா ஆப்கானிஸ்தானை ஆள்வதை அவர்கள் எதிர்த்தவுடன் அதே வீரர்கள் பயங்கரவாதிகளானது ஏன்? எனினும் அமெரிக்காவின் 9/11 இலிருந்து இலங்கையின் 2019 ஈஸ்டர் குண்டுவெடிப்புவரை உலகில் எங்கெல்லாம் எதற்கெல்லாம் குண்டு வெடிப்புகளும் திடீர் தாக்குதல்களும் நடைபெற்று அதிலே முஸ்லிம்கள் சம்பந்தப்பட்டிருந்தால் அவற்றுக்கு முஸ்லிம் அல்லது இஸ்லாமியப் பயங்கரவாதம் என்று முடிவுகட்டுவது சாதாரண வழக்காகி விட்டது. இதில் புதுமை என்னவென்றால் உலகின் சனத்தொகையில் ஏறத்தாழ கால்வாசியினர் முஸ்லிம்களாக இருந்தும் அவர்களையே பெரும்பான்மையாகக்கொண்ட 57 நாடுகளும் அவற்றுள் சில உலகத்தையே தமது பணத்தால் விலைபேசக்கூடிய தகைமை பெற்றிருந்தும் இஸ்லாமியப் பயங்கரவாதம் என்ற இழிப்பெயரை இன்றைய அரசியல் அகராதியிலிருந்து அகற்ற வலுவற்றிருப்பதே. இதை அவமானம் என்பதா? கோழைத்தனம் என்பதா? வாசகர்களே சிந்தியுங்கள்.
ஈஸ்டர் கொலை மர்மம்
2019 ஈஸ்டர் குண்டுவெடிப்பு நடந்து நாலாண்டுகள் கழிந்துவிட்டன. நூற்றுக்கணக்கான அப்பாவி உயிர்களையும் கோடிக்கணக்கான உடமைகளையும் பலிகொண்டு அதனால் அரசியல் இலாபம் பெற்ற ஒரு கூட்டம் இன்னும் ஆட்சிமோகத்தால் காய்களை நகர்த்தியவண்ணம் நடமாடிக் கொண்டிருக்கிறது. இரண்டு விசாரணைகளை இரண்டு அரசாங்கங்கள் மேற்கொண்டபோதிலும் அந்தக் கோர நிகழ்வின் பின்னணி என்ன அதன் சூத்திரதாரிகள் யார் என்ற உண்மைகள் இன்றுவரை மூடிமறைக்கப்பட்டு வருகின்றன. அப்போது ஆட்சியிலிருந்த நல்லாட்சி அரசு அதற்குக் கிடைத்த இரகசிய தகவல்களை உதாசீனம் செய்யாது உடனடியாக செயற்பட்டிருந்தால் அந்தக் கொடுமையை தடுத்திருக்கலாம். அதுதான் போகட்டும், அந்தக் கொலை நாடகம் நடந்தேறியபின் சுயாதீனமான ஒரு விசாரணையை மேற்கொண்டு அதன் சூத்திரதாரிகளை நீதிமுன் நிறுத்தி தக்க தண்டனை வழங்கி இருந்தாலாவது மக்கள் மன ஆறுதல் அடைந்திருப்பர். ஆனால் அவற்றுள் எதையுமே செய்யாது ஆட்சியினர் தமது பாதுகாப்புத் துறையினரைக் கொண்டு நூற்றுக்கணக்கான அப்பாவிகளை சந்தேகத்தின்பேரில் சிறையிலடைத்து குற்றவாளிகளைப் பிடித்துவிட்டோம் என்ற ஒரு மாயையைச் சிருட்டித்து தமது கடமை முடிந்துவிட்டதென தூங்கத் தொடங்கினர். அந்தத் தூக்கத்தைக் கலைத்துவிட்டது ஒரு தொலைக்காட்சிக் காணொளி.
சிலரை எக்காலமும் ஏமாற்றலாம், எல்லோரையும் சில காலங்கள் ஏமாற்றலாம், ஆனால் எல்லோரையும் எக்காலமும் ஏமாற்ற முடியாது என்பதற்கு அந்தக் காணொளி ஒரு சான்று. அதுமட்டுமல்ல, “அரசியல் பிழைத்தோர்க்கு அறம் கூற்றாகும்” என்ற இளங்கோ அடிகளாரின் தீர்க்கதரிசன வார்த்தைகளுக்கு உயிரூட்டவும் முனைகிறது அந்தக் காணொளி. ஆகையால் அக்காணொளி வெளிப்படுத்திய சில உண்மைகளால் கலக்கமுற்றுக் குறுகுறுக்கும் குற்ற நெஞ்சங்கள் அதனைப்பற்றிய அவதூறுகளைப் பரப்பத் தொடங்கியதில் எந்த ஆச்சரியமும் இல்லை. ஆனால் உண்மைகள் என்றுமே உறங்குவதில்லை.
நான் அறிமுகப்படுத்தியது போன்று இன்றுவரை ஆட்சியாளர்களாலும் அவர்களின் நிபுணத்துவ ஆலோசகர்களாலும் கைக்கூலி ஆய்வாளர்களாலும் உலகுக்கு உணர்த்தியதெல்லாம் 2019 ஈஸ்டர் குண்டுவெடிப்பு ஸஹ்ரான் என்ற ஓர் இஸ்லாமியப் பயங்கரவாதியின் தலைமையில் வெளிநாட்டு இஸ்லாமியக் கும்பலொன்றின் அதாவது ஐஎஸ்ஐஎஸ் என்ற இயக்கத்தின் தூண்டுதலுடன் இலங்கையை இஸ்லாமிய கிலாபத்தாக மாற்ற எடுத்த முயற்சியே என்ற அபாண்டமாகும். ஆனால் அந்த நிகழ்வு ஒரு குறிப்பிட்ட அரசியல் கும்பல் பாதுகாப்புத் துறையின் துணையுடன் நாட்டின் ஆட்சியைக் கைப்பற்ற திட்டமிட்டுச் செய்த ஒரு பயங்கரச் சதி என்ற மர்மத்தை இப்போது இக்காணொளியும் அதனைத்தொடர்ந்து வரும் பல தகவல்களும் வெளிப்படுத்தியுள்ளன. அந்தச் சதி அரங்கேறுவதற்கு இலங்கையின் பாதுகாப்புத் துறையின் உயர்மட்ட அதிகாரிகளும் துணையாய் இருந்தனர் என்பதும் புலனாகிறது. அந்தச் சதிகாரர்களின் கைக்கூலிகளே ஸஹ்ரானும் அவனின் கூட்டத்தினரும் என்பதும் வெள்ளிடைமலை. அவனையும் அவனின் கூட்டத்தினரையும் சுட்டுத் தள்ளிவிட்டு முஸ்லிம் சமூகத்தின்மேல் மொத்தப் பழியையும் சுமத்தியபின் தப்பித்தோம் பிழைத்தோம் என்று வாழ்கின்றனர் சதிகாரர்கள். இனியாவது இந்தச் சதியின் உண்மைகளை ஆராய்ந்து குற்றவாளிகளை இனங்கண்டு அவர்களுக்கு உரிய தண்டனையை வழங்க உலக அரங்கு ஒரு சுயாதீனமான விசாரணைக் குழுவை நியமிக்குமா? மீண்டும் அந்தப் பணியை இன்றைய ஜனாதிபதியிடமோ அல்லது அவர் நியமிக்கும் ஒரு குழுவிடமோ விடுவதால் எந்தப் பிரயோசனமும் இல்லை. அது காலத்தைக் கடத்தும் செயலன்றி வேறில்லை.
முஸ்லிம் சமூகத்தின் கடமை
இந்த விடயத்தை ஆறவிடாது தொடர்ந்து அழுத்தம் கொடுக்க வேண்டிய ஒரு கடமை இலங்கை முஸ்லிம் சமூகத்துக்கும் அதன் தலைமைத்துவத்துக்கும் உண்டு. அதை வலியுறுத்துவதே இக்கட்டுரை. ஏனெனில் அந்த நிகழ்வால் பாதிக்கப்பட்ட சமூகங்கள் இரண்டு. ஒன்று கத்தோலிக்க கிறிஸ்தவ மக்கள் மற்றது முஸ்லிம்கள். இருந்தும் தனது கத்தோலிக்க சமூகத்துக்கு நீதி கிடைக்க வேண்டும் என்று நாட்டுக்கு உள்ளேயும் வெளியேயும் அயராது குரல் கொடுத்துக்கொண்டும், ஈஸ்டர் கொலைகளின் பிரதான சூத்திரதாரிகள் இன்னும் வெளியே நடமாடிக்கொண்டிருக்கின்றனர் என்றும், ஸஹ்ரான் கும்பல் அச்சூத்திரதாரிகளின் வெறும் கைப்பாவைகளே என்றும் கத்தோலிக்கப் பேராயர் மல்கம் ரஞ்சித் அவர்கள் போராடிக் கொண்டிருப்பதை யாரும் பாராட்டாமல் இருக்க முடியாது. ஆனால் அவரின் போராட்டத்தின் நூற்றில் ஒரு வீதத்தையாவது முஸ்லிம் சமூகத்தின் சார்பில் அதன் அரசியல் தலைவர்களோ மதத் தலைவர்களோ மேற்கொள்ளாதிருப்பது ஏனோ?
ஸஹ்ரான் பிறந்த ஊர் காத்தான்குடி என்பதற்காக அந்த ஊரே இஸ்லாமியப் பயங்கரவாதத்தின் இருப்பிடம் என்று கருதிக்கொண்டு அரசுப் படைவீரர்கள் அந்த ஊர் மக்களையும் அவ்வூரின் புனிதத் தலங்களையும் எப்படியெல்லாம் உருட்டிப் புரட்டினார்கள் என்பதை விபரிக்கவும் வேண்டுமா? அந்த ஊர் வைதீக முஸ்லிம்கள் வாழும் ஓர் இடம் என்பதை மறுக்கவில்லை. ஆனால் வைதீகரெல்லாம் பயங்கரவாதிகளென்றால் பௌத்த சங்கத்தினரே பயங்கரவாதிகளாகாரா? காவியுடை தரித்த ஓரிரண்டு காவாலிகள் கலகம் செய்தால் அதற்காக பௌத்த துறவிகள் யாவரையும் அந்தக் கூட்டுக்குள் தள்ளி விடுவதா? அதைத்தான் முஸ்லிம்களைப் பொறுத்தவரை அரசாங்கம் செய்துள்ளது. ஆகவே உண்மை என்ன என்பதை அறிய ஒரு சுயாதீனமான விசாரணை வேண்டும். அதுவும் உலக அரங்கிலிருந்து அது உருவாக்கப்படல் வேண்டும். பேராயரும் அதைத்தான் வேண்டுகிறார். தொலைக்காட்சிக் காணொளிக்குப் பிறகு எதிர்க்கட்சித் தவைவர் ஒருவரும் அதை ஆமோதித்துள்ளார். ஆனால் எங்கே முஸ்லிம் தலைவர்களின் குரல்கள்?
இன்றைய அரசின் வெளிவிவகார அமைச்சர் ஒரு முஸ்லிம். அவர் முன்னைய ஜனாதிபதியின் ஆப்தநண்பரும் வழக்குரைஞரும் ஆவார். அது மட்டுமல்ல, அந்த ஜனாதிபதியாலேதான் பின் வாசலால் அரசியலுக்குள் நுழைந்து நீதி அமைச்சராகினார். அந்தப்பதவியை ராஜினாமாச் செய்த பின்பும் மீண்டும் அவரை இழுத்துவந்து நிதி அமைச்சராக்கினார் அந்த ஜனாதிபதி. இன்று காணொளி இந்த ஜனாதிபதிமேல் சுமத்திய பழியைக்கேட்டு இதுவரை மௌனியாக இருந்த அவர் கொதித்தெழுந்து தான் நிரபராதியென வாதாடுகிறார். அமைச்சர் அவர்களே உங்கள் நண்பர் கூறுவதெல்லாம் உண்மைதானா? உங்களுக்கு அச்சம்பவம்பற்றி எதுவுமே தெரியாதா? அவர் கூறுவது உண்மை என்ற நீங்களும் கருதினால் முஸ்லிம் சமூகமே ஈஸ்டர் கொலைகளுக்கு முழுப்பழியையும் ஏற்கவேண்டும். அதனாலேதான் சுமூகத்துக்காக நீங்கள் உங்களின் மௌனத்தைக் கலைக்க வேண்டும். இதை முஸ்லிம் சமூகத்தின் சார்பாக உங்களிடம் இக்கட்டுரை முன்வைக்கின்றது.
2024 இல் வரப்போகும் ஒரு தேர்தலை இலக்காக வைத்து வழமைபோன்று தமது பதவிகளை காப்பாற்ற எடுக்கும் உத்தியா முஸ்லிம் தலைமைத்துவத்தின் இந்த அதிசய மௌனம்? இந்த அரசியல்வாதிகளுக்கு தமது இனத்தின்மீது உண்மையான பற்று இருந்திருந்தால் முன்னைய ஜனாதிபதி அன்று கோவிட் தொற்றினால் உயிரிழந்த முஸ்லிம்களை தகனம் செய்ய வேண்டுமென்று கட்டளை பிறப்பித்தவுடனேயே ஒட்டுமொத்தமாக நாடாளுமன்றத்திலிருந்து வெளிநடப்புச் செய்திருக்க வேண்டும். அந்தக் கட்டளையை நாங்கள் எதிர்த்தோம் என்று இப்போது கூறுவதில் என்ன பயன் கோழைகளே?
முஸ்லிம் அரசியல்வாதிகளின் மௌனத்தை விளங்கிக் கொண்டாலும் ஏன் ஜம்இய்யத்துல் உலமா என்ற இஸ்லாமிய நிறுவனமும் ஊமையாகி விட்டது? சுயாதீனமான விசாரணை ஒன்று உலக அரங்கின் பங்களிப்புடன் அவசரம் வேண்டும் என்ற கத்தோலிக்கப் பேராயரின் கோரிக்கைக்கு வலுவூட்டி ஏன் இந்த மதத்தலைவர்கள் அவருடன் இணைந்து செயற்படாமல் இருக்கின்றனரோ? ஜனாதிபதியையும் அமைச்சர்களையும் வரவேற்று பூமாலை போட்டு புரியாணியும் வட்டிலப்பமும் கொடுத்து மகஜர் ஒன்றை அவர்களிடம் கையளிப்பதால் எந்தப் பிரயோசனமும் இல்லை உலமா சபையினரே. உங்களின் எதிர்ப்புக் குரல் உலக அரங்கினை எட்டவேண்டும். அவ்வாறு நீங்கள் குரல் எழுப்பினாலன்றி புகலிடம் புகுந்து வாழும் இலங்கை முஸ்லிம்களும் உங்களின் குரலுக்கு வலுவூட்டுமாறு குரலெழுப்புவர். இது நீங்கள் தமிழரிடமிருந்து கற்கவேண்டிய ஒரு பாடம். இப்போது சர்ச்சைக்குள்ளாகி இருக்கும் காணொளியிலும் புகலிடத் தமிழரின் செல்வாக்கு உண்டு என்பதை மறுப்பதற்கில்லை. நீங்களும் உங்களின் முஸ்லிம் அரசியல்வாதிகளும் மௌனமாக இருந்தால் என்னவாகும் என்பதை சற்றுச் சிந்தித்துப் பாருங்கள்.
பேரினவாதத்துக்குக் கிடைத்த பரிசு
இலங்கையின் பொருளாதார நெருக்கடி விரைவிலே தீர்க்க முடியாத ஒன்று. அதைத் தீர்ப்பதற்காகச் சர்வதேச நாணய நிதியின் உதவியுடன் மேற்கொள்ளப்பட்டுவரும் நடவடிக்கைகள் பெரும்பான்மையான மக்களின் வாழ்க்கையை மேலும் கஷ்டத்துக்குள் தள்ளிவிடும். அந்தக் கஷ்டங்களை நீண்டகால சுபீட்சத்துக்காக குறுகிய காலத்துக்கு அனுபவிக்க வேண்டியவை என்ற அரசின் வாதம் அர்த்தமற்றது. ஏனெனில் இன்றைய பொருளாதாரப் பிரச்சினை கடந்த இரண்டு வருடத்துக்குள் மட்டும் உருவாகிய ஒன்றல்ல. அது கடந்த ஏழு தசாப்தங்களாக இந்த நாட்டை ஆண்டுவரும் சிங்கள பௌத்த பேரினவாதத்தின் தவிர்க்கமுடியாத ஒரு விளைவு. எனவே அந்தப் பேரினவாதத்தின் அடித்தளத்திலே கட்டப்பட்டிருக்கும் அரசியல் சமூக அமைப்புகள் தகர்த்தெறியப்படல் வேண்டும். அதனைத் தகர்த்தெறிவதற்கு தேசிய மக்கள் சக்தியைத்தவிர வேறு எந்த ஒரு கட்சியும் தயாராக இல்லை. ஆகையினால் எதிர்வரப்போகும் தேர்தல் ஜனாதிபதித் தேர்தலாகவோ பொதுத் தேர்தலாகவோ ஊராட்சி மன்றத் தேர்தலாகவோ எதுவாக இருந்தாலும் அது இனவாத அடிப்படையிலேயே நடைபெறும். அதற்கு வழி சமைத்துள்ளது இந்தத் தொலைக்காட்சிக் காணொளி. அது பேரினவாதிளுக்குக் கிடைத்த ஒரு வரப்பிரசாதாம்.
முல்லைத்தீவிலே குருந்தூர் மலை தொடக்கம் திருகோணமலை விகாரைகள் வரையும், கிழக்கு மாகாணத்திலே இந்துத்துவத்தின் பரவல் தொடங்கி ஈஸ்டர் குண்டுவெடிப்பின் காணொளி தொடக்கியுள்ள முஸ்லிம் பயங்கரவாதம் பற்றிய வாதப்பிரதிவாதங்கள் வரை யாவும் சிங்கள பௌத்த பேரினவாதிகளின் தேர்தல் விஷமப் பிரச்சாரத்துக்கு அனுகூலமாய் அமைந்துள்ளன. அது எப்போது என்ன வடிவில் எந்த இனத்துக்கு எதிராக வெடிக்குமோ என்பது தெரியாது. ஆனால் அது முஸ்லிம்களுக்கு எதிராக வெடிப்பதை தடுக்கவேண்டுமாயின் ஈஸ்டர் குண்டுவெடிப்பின் பூரண உண்மையை அம்பலப்படுத்துவது அவசியம். எனவே சுயாதீனமான ஒரு விசாரணைக் குழு காலத்தைத் தாழ்த்தாது சர்வதேசத்தின் தலையீட்டுடன் நியமிக்கப்படல் வேண்டும். அதற்காகக் குரல் எழுப்புவது முஸ்லிம் தலைமைத்துவத்தின் கடமை. – Vidivelli