நாசர் வைத்தியசாலையில் பலஸ்தீன டாக்டர்கள் மீது இஸ்ரேல் சித்திரவதை
பி.பி.சி. யின் ஆய்வில் நிரூபிக்கப்பட்டது
ஏ.ஆர்.ஏ.பரீல்
“நாங்கள் கண்கள் கட்டப்பட்டு, தடுத்து வைக்கப்பட்டு பலவந்தமாக ஆடையினைக் களையச் செய்து இஸ்ரேலியப் படையினரால் தொடர்ச்சியாகத் தாக்கப்பட்டோம். அண்மையில் எமது வைத்தியசாலையில் இஸ்ரேலிய படைகளால் திடீரென தாக்குதல் மேற்கொண்டதன் பின்பே இந்த நிலைமை எமக்கு ஏற்பட்டது” என காஸாவின் பலஸ்தீன நாசர் வைத்தியசாலை டாக்டர்கள் உட்பட வைத்திய சேவையாளர்கள் தெரிவித்தனர்.
நாசர் வைத்தியசாலையின் டாக்டர் அஹமட் அபு சபா தெரிவிக்கையில், ‘என்னை ஒரு வார காலம் தடுத்து வைத்திருந்தனர். அங்கு நீண்ட மூக்கும், வாயும் கொண்ட நாய்கள் இருந்தன. இஸ்ரேலிய போர் வீரர்களால் எனது கை உடைக்கப்பட்டது’ என்றார்.
“இஸ்ரேலிய படையினர் எங்களைத் தாக்கினார்கள். முழங்காலில் பல மணி நேரம் நிற்கச் செய்தார்கள். நாங்கள் விடுவிக்கப்படுவதற்கு ஒரு நாளுக்கு முன்பு இவ்வாறு எம்மை பலவந்தப்படுத்தினார்கள்” என்றும் வைத்தியாசாலை வைத்திய சேவையைச் சேர்ந்தவர்கள் பிபிசி செய்திச் சேவைக்குத் தெரிவித்தார்கள்.
வைத்தியர்களின் குறிப்பிட்ட குற்றச்சாட்டுகளை பிபிசி இஸ்ரேலிய பாதுகாப்பு படையினரிடம் (IDF) முன்வைத்தது. இஸ்ரேலிய பாதுகாப்புபடை இக் குற்றச்சாட்டுகளை நிராகரித்தது. வைத்தியசாலை பணியாளர்கள் முன்வைத்த குற்றச்சாட்டுகளை மறுத்ததுடன் வைத்தியர்கள் மீது தாக்குதல் நடத்தவில்லை எனத் தெரிவித்தது.
எனினும் தடுத்து வைக்கப்பட்டிருந்து விடுவிக்கப்பட்டவர்கள் மற்றும் ஏனைய வைத்தியசாலை டாக்டர்கள் பிபிசிக்கு முக்கியமான தகவல்களை வழங்கினார்கள். வைத்தியசாலையின் முபாரக் என்றழைக்கப்படும் பிரசவ கட்டிடம் இஸ்ரேலிய பாதுகாப்பு படையினரால் வைத்தியசாலை பணியாளர்களை சித்திரவதை செய்யும் நிலையமாகப் பயன்படுத்தப்பட்டது. வைத்தியசாலையை இஸ்ரேலிய படைகள் ஆக்கிரமித்ததும் என்னை நோயாளர்களுடன் இருக்குமாறு பணித்தார்கள். பின்பு என்னை முபாரக் என்றழைக்கப்படும் பிரசவ கட்டிடத்துக்கு அழைத்துச் சென்றார்கள். அவ் இடம் ஓர் சித்திரவதை முகாமாக செயற்பட்டது என டாக்டர் அபுசபா தெரிவித்தார்.
இஸ்ரேலிய படையினர் என்னை ஓர் கதிரையில் அமர்த்தினார்கள். அது ஒரு தூக்கு மேடை போன்றிருந்தது. அங்கு கயிறு இழுப்பது போன்ற சப்தமும் கேட்டது. அப்போது நான் கொலை செய்யப்படப் போகிறேனோ என்று நினைத்தேன். பின்பு அவர்கள் கண்ணாடி போத்தலொன்றினை உடைத்தார்கள்.அக் கண்ணாடியின் மூலம் எனது காலை வெட்டினார்கள். இரத்தம் பீறிட்டுப் பாய்ந்தது. பின்பு ஒரு டாக்டரையும் அழைத்து வந்து அருகில் நிறுத்தினார்கள் என்றார்.
ஆனால் இஸ்ரேலிய பாதுகாப்பு படையினர் இந்தக் குற்றச்சாட்டுகள் அனைத்தையும் மறுத்தார்கள். தடுத்து வைக்கப்பட்டிருந்த மூவர் கூட்டாக பிபிசியிடம் தங்களுக்கு நடந்ததைத் தெரிவித்தார்கள். நாங்கள் இராணுவ வாகனத்துக்குள் பலவந்தமாக ஏற்றப்பட்டு தாக்கப்பட்டோம். பெரும் எண்ணிக்கையானோர் இவ்வாறு தாக்கப்பட்டார்கள் என்று தெரிவித்தார்கள்.
நாங்கள் நிர்வாணமாக்கப்பட்டோம். ஒருவர் மீது ஒருவர் ஏற்றப்பட்டு காஸாவுக்கு வெளியில் அழைத்துச் செல்லப்பட்டோம். அவர்கள் எம்மைத் தாக்கி குளிர்ந்த நீரினை எம்மீது வார்த்தார்கள் என்றார்.
டாக்டர் அபுசபா தொடர்ந்தும் தெரிவிக்கையில், ‘ இஸ்ரேலிய படையினர் எம்மைத் தாக்கி அழைத்துச் செல்கையில் கிரவல் கற்கள் நிறைந்த திடலொன்றுக்கு எம்மை கொண்டு சென்றார்கள். எமது கண்களைக் கட்டி அங்கு முழங்காலில் நிற்குமாறு பலவந்தப்படுத்தினார்கள். எம்மை அங்கு கொலை செய்து புதைப்பார்கள் என்றே நாம் நினைத்தோம். நாங்கள் எல்லோரும் அப்போது இறைவனை பிரார்த்தித்தோம். எனது கைகள் பின்னால் கட்டப்பட்டிருந்தன.
என்னை தண்டனை வழங்குவதற்கு கொண்டு சென்றார்கள். கைகளை கால்களாகப் பாவித்து நிற்க வைத்தார்கள். ஒரு வீரர் என்னை அப்படியே அவரிடம் நகர்ந்து வருமாறு கூறினார். எனது கைகளை உடையும்வரை தாக்கினார்கள் என்றார் டாக்டர் அபுசபா.
இவ்வாறு தாக்கப்பட்ட டாக்டர் அபுசபா பின்பு எக்ஸ்ரே எடுத்து தனது உடைந்த கைகளுக்கு காஸா வைத்தியசாலையில் சிகிச்சை பெற்றார் என்பதை பிபிசி உறுதிப்படுத்தியது.
இதேவேளை நாசர் வைத்தியசாலையில் சிகிச்சை பெற்றுவரும் நோயாளிகளை பராமரிப்பதற்கு சில சுகாதார ஊழியர்களுக்கே அனுமதி வழங்கப்பட்டுள்ளது. இஸ்ரேல் நாசர் வைத்தியசாலையை ஆக்கிரமிப்பு செய்த போது சில நோயாளர்களைத் தடுத்து வைத்துள்ளது.
நோயாளிகள் வைத்தியசாலையினுள் அவர்களது கைகள் கட்டிலில் கட்டப்பட்டவாறு வைக்கப்பட்டிருக்கும் வீடியோ பதிவுகள் வெளியாகியுள்ளன. இவர்கள் நோயாளிகளா இன்றேல் வேறு எவருமா என்பதை அறிய முடியாதுள்ளது.
தீவிரவாதத்துடன் தொடர்புடையவர்கள் என சந்தேகிக்கப்படுபவர்கள் இவ்வாறான நிலைமையில் வைத்தியசாலையில் சிகிச்சையளிக்கப்படுவதாக இஸ்ரேலிய பாதுகாப்பு படை தெரிவித்துள்ளது.
பிபிசி நாசர் வைத்தியசாலையின் நிலைமை பற்றி பல வாரங்களாக ஆராய்ந்து டாக்டர்கள், தாதியர், மருந்தகர்களிடம் தகவல்களைச் சேகரித்துள்ளது. அதனடிப்படையில் நாசர் வைத்தியசாலையின் வைத்திய சேவையாளர்கள் இஸ்ரேலினால் தடுத்து வைக்கப்பட்டுள்ளனர். அவர்களது பெயர் விபரங்களும் வழங்கப்பட்டுள்ளன.
தடுத்து வைக்கப்பட்டிருந்தவர்களில் 3 வைத்தியர்கள் விடுவிக்கப்பட்டனர். அவர்களில் டாக்டர் அபுசபாவும் ஒருவராவார்.
இஸ்ரேல் படையினர் வைத்தியசாலை கட்டிடத்தை விட்டும் வெளியேறக் கூடாது என உத்தரவு பிறப்பித்துள்ளனர். இதனால் டாக்டர்கள் உத்தரவினை மீறினால் தாம் துப்பாக்கி சூட்டுக்கு ஆளாகலாம் என அச்சத்திலுள்ளனர் என அல் நாசர் வைத்தியசாலையில் கடமையாற்றிய டாக்டர் ஹாத்திம் ரபா தெரிவித்துள்ளார். பிபிசிக்கு தொலைபேசியூடாக இத்தகவலை அவர் வழங்கியுள்ளார்.
‘மக்கள் தாகத்தினால் இறக்கிறார்கள். நான் எனது தோளில் மூன்று கலன் தண்ணீரை சுமந்து சென்று மக்களுக்கு வழங்கினேன். வேறு என்னதான் என்னால் செய்ய முடியும்’ என்றும் அவர் தெரிவித்துள்ளார்.
அல் நாசர் வைத்தியசாலையை இஸ்ரேல் ஆக்கிரமிப்புக்குள்ளாக்கிய போது பலியான நோயாளிகளின் உடல்களை அகற்றுவதற்கோ அடக்கம் செய்வதற்கோ இஸ்ரேல் பாதுகாப்பு படை அனுமதி வழங்கவில்லை. இதனால் சடலங்கள் வைத்தியசாலையில் பணிபுரிபவர்கள் மற்றும் நோயாளிகள் மத்தியில் கிடந்தன என்றும் அவர் பிபிசிக்குக் கூறியுள்ளார்.
கொடூரமான குற்றங்களை முடிவுக்கு கொண்டு வாருங்கள்
ஐந்து மாதங்களுக்கும் மேலாக இஸ்ரேல் காஸா மீது போர் என்ற பெயரில் புரிந்து வரும் கொடூரமான குற்றங்களை முடிவுக்கு கொண்டு வருமாறு சவூதி அரேபிய மன்னர் சல்மான் அறைகூவல் விடுத்துள்ளார். இந்த அழைப்பு சவூதி மன்னர் சல்மானின் ரமழான் வாழ்த்துச் செய்தி ஊடாக விடுவிக்கப்பட்டுள்ளது.
இஸ்ரேலினால் முற்றுகையிடப்பட்டுள்ள காஸாவில் நடக்கும் போர் புனித மாதமான நோன்பு மற்றும் பிரார்த்தனைகள் மீது ஓர் நிழலை ஏற்படுத்தும் என்னும் தெரிவித்துள்ளார்.
இந்த வருடம் புனித ரமழானை வரவேற்கும் நாம் காஸாவில் தொடர்ச்சியான தாக்குதல்கள் ஆக்கிரமிப்புகளை எதிர்கொள்ளும் பலஸ்தீன சகோதரர்களின் துன்பங்களுக்காக கவலையுறுகிறோம். இதயம் துக்கத்தினால் கனக்கிறோம் எனவும் தெரிவித்துள்ளார்.- Vidivelli