பள்ளிவாசல்களின் திருத்தவேலைகளுக்கும், நிர்மாணப்பணிகளுக்கும், புதிய பள்ளிவாசல்கள் அமைப்பதற்கும் நிதியுதவிகள் பெற்றுக்கொள்வதில் பள்ளிவாசல் தலைவர்கள் மிக எச்சரிக்கையாக இருக்கவேண்டும். நாட்டின் சட்டங்களுக்கு விரோதமாகவும், இஸ்லாம் அங்கீகரிக்காத தொழில்களில் ஈடுபடுபவர்களிடமிருந்து நிதியுதவிகளைப் பெற்றுக்கொள்ளக்கூடாது என வக்பு சபையின் தலைவர் சட்டத்தரணி எஸ்.எம்.எம். யாசீன் பள்ளிவாசல்களின் தலைவர்களிடம் கோரிக்கை விடுத்துள்ளார். புதிய பள்ளிவாசல்களின் நிர்மாணம் தொடர்பில் கருத்துத் தெரிவிக்கையிலேயே அவர் பள்ளிவாசல்களின் தலைவர்களிடம் இக்கோரிக்கையை முன்வைத்ததாகக் குறிப்பிட்டார். அவர் தொடர்ந்தும் கருத்துத் தெரிவிக்கையில்; புதிய பள்ளிவாசல்கள் நிறுவப்படும்போதும், புதிய நிர்மாணப்பணிகள் முன்னெடுக்கப்படும்போதும் அதற்கான நிதிகளை யாரிடமிருந்து பெற்றுக்கொள்ளவேண்டும் என்பதில் பள்ளிவாசல்களின் தலைவர்களுக்கு தெளிவு இருக்க வேண்டும்.
நாட்டில் முஸ்லிம்களின் சனத்தொகை விகிதாசாரத்துக்கும் மேலதிகமான விகிதாசாரத்தில் குற்றச்செயல் புரிபவர்களும், இஸ்லாம் அங்கீகரிக்காத தொழில்களில், வர்த்தகத்தில் ஈடுபடுபவர்களும் இருக்கிறார்கள். இவர்களின் நிதியுதவிகள் பள்ளிவாசல்களில் உள்வாங்கப்படக் கூடாது. சட்டவிரோத நடவடிக்கைகள் மூலம் பணம் ஈட்டுபவர்கள் சமூகத்திலிருந்தும் ஓரங்கட்டப்பட வேண்டும். சமூகம் அவ்வாறனவர்களிடமிருந்து பள்ளிவாசல்களுக்கு நிதியுதவி பெற்றுக்கொள்வதை நிராகரிக்க வேண்டும்.
இதேவேளை, பள்ளிவாசல்களை நிர்வாகிப்பதற்கு தெரிவுசெய்யப்படுவோரும் சட்டவிரோத வர்த்தகத்தில் ஈடுபடுபவர்களாக இருக்கக்கூடாது. இன்று பல பள்ளிவாசல்களின் நிர்வாக சபை அங்கத்தவர்கள், தலைவர்கள் தொடர்பில் முறைப்பாடுகள் கிடைக்கப்பெற்றுள்ளன. அவ்வாறான நிர்வாக சபைகளை சீரமைக்கும் நடவடிக்கைகளில் வக்புசபை ஈடுபட்டுள்ளது. பள்ளிவாசல் நிர்வாகங்கள் ஊழல்களின்றி, இறைபக்தியுடன் செயற்பட்டாலே சிறந்ததோர் சமூகத்தை ஒவ்வோர் பகுதிகளிலும் கட்டியெழுப்பமுடியும். வக்பு சட்டத்தில் மேற்கொள்ளப்படவுள்ள சீர்திருத்தங்கள் இவற்றினை மையமாகக் கொண்டே உள்வாங்கப்படும் என்றார்.
-Vidivelli