ஏ.ஆர்.ஏ.பரீல்
“எங்களது கல்லூரியின் மின் இணைப்பு துண்டிக்கப்பட்ட செய்தியறிந்து உம்மா தொலைபேசியூடாக தொடர்பு கொண்டு துயரம் மேலிட்டு அழுதார். உம்மாவின் அழுகை என்னையும் அழ வைத்துவிட்டது. யா அல்லாஹ் எங்களுக்கு ஏன் இந்தச் சோதனை? நாங்கள் யாருக்கு குற்றம் செய்தோம்? என்று நானும் கதறியழுதேன்.’’
மஹரகம கபூரியா அரபுக்கல்லூரியின் க.பொ.த சாதாரண தரத்தில் பயிலும் மாணவர் ஒருவரைச் சந்தித்து கல்லூரியின் மின்துண்டிப்பு தொடர்பில் வினவியபோது அவர் இவ்வாறு தனது ஆதங்கத்தை வெளிப்படுத்தினார்.
அம்மாணவர் தொடர்ந்தும் தனதும் சக மாணவர்களினதும் நிலைமையினை விளக்கினார். “கல்லூரியில் மின் துண்டிக்கப்பட்டதால் நாங்கள் பல சிரமங்களை எதிர்கொண்டோம். சில வேளை எங்களுக்கு குடிப்பதற்குக்கூட போதிய நீர் இருக்கவில்லை. மின் துண்டிப்பு காரணமாக நீர் விநியோகமும் தடைப்பட்டது. கல்லூரியில் பரீட்சை நடந்து கொண்டிருந்ததால் நாங்கள் இரவு வேளையில் பாடங்களை மீட்க முடியாது பல சிரமங்களை எதிர்கொண்டோம். இரவில் தூக்கம் வரவில்லை. விடுதிக்குள் மின்விசிறிகள் இயங்காமையினால் வெப்பமாக இருந்தது. நுளம்புகளும் தொல்லை தந்தன. பாடங்களை மீட்டிக்கொள்ள வாய்ப்பு கிடைக்காமையினால் எங்களுக்கு பரீட்சைக்கு ஒழுங்காக முகம் கொடுக்க முடியாமற்போனது.
எங்களது நிலைமையையறிந்து உம்மா தொலைபேசியூடாக அழுதமை என்னை மீளா கவலையில் ஆழ்த்தியுள்ளது’’ என்றார்.
கல்லூரியில் பயிலும் கல்விப்பொதுத்தாராதர உயர்தர மாணவர் ஒருவர் விளக்கமளிக்கையில் “நான் கபூரியாவில் உயர்தர வகுப்பில் படிக்கிறேன். 5ஆம் வருட மாணவன். பரீட்சை நடந்து கொண்டிருந்த சந்தர்ப்பத்திலே கல்லூரிக்கான மின்சாரம் கல்லூரியின் நம்பிக்கைப் பொறுப்பாளர்களின் கோரிக்கைக்கு இணங்க மின்சாரம் வழங்கும் நிறுவனத்தினால் துண்டிக்கப்பட்டது.இப்போது பரீட்சை முடிந்து விட்டது. பல சவால்களுக்கு மத்தியில் பரீட்சையை எதிர்கொண்டோம். படித்தவைகளை மீட்டிப்பார்க்கக் கிடைக்கவில்லை. இருளுக்குள் ஒருவரை ஒருவர் பார்க்க முடியாதவாறு முடங்கிக்கிடக்க வேண்டிய நிலைமை ஏற்பட்டது.
வழமையாக மாணவர்கள் படித்து விட்டு இரவு 10 மணிக்கே நித்திரைக்குச் செல்வோம். அதிகாலை 4 மணிக்கு எழுந்து தஹஜ்ஜத் தொழுகையில் ஈடுபடுவோம்.இந்த மின்துண்டிப்பு எங்கள் அனைத்து செயற்பாடுகளையும் துண்டித்து விட்டது.
பரீட்சைக்குக் படிக்க கிடைக்கவில்லை.மின் துண்டிப்பு காரணமாக நீர்விநியோகமும் தடைப்பட்டது. இதனால் எங்களுக்கு குடிப்பதற்கும் தண்ணீர் கிடைக்கவில்லை. நான் நான்கு நாட்கள் குளிக்கவில்லை. விடுதிக்குள் வெப்பம் காரணமாக தூங்க முடியாமற் போனது. நுளம்பு தொல்லையினால் அவதிப்பட்டோம். பகலில் விடுதிக்குள் வெப்பம் காரணமாக தங்கியிருக்க முடியாத நிலைமை ஏற்பட்டது.
சில சந்தர்ப்பங்களில் அதிபர் மெழுகுவர்த்தி வாங்கித்தந்தார். விடுதியொன்றிலிருந்து அடுத்த விடுதிக்குச் செல்வதற்கு எம்மிடமிருந்த ஒரிரு டோர்ச்லைட்களைப் பயன்படுத்தினோம். கல்லூரியில் ஒரு விடுதி மேற்பார்வையாளர் உட்பட உஸ்தாத்மார் ஐவர் இருக்கிறார்கள். அவர்களும் பல்வேறு சிரமங்களை எதிர்கொண்டார்கள். எங்களது நிலைமை குறித்து கல்லூரியின் நம்பிக்கைப் பொறுப்பாளர்கள் எவ்வித கரிசனையும் கொள்ளவில்லை. எனது வாப்பா ஒரு மெளலவி. உம்மா எனது நிலைமையறிந்து துன்பத்தில் இருக்கிறார். அழுது கொண்டிருக்கிறார். வாப்பா பொறுமை காக்கும்படி கூறுகிறார்.
மின்துண்டிப்பு காரணமாக நீர்விநியோகமும் தடைப்பட்டதால் விடுதியில் சாப்பாடும் உரிய நேரத்தில் கிடைப்பதில்லை. தாமதமாகவே கிடைக்கிறது என்றார்.
கபூரியா அரபுக்கல்லூரியின்
மின்விநியோகம் துண்டிப்பு
92 வருடகால வரலாற்றினைக் கொண்டுள்ள மஹரகம கபூரியா அரபுக்கல்லூரிக்கான மின்விநியோகம் கடந்த 3 ஆம் திகதி வெள்ளிக்கிழமை மாலை மூன்று மணிக்கு மின்விநியோக நிறுவனத்தினால் (LECO) துண்டிக்கப்பட்டது. இவ்விடயத்தில் விசேட அம்சம் என்னவென்றால் அரபுக்கல்லூரியை நிர்வகிக்கும் நம்பிக்கைப் பொறுப்பாளர் சபையே மின்விநியோகத்தை துண்டிக்குமாறு மின்விநியோக நிறுவனத்தைக் கோரியுள்ளமையாகும்.
வக்பு சொத்தான கபூரியா அரபுக்கல்லூரியை நம்பிக்கைப் பொறுப்பாளர் சபை கையகப்படுத்திக் கொள்வதன் ஆரம்பக்கட்ட முயற்சியே இது எனக் கூறப்படுகிறது.
கடந்த 3 ஆம் திகதி வெள்ளிக்கிழமை மாலை 3 மணியளவில் மின்சாரம் துண்டிக்கப்பட்டபோது இது வழமையாக இடம்பெறும் மின்விநியோகத்தடை என கல்லூரி அதிபரும் மாணவர்களும் எண்ணினார்கள். ஆனால் மின்விநியோகம் நீண்ட நேரம் வழங்கப்படாமையினால் கல்லூரியின் பழைய மாணவர் சங்கத்தின் செயலாளர் ஐ.எல்.டில்சாத் நுகேகொடை மின்விநியோக நிறுவன (LECO) காரியாலயத்தைத் தொடர்பு கொண்டு வினவினார். கல்லூரியின் நம்பிக்கை பொறுப்பாளர் சபையின் எழுத்துமூல கோரிக்கைக்கு அமையவே மின்துண்டிக்கப்பட்டதாக நிறுவனம் உறுதி செய்துள்ளது.
இதனையடுத்து மறுதினம் சனிக்கிழமை 4 ஆம் திகதி மேல் மாகாண ஆளுநர் அசாத்சாலி தலையிட்டு அன்று காலை 10 மணி முதல் மின் விநியோகத்தைப் பெற்றுகொடுத்துள்ளார். மின்விநியோக நிறுவனம் மனிதாபிமான ரீதியிலே மின்விநியோகத்தை தற்காலிகமாக வழங்குவதாக தெரிவித்தது. அத்தோடு இவ்விவகாரம் தொடர்பில் கல்லூரி நம்பிக்கைப் பொறுப்பாளர் சபையுடன் கதைத்து இறுதி தீர்மானம் ஒன்றினை பெற்றுக் கொள்ளும்படியும் இல்லையேல் கடந்த 7 ஆம் திகதி முதல் மீண்டும் மின்விநியோகம் துண்டிக்கப்படுமெனவும் தெரிவித்தது. இந்நிலையில் கடந்த 7 ஆம் திகதி செவ்வாக்கிழமை மாலை 7 மணிக்கு மின்சாரம் மீண்டும் துண்டிக்கப்பட்டது.
இந்நிலையில் கல்லூரியின் பழைய மாணவர் சங்கம் மின் இணைப்பினை ஏற்படுத்துவதற்காக ஜெனரேட்டர் ஒன்றினை ஏற்பாடு செய்தது. என்றாலும் கல்லூரி பாதுகாவல் பிரிவினர் ஜெனரேட்டரை கல்லூரிக்குள் எடுத்துச் செல்வதற்கு தடை விதித்தனர். பாதுகாவல் பிரிவினரின் தடையையும் மீறி ஜெனரேட்டர் மாணவர்களால் கல்லூரி வளாகத்தினுள் எடுத்துச் செல்லப்பட்டது.
கல்லூரி பாதுகாவல் பிரிவினர் இது தொடர்பில் பொலிஸாருக்கு அறிவித்ததையடுத்து பொலிஸார் கல்லூரிக்கு வருகை தந்து தடுத்த போதும் அவர்களால் நிலைமையை சமாளிக்க முடியாமற் போனது.பொலிஸார் திரும்பிச் சென்றனர்.
முஸ்லிம் கவுன்ஸிலின் அவசர கூட்டம்
கபூரியா உட்பட நாட்டின் பல பகுதிகளிலும் வக்பு சொத்துக்கள் சவாலுக்குட்படுத்தப்பட்டு வரும் நிலையில் வக்பு சொத்துக்கள் தொடர்பில் கலந்துரையாடுவதற்கு ஸ்ரீலங்கா முஸ்லிம் கவுன்ஸில் அவசர கூட்டமொன்றினை ஏற்பாடு செய்திருந்தது. ஸ்ரீலங்கா முஸ்லிம் கவுன்ஸில் தலைவர் என்.எம்.அமீன் தலைமையில் அக்கூட்டம் நடந்தது.
இக்கூட்டத்தில் கபூரியா அரபுக்கல்லூரிக்கு நேர்ந்துள்ள நிலைமை மற்றும் மின் துண்டிப்பு தொடர்பில் கலந்துரையாடப்பட்டது. வக்பு சொத்துக்கள் ஒவ்வொன்றாக அழிக்கப்பட்டு வருகின்றமை தொடர்பில் கவலை வெளியிடப்பட்டது.
மாகொல முஸ்லிம் அநாதை இல்லத்துக்கு உருவாகியுள்ள நிலைமை மற்றும் கல்எலிய முஸ்லிம் பெண்கள் கல்லூரிக்கு ஏற்பட்டுள்ள சவால்கள் தொடர்பில் கலந்துரையாடப்பட்டன. இவற்றுக்கு எதிராக நடவடிக்கைகள் முன்னெடுப்பதற்குத் தீர்மானிக்கப்பட்டது.
வக்பு நியாய சபையின் உத்தரவு
கபூரியா அரபுக்கல்லூரியின் வக்பு சொத்து தொடர்பான வழக்கு கடந்த சனிக்கிழமை இடம்பெற்றது. இச்சந்தர்ப்பத்தில் கபூரியா அரபுக்கல்லூரியின் மின்துண்டிப்பு தொடர்பான விசேட பிரேரணையொன்று முன்வைக்கப்பட்டது. பிரேரணையை செவிமடுத்த வக்பு நியாயசபையின் நீதிபதி அப்துல் மஜீத் கல்லூரிக்கான மின் விநியோகத்தை உடனடியாக வழங்குமாறு மின்விநியோக நிறுவனத்துக்கு எழுத்து மூலம் அறிவித்தல் வழங்குமாறு வக்பு நியாயசபை செயலாளருக்கு உத்தரவு பிறப்பித்தார்.
அத்தோடு கல்லூரி நம்பிக்கை பொறுப்பாளர் சபை உறுப்பினர்களை எதிர்வரும் நியாயசபை அமர்வில் ஆஜராகுமாறு அழைப்பாணை அனுப்பி வைக்குமாறும் செயலாளருக்கு ஆணையிட்டார்.
வக்பு நியாய சபையின் உத்தரவுக்கமைய மின்விநியோக நிறுவனம் (LECO) கடந்த 13 ஆம் திகதி திங்கட்கிழமை கல்லூரிக்கான மின் இணைப்பினை மீண்டும் வழங்கியுள்ளது.
வக்பு சட்டம்
நாட்டில் பெரும் எண்ணிக்கையிலா வக்பு சொத்துக்கள் சவால்களுக்குள்ளாகியுள்ளன. எதிர்கால சந்ததியினரான மாணவர்களையே கல்லூரியிலிருந்து வெளியேற்றும் அளவுக்கு வக்பு சொத்துக்கள் சட்ட வலுவினை இழந்துள்ளன. எனவே முஸ்லிம் விவாக விவாகரத்து சட்டத்தில் திருத்தங்களை மேற்கொள்வது போன்று வக்பு சட்டத்திலும் திருத்தங்கள் மேற்கொள்ளப்பட்டு அச்சட்டம் மேலும் வலுவானதாக மாற்றப்படவேண்டும். – Vidivelli