முஸ்லிம் தனியார் சட்ட விவகாரம்: நியாயமான திருத்தமே மேற்கொள்ள வேண்டும்
ஒன்றுபடுவோம் என்கிறது உலமா சபை
(ஏ.ஆர்.ஏ.பரீல்)
கருத்து முரண்பாடு இல்லாத எல்லோரும் உடன்பட்ட காதி முகாமை முறையில் நியாயமான திருத்தங்கள் வரவேண்டும்.
இத்திருத்தங்களை நாம் அனைவரும் சேர்ந்து மேற்கொள்ள வேண்டும்.
முரண்பாடான விடயங்களில் உலமாக்களின் கருத்தையும் சமூகத்தினது கருத்தையும் பெற்று ஒட்டுமொத்த கருத்தோடு உலமா சபை பயணிக்க இருக்கிறது என அகில இலங்கை ஜம்இய்யத்துல் உலமா சபையின் பொதுச் செயலாளர் அஷ்ஷெய்க் அர்கம் நூராமித் விடிவெள்ளிக்குத் தெரிவித்தார்.
முஸ்லிம் விவாக, விவாகரத்துச் சட்டத்தில் மேற்கொள்ளப்பட வேண்டிய திருத்தங்கள் தொடர்பில் தமது நிலைப்பாட்டினை விளக்குகையிலே அவர் இவ்வாறு கூறினார்.
ஸ்ரீலங்கா முஸ்லிம் கவுன்ஸில் மற்றும் அகில இலங்கை ஜம்இய்யத்துல் உலமா சபைக்கிடையில் இடம்பெற்ற கலந்துரையாடல் தொடர்பில் உலமா சபை அறிக்கையொன்றினையும் வெளியிட்டுள்ளது.
அறிக்கையில் தெரிவிக்கப்பட்டுள்ளதாவது, ‘முஸ்லிம் விவாக, விவாகரத்து சட்டம் தொடர்பில் தமது நிலைப்பாடு எதுவாக இருப்பினும் அகில இலங்கை ஜம்இய்யத்துல் உலமா மற்றும் ஏனைய முஸ்லிம் சிவில் சமூக அமைப்புகளால் ஏகோபித்து தீர்மானிக்கப்பட்ட முன்மொழிவுகளுக்கு தாங்கள் உறுதுணையாக நிற்பதோடு சமூகத்தின் நலன் மற்றும் கருத்தொருமைப்பாட்டை கருத்தில் கொண்டு இத்திருத்தம் தொடர்பாக எட்டப்படும் ஏகோபித்த முடிவுகளுக்கு கூட்டிணைவோடும் புரிந்துணர்வோடும் செயற்படுவதாக முஸ்லிம் கவுன்ஸில் உறுதியளித்தது என்று தெரிவிக்கப்பட்டுள்ளது.
குறிப்பிட்ட கலந்துரையாடலில் உலமா சபையின் பதில் தலைவர் அஷ்ஷெய்க் ஐ.எல்.எம்.ஹாசிம் ஸுரி, பொதுச் செயலாளர் அஷ்ஷெய்க் அர்கம் நூராமித், பொருளாளர் கலாநிதி ஏ.ஏ.அஸ்வர், உபசெயலாளர் அஷ்ஷெய்க் எம்.எஸ்.எம்.தாஸிம், நிறைவேற்றுக் குழு உறுப்பினர்கள் அஷ்ஷெய்க் எம்.எச்.எம்.புர்ஹான், அஷ்ஷெய்க் எஸ்.எல். நவ்பர், அஷ்ஷெய்க் எம்.எஸ்.எம்.நாளிம், அஷ்ஷெய்க் ரிபாஹ் ஹஸன், அஷ்ஷெய்க் எம்.என்.எம்.ஸைபுல்லாஹ் என்போரும் முஸ்லிம் கவுன்ஸில் சார்பில் அதன் தலைவர் என்.எம்.அமீன், செயலாளர் எம்.டீ.எம்.ரிஸ்வி, முப்தி ஹாஷிம், டாக்டர் மரீனா தாஹா ரிபாய் ஆகியோரும் கலந்து கொண்டிருந்தனர்.- Vidivelli