(ஏ.ஆர்.ஏ. பரீல்)
உள்ளூராட்சி மன்றங்களின் உறுப்பினர் தொகையினை அரைவாசியாகக் குறைக்கும் நோக்கில் நியமிக்கப்பட்ட எல்லை நிர்ணய குழுவின் அறிக்கை தயார் நிலையில் உள்ளது. இவ்வறிக்கை விரைவில் பிரதமரும் பொது நிர்வாகம், மாகாண சபைகள் மற்றும் உள்ளூராட்சி அமைச்சருமான தினேஷ் குணவர்தனவிடம் கையளிக்கப்படவுள்ளது.
உள்ளூராட்சி மன்றங்களின் தற்போதைய உறுப்பினர் தொகை சுமார் 8500 இலிருந்து 4714 ஆக குறைக்கப்பட்டுள்ளது. இவ்வாறு எண்ணிக்கையை குறைக்கும் வகையிலே எல்லை நிர்ணயம் மேற்கொள்ளப்பட்டுள்ளது. இந்த உறுப்பினர் தொகையில் தேர்தல்கள் ஆணைக்குழு மாற்றங்களை செய்ய முடியும் என எல்லை நிர்ணய குழுவின் தலைவர் மஹிந்த தேசப்பிரிய ‘விடிவெள்ளி’க்குத் தெரிவித்தார்.
எல்லை நிர்ணய அறிக்கையைக் கையளிப்பதற்கு திகதியொன்றினை ஒதுக்கித் தருமாறு தான் பிரதமரிடம் கோரிக்கை விடுத்துள்ளதாகவும் அவர் கூறினார்.
இதேவேளை 341 உள்ளூராட்சி மன்றங்களில் 340 உள்ளூராட்சி மன்றங்களின் எல்லைகள் மீள் நிர்ணயம் செய்யப்பட்டுள்ளதாகவும் கல்முனை மாநகர சபை தொடர்பான வழக்கொன்று நீதிமன்றில் விசாரணையின் கீழ் உள்ளதாகவும் அச் சபைக்கான எல்லை நிர்ணயம் கவனத்திற் கொள்ளப்படவில்லை எனவும் எல்லை நிர்ணய குழுவின் உறுப்பினர் கே.தவலிங்கம் தெரிவித்தார்.
ஒன்பது மாகாணங்களைச் சேர்ந்த உள்ளூராட்சி மன்றங்களின் எல்லை நிர்ணய அறிக்கை தனித்தனியாக மாகாண ரீதியில் சிங்களம், தமிழ், ஆங்கிலம் ஆகிய மூன்று மொழிகளிலும் மொத்தம் 27 அறிக்கைகள் தயாரிக்கப்பட்டுள்ளதாகவும் அவர் கூறினார்.
நில அளவைத் திணைக்கத்தின் ஒத்துழைப்புடன் தேவையான நில அளவை வரைபடங்கள் அறிக்கைகளுடன் இணைக்கப்பட்டுள்ளதாகவும் அவர் தெரிவித்தார். குறிப்பிட்ட அறிக்கைகள் வரைபடங்கள் தவிர்த்து அரசாங்க வர்த்தமானியில் பிரசுரிக்கப்படும் எனவும் அவர் விளக்கினார்.
எல்லை நிர்ணய குழுவின் அறிக்கை தொடர்பில் முறைப்பாடுகள் முன்வைக்கப்பட்டால் மீளாய்வுக் குழுவொன்றினை நியமித்து அது தொடர்பில் ஆராய்ந்து தீர்மானம் மேற்கொள்வதற்கு சம்பந்தப்பட்ட அமைச்சருக்கு அதிகாரமுண்டு என்றும் தெரிவித்தார்.– Vidivelli