உயிர்த்த ஞாயிறு தாக்குதல்கள்: சிரேஷ்ட பொலிஸ் அத்தியட்சகர் சஞ்சீவ பதவிநிலை கீழிறக்கம்
ஒரு நட்சத்திரம் அகற்றப்பட்டது
உயிர்த்த ஞாயிறு தொடர் தற்கொலை குண்டுத் தாக்குதல்கள் தொடர்பில் இடம்பெறும் விசாரணைகளுக்கமைய, சிரேஷ்ட பொலிஸ் அத்தியட்சகரான சஞ்ஜீவ பண்டாரவை தற்காலிகமாக பதவி நிலையில் கீழிறக்க தேசிய பொலிஸ் ஆணைக்குழு நடவடிக்கை எடுத்துள்ளது.
தற்போது களுத்துறை சிரேஷ்ட பொலிஸ் அத்தியட்சகராகக் கடமையாற்றும் சஞ்ஜீவ பண்டாரவை பொலிஸ் அத்தியட்சகராகப் பதவியிறக்கம் செய்ய தேசிய பொலிஸ் ஆணைக்குழு நடவடிக்கை எடுத்துள்ள நிலையில், அதுகுறித்து அவரது சீருடையிலுள்ள ஒரு நட்சத்திரத்தை அகற்ற நடவடிக்கை எடுத்துள்ளதாக அறியமுடிகின்றது.
உயிர்த்த ஞாயிறு தாக்குதல்கள் இடபெற்றபோது, சஞ்ஜீவ பண்டார கொழும்பு வடக்கு பொலிஸ் அத்தியட்சகராகக் கடமையாற்றிய நிலையில், முன்கூட்டி உளவுத்துறை வழங்கிய தகவல்களை அவர் கணக்கில் கொள்ளாது செயற்பட்டதாகக் குற்றச்சாட்டுள்ளது. குறிப்பாக கொழும்பு வடக்கில் தாக்குதலுக்குள்ளான புனித அந்தோனியார் ஆலயம் அமைந்துள்ள பொலிஸ் பிரிவான கரையோர பொலிஸ் நிலையத்துக்கு அவ்வாறான எந்த எச்சரிக்கையையும் வழங்க பொலிஸ் அத்தியட்சகர் சஞ்ஜீவ பண்டார நடவடிக்கை எடுக்கவில்லை எனவும், தாக்குதலின் பின்னர் அதனை மறைக்கப் போலி ஆவணங்கள் தயாரிக்கப்பட்டுள்ளதாகவும் அண்மையில், குறித்த தாக்குதல் குறித்து விசாரிக்கும் ஜனாதிபதி விசாரணை ஆணைக்குழுவில் வெளிப்பட்டது.
இவ்வாறான பின்னணியில் அண்மையில் சிரேஷ்ட பொலிஸ் அத்தியட்சகராகத் தரமுயர்த்தப்பட்ட சஞ்ஜீவ பண்டாரவை, விசாரணைகள் முடியும் வரை மீளவும் பொலிஸ் அத்தியட்சகராகவே வைத்திருக்க முடிவு செய்துள்ள பொலிஸ் ஆணைக்குழு, அவருக்கு வழங்கப்பட்டிருந்த பதவியுயர்வை கிடப்பில் போட்டு அவரின் பதவி கீழிறக்கப்பட்டுள்ளமை குறிப்பிடத்தக்கது.-Vidivelli
- எம்.எப்.எம்.பஸீர்