ஈஸ்டர் தாக்குதல் குறித்த விசாரணைகள் நடத்தும் பாராளுமன்ற விசேட தெரிவுக்குழு முன்னிலையில் ஜனாதிபதி மைத்திரிபால சிறிசேனவை சாட்சியமளிக்க வருமாறு தெரிவுக்குழு ஜனாதிபதிக்கு எழுத்து மூலம் அறிவித்தல் விடுத்துள்ளது.
ஜனாதிபதி தெரிவுக்குழுவிற்கு ஒத்துழைப்பு வழங்கினால் மட்டுமே அறிக்கையை முழுமைப்படுத்த முடியும் எனவும் தெரிவுக்குழு சுட்டிக்காட்டுகின்றது.
கடந்த ஏப்ரல் மாதம் 21 ஆம் திகதி இடம்பெற்ற தற்கொலை குண்டுத்தாக்குதல் குறித்து விசாரணை நடத்தி பாராளுமன்றத்திற்கு அறிக்கை சமர்ப்பிக்க நியமிக்கப்பட்ட விசேட தெரிவுக்குழுவின் விசாரணைகள் முடிந்துள்ள நிலையில் இறுதியாக ஜனாதிபதி மைத்திரிபால சிறிசேனவின் வாக்குமூலம் மாத்திரம் பெறப்படவுள்ள நிலையில் அடுத்த வாரங்களில் ஒரு தினத்தில் தெரிவுக்குழு முன்னிலையில் சாட்சியமளிக்க வருமாறு ஜனாதிபதி மைத்திரிபால சிறிசேனவிற்கு பாராளுமன்ற விசேட தெரிவுக்குழு எழுத்துமூல அறிவிப்பை விடுத்துள்ளது.
ஜனாதிபதிக்கு இலகுவான ஒரு தினத்தில் தாம் தெரிவுக்குழு முன்னிலையில் வர முடியும் எனவும் அவ்வாறு அவர் ஒத்துழைப்பை வழங்கினால் தெரிவுக்குழு அறிக்கையை முழுமைப்படுத்த முடியும் எனவும் ஆகவே அதற்கான ஒத்துழைப்பை ஜனாதிபதியிடம் இருந்து எதிர்பார்ப்பதாகவும் தெரிவுக்குழுவின் தலைவர் பிரதி சபாநாயகர் ஆனந்த குமாரசிறி தெரிவித்தார். தெரிவுக்குழு கால எல்லையை ஒரு மாதகாலம் நீட்டித்துள்ள நிலையில் இந்த காலப்பகுதியில் அறிக்கையை முழுமைப்படுத்த வேண்டியுள்ளது.
ஆகவே இதில் சகல தரப்பினரதும் ஒத்துழைப்பு வேண்டியுள்ளது. அரச தலைவர்கள் இதில் தமது பங்களிப்பை செய்தால் தான் இந்த விசாரணைகளை நாம் முன்னெடுத்ததில் ஒரு முழுமையான வெளிப்பாட்டை வெளிப்படுத்த முடியும் என்றார்.
எனினும் ஜனாதிபதி மைத்திரிபால சிறிசேன பாராளுமன்ற விசேட தெரிவுக்குழு முன்னிலையில் தான் வரப்போவதில்லை எனவும் தெரிவுக்குழு நகர்வுகள் பக்கசார்பாக முன்னெடுக்கப்படுவதாக கூறி தான் தெரிவுக்குழு நகர்வுகளை நிராகரிப்பதாக தொடர்ச்சியாக இருந்து வருகின்றார் என்பதும் குறிப்பிடத்தக்கது.
vidivelli