சஹ்ரானும் அவரது அமைப்பும் காத்தான்குடியில் அட்டகாசம் செய்வதாக எமக்கு முறையிடப்பட்டது
நாம் அறிவுறுத்தியும் பொலிஸ் நடவடிக்கை எடுக்கவில்லை :பிரதி சொலிசிட்டர் ஜெனரல் சமல் திலிப பீரிஸ்
சஹ்ரான் மற்றும் தவ்ஹீத் ஜமாஅத் அமைப்பு காத்தான்குடியில் அட்டகாசம் செய்கின்றது என சஹ்லான் மௌலவி என்பவர் 2017ஆம் ஆண்டில் சட்டமா அதிபர் திணைக்களத்திற்கு முறைப்பாடு ஒன்றினை கொடுத்தவுடன் குற்றப்புலனாய்வு பிரிவுக்கும் முறைப்பாடு செய்துள்ளார்.
இரண்டு வருடங்களாக குற்றப்புலனாய்வு பிரிவு நடவடிக்கை எடுக்காதது ஏன் என்ற கேள்வியும் இது குறித்து நாம் பொலிஸ்மா அதிபருக்கு தெரிவித்து அவர் நடவடிக்கை எடுக்காதது ஏன் என்ற கேள்வியும் சட்டமா அதிபர் திணைக்களம் பக்கம் உள்ளது என பிரதி சொலிசிட்டர் ஜெனரல் சமல் திலிப பீரிஸ் பாராளுமன்ற தெரிவுக்குழு முன்னிலையில் சாட்சியமளிக்கையில் கூறினார்.
ஈஸ்டர் தாக்குதல் குறித்து விசாரணை நடத்தி பாராளுமன்றத்திற்கு அறிக்கை சமர்ப்பிக்க நியமிக்கப்பட்ட பாராளுமன்ற விசேட தெரிவுக்குழு நேற்று வியாழக்கிழமை பிற்பகல் பாராளுமன்ற கட்டிடத்தொகுதியில் கூடியது. இதில் சாட்சியமளிக்க வந்திருந்தபோதே அவர் இவற்றை குறிப்பிட்டார்.
அவர் தெரிவுக்குழு முன் தொடர்ந்தும் கூறுகையில், சட்டமா அதிபர் திணைக்களத்திற்கு அனுப்பிவைக்கப்பட்டுள்ள கடிதத்தில் கடந்த 2017 ஆம் ஆண்டு அனுப்பி வைக்கப்பட்ட கடிதம் ஒன்று குறித்து இந்த குழு முன்னிலையில் கலந்துரையாடப்பட்டுள்ளது. அதாவது குற்றப்புலனாய்வு பிரிவினரால் கடந்த 2017ஆம் ஆண்டு கடிதம் ஒன்று அனுப்பி வைக்கப்பட்டது.
இதில் குற்றம் சாதாரண சந்தேகத்துக்கு அப்பால் உறுதிப்படுத்த முடிந்த ஆதாரங்களை கொண்டே தீர்மானம் எடுக்கப்படும். சட்டமா அதிபர் திணைக்களத்தில் குற்றவியல் மற்றும் சிவில் வழக்குகள் குறித்த பிரிவுகள் உள்ளன. இதில் போதைப்பொருள் விவகாரங்கள் குறித்தும் சிறுவர் துஷ்பிரயோகம், பயங்கரவாத செயற்பாடுகள் குறித்து பிரிவுகளாக செயற்படும் அதிகாரிகள் உள்ளனர். இதில் பயங்கரவாத காரணியொன்று வருமென்றால் அது ஆசாத் நவவியின் பிரிவுக்கு செல்லும். இவை இறுதியாக சட்டமா அதிபருடன் கலந்துரையாடி தீர்மானம் எடுக்கப்படும். எம்.பி என்ற பிரிவு ஒன்று உள்ளது. இது நேரடியாக சட்டமா அதிபரின் கீழ் மக்களின் குறைகளை ஆராயும் பிரிவாகும். அவ்வாறு இருக்கையில் 2017 ஆம் ஆண்டு முஸ்லிம் அமைப்பொன்று சட்டமா அதிபருக்கு கோப்பு ஒன்றினை அனுப்பி வைத்துள்ளது. சட்டமா அதிபர் ஜெயந்த ஜெயசூரியவின் பெயருக்கே வந்துள்ளது. நீதி அமைச்சர், பொலிஸ்மா அதிபர் அற்றும் அரச அதிகாரிகள் சிலருக்கும் அனுப்பிவைக்கப்பட்டுள்ளது. பின்னர் நவவிக்கு அனுப்பி வைக்கப்பட்ட கடிதத்துடன் ஒப்பிட்டு பார்த்தேன்.
இதை அனுப்பிவைத்த நபர் மீண்டும் அதே கடிதத்தை சில மாற்றங்களை செய்து அனுப்பி வைத்துள்ளார் என்றே தெரிகின்றது. இந்த கடிதம் குறித்து சட்டமா அதிபருடன் பேச முன்னர் முதலில் இந்த கடிதத்தை நான் படித்தேன். இதில் முதல் வாக்கியம் “நாம் முஸ்லிம் சமூகத்தினர்” என்ற காரணிகளுடன் ஆரம்பித்துள்ளது. இரண்டாம் வாக்கியத்தில் இஸ்லாம் என்றால் என்ன என்ற காரணிகளை முன்வைத்துள்ளார். இறுதியாக இந்த நாட்டின் அமைதி நல்லிணக்கத்தை நாசமாக்க எந்த அமைப்புகளுக்கும் அனுமதிக்க முடியாது. எனினும் சில இஸ்லாமிய அடிப்படைவாத அமைப்புகள் காத்தான்குடியில் உருவாகி வருகின்றது என்று கூறி சில காரணிகளை முன்வைத்துள்ளார். இதில் இருந்து எனக்கு என்ன விளங்கியது என்றால், என்.டி.ஜே என்ற அமைப்பு அதாவது தேசிய தவ்ஹித் ஜமாஅத் மற்றும் சஹ்ரான் என்ற அவ்வமைப்பின் தலைவரின் மூலம் உருவாக்கப்பட்டு, அதனால் அங்கு மக்கள் குழப்பமடைந்துள்ளதாகவும் அதனை தீர்த்து தாருங்கள் என்றுமே அதில் கூறப்பட்டுள்ளதாக நான் கருதினேன். இந்த கடிதத்துடன் சில புகைப்படங்களும் இணைக்கப்பட்டது. இதில் குறிப்பிட்ட சில படங்களை நான் அவதானித்தேன். இதில் நடுவீதியில் வாள்களுடன் சிலர் இருப்பதும் சிலர் காயமடைந்துள்ளதாகவும் இருந்தது. இதில் ஒரு நபர் அணிந்துள்ள ரி-ஷர்ட் இல் வெள்ளைநிற அடையாளம் ஒன்று உள்ளது. இது ஐ.எஸ் அமைப்பின் சின்னத்துக்கு ஒப்பான ஒன்று. மற்றயதில் சஹ்ரான் என்ற நபர் இருப்பதும் உள்ளது.
நான் சட்டமா அதிபருடன் இது பற்றிப் பேசினேன். சட்டமா அதிபர் ஜெயந்த ஜெயசூரியவிடம் இந்த காரணிகளை கூறியவுடன் அவரும் ஆச்சரியமடைந்தார். இலங்கையில் இவ்வாறு இடம்பெறுகின்றதா என கேள்வி எழுப்பினார். இதற்கு பிரதேச பொலிஸை பயன்படுத்தி சரிவராது பிரதான விசாரணைகளை முன்னெடுக்க வேண்டும் என கூறினார்.
இந்த கடிதத்தில் அவர் கூறிய விடயங்களை நான் சட்டமா அதிபருக்கு கூறினேன். அதனை வாசித்துக் காட்டினேன். அதற்கமைய அவர் விசாரணை அறிக்கைகளை பெற்றுத்தரும்படி கேட்டுக்கொண்டார். சாதாரணமாக எமக்கு வரும் கடிதத்தை பிரதி ஒன்றை பொலிஸ்மா அதிபருக்கு அனுப்புவோம். ஆனால் இம்முறை நான் அவ்வாறு செய்யாது சஹ்லான் மௌலவியின் கடிதத்தின் பிரதியுடன் சட்டமா அதிபரின் கோரிக்கையை உள்ளடக்கி அனுப்பினேன். பொலிஸ்மா அதிபருக்கு விசாரணை நடத்தி அறிக்கையை தரவேண்டும் என நான் 2017 ஆம் ஆண்டு அனுப்பினேன். சில காலங்களின் பின்னர் 2017. 07. 21 ஆம திகதி மீண்டும் சஹ்லான் மௌலவி சட்டமா அதிபருக்கு கடிதம் ஒன்றினை அனுப்பினார். அதாவது முதலில் அவர் அனுப்பிய கடிதம் குறித்து கலந்துரையாடல் ஒன்றினை ஏற்படுத்தித் தருமாறு அவர் கோரியிருந்தார். கலந்துரையாடலை ஏற்படுத்தும் அதிகாரம் எனக்கு இருக்கவில்லை. ஆனால் இந்த கடிதம் குறித்து நான் சற்று அவதானம் செலுத்தியிருந்தேன். இரண்டாவது கடிதம் கிடைத்தவுடன் மீண்டும் கடிதம் ஒன்றினை அவருக்கு அனுப்பினேன். அதில் பொலிஸ்மா அதிபருக்கு நாம் உரிய காரணிகளை கொடுத்துள்ளதாக நான் சுட்டிக்காட்டியிருந்தேன். மீண்டும் சஹ்லான் மௌலவி கடிதம் ஒன்றினை அனுப்பினார். அதில் எமது முயற்சிகளுக்கு நன்றிகளை தெரிவித்திருந்தார்.
எனது கண்காணிப்பு அதிகாரியின் பதிவேட்டில் சஹ்லான் மௌலவி தொடர்புகொண்ட இலக்கத்தை பதிவு செய்திருந்தேன். சஹ்ரான் குறித்து விசாரணைகள் முன்னெடுக்கப்பட்டு அவர்களுக்கு பிணை வழங்க முயற்சிகள் எடுக்கப்படுகின்றது அதனை தடுக்க வேண்டும் என கூறினார்.
அதற்கமைய காத்தான்குடி பிரதி பொலிஸ்மா அதிபருக்கு என்னை சந்திக்க தகவல் அனுப்பினேன். கஸ்தூரி ரத்ன என்ற நபர் என்னை வந்து சந்தித்தார். அவர் முழுமையான அறிக்கை ஒன்றினை என்னிடம் ஒப்படைத்தார். முழு சம்பவமும் அதில் இருந்தது. தேசிய தவ்ஹீத் ஜமாஅத் அமைப்பும் எமக்கு கடிதம் அனுப்பிய அமைப்பும் ஆகிய இரண்டு அமைப்புமே மோதல்களில் ஈடுபட்டு கைதுசெய்யப்பட்டுள்ளதாக தெரிந்தது. பின்னர் இந்த நபர்களுக்கு பிணை வழங்க வேண்டாம் எனவும் அதனை தடுக்க நடவடிக்கை எடுக்க வேண்டும் என ஆலோசனை வழங்கினேன்.
சஹ்லான் மௌலவிக்கு மீண்டும் நான் அறியப்படுத்தினேன். நீங்கள் கோரிய காரணி குறித்து நடவடிக்கை எடுக்க ஆலோசனை வழங்கியுள்ளேன். இது குறித்து மேலதிக தகவல்கள் கிடைத்தால் காத்தான்குடி போலிஸ் நிலையத்தில் கூறுமாறும் கடிதத்தில் தெரிவித்தேன். அதன் பின்னர் சஹ்லான் மௌலவி எனக்கு கடிதம் அனுப்பவில்லை. ஆனால் அவர் அனுப்பிய கடிதங்கள் குறித்து நான் பொலிஸ்மா அதிபருக்கு விடுத்த கோரிக்கைக்கு இன்றுவரை எமக்கு எந்த பதிலும் வரவில்லை.
சஹ்லான் மௌலவி கொடுத்த கடிதம் தொடர்பில் நாம் சகல நடவடிக்கைகளையும் எடுத்தோம். அவர் இந்த தாக்குதல் குறித்து தூரநோக்குடன் சிந்தித்து இந்த கடிதத்தை எம்மிடம் வழங்கியுள்ள நிலையில் அதற்கான நடவடிக்கை எடுத்துள்ள நிலையில் குற்றப்புலனாய்வு பிரிவு ஏன் நடவடிக்கை எடுக்கவில்லை என்பதே எமது கேள்வி.
சஹ்ரான் பயங்கரவாதி என்றால் எம்மிடம் ஏன் கேட்க வேண்டும், முதலில் கைது செய்திருக்க வேண்டும். எம்மைப் பார்த்துகொண்டு இருக்க வேண்டிய அவசியம் இல்லை.
காத்தான்குடி ஓ.ஐ.சி. வந்தவுடன், குறித்த புகைப்படங்களை காட்டினேன். காத்தான்குடியில் இவ்வாறு மோசமாக நடந்துள்ள நிலையில் பொலிஸ் வேடிக்கை பார்க்கிறீர்களா என கேட்டேன்.
அரசியல்வாதிகளின் அழுத்தம் காரணமாக செய்ய முடியாது என்றார். என்றாலும் அரசியல் செயற்பாடுகளுக்காக பொதுமக்களை துன்புறுத்த இடமளிப்பதா என்ற கேள்வியே எம்மிடம் இருந்தது.
காத்தான்குடி விடயத்தில் எனக்கு உரிய காரியம் நடக்க வேண்டும் என்றே நினைத்தேன். அதனால் தான் உயர் அதிகாரிகளுக்கு கூறியும் ஓ.ஐ.சி யை வரவழைத்தும் முயற்சிகளை எடுத்தேன் என்றார்.
(ஆர்.யசி)
vidivelli