இலங்கையில் பொருளாதார நெருக்கடிகள் காரணமாக 6 மில்லியனுக்கும் அதிக மக்கள் உணவு பாதுகாப்பற்ற நிலையில் உள்ளதாக உலக உணவுத் திட்டம் தெரிவித்துள்ளமை கவனிப்புக்குரியதாகும்.
அதாவது சுமார் 30 சதவீத மக்கள் – தற்போது உணவுப் பாதுகாப்பற்ற நிலையில் உள்ளனர். அவர்களுக்கு மனிதாபிமான உதவி தேவைப்படுகிறது. குறைவடைந்துள்ள உள்நாட்டு விவசாய உற்பத்தி, அந்நியச் செலாவணி இருப்பு பற்றாக்குறை மற்றும் ரூபாவின் பெறுமதியில் ஏற்பட்டுள்ள வீழ்ச்சி ஆகியவை உணவுப் பற்றாக்குறை மற்றும் வாழ்க்கைச் செலவில் அதிகரிப்பை ஏற்படுத்தியுள்ளன. இது மக்களின் ஆரோக்கியமான மற்றும் அதிக உணவுக்கான அணுகலைக் கட்டுப்படுத்துகிறது. பொருளாதார நெருக்கடியானது குடும்பங்களை பசி மற்றும் வறுமையில் தள்ளியுள்ளது. சிலர் முதல் முறையாக வறுமைக் கோட்டிற்குக் கீழ் உள்ளடங்கியுள்ளனர். உலக வங்கி மதிப்பீடுகளுக்கமைய இது சுமார் அரை மில்லியன் மக்களைக் உள்ளடக்கியதாகக் காணப்படுகிறது.
உலக சுகாதார ஸ்தாபனத்தின் சமீபத்திய மதிப்பீட்டின்படி, 86 சதவீத குடும்பங்கள் மலிவான, குறைவான சத்துள்ள உணவை வாங்குகின்றனர், குறைவாக சாப்பிடுகின்றனர் மற்றும் சில சமயங்களில் உணவை முற்றிலுமாக தவிர்த்து வருகின்றனர். பொருளாதார நெருக்கடி மற்றும் தொற்றுநோய்க்கு முன்னர், இலங்கை முழுவதும் ஊட்டச்சத்து குறைபாடு விகிதம் ஏற்கனவே அதிகமாக இருந்தது.
கொவிட்-19 தொற்றுநோய்க்கு முன்னர், மற்ற நடுத்தர வருமான நாடுகளை விட இலங்கைப் பெண்களும் குழந்தைகளும் ஊட்டச்சத்து குறைபாட்டால் மிகவும் அதிகமாக பாதிக்கப்பட்டுள்ளனர். 5 வயதிற்குட்பட்ட குழந்தைகளில் 17 சதவீதமானோர் வளர்ச்சி குன்றியதால் மிகவும் குட்டையாக இருந்தனர் மற்றும் 15 சதவீதமானோர் உயரத்துடன் ஒப்பிடும் போது மிகவும் உடல் மெலிவாகக் காணப்பட்டனர். தற்போதைய பொருளாதார நெருக்கடி இதை மேலும் மோசமாக்கும் என்றும் உலக உணவுத் திட்டம் சுட்டிக்காட்டியுள்ளது.
இதனிடையே கடந்த இரண்டு மாதங்களில் கொழும்பு லேடி ரிட்ஜ்வே சிறுவர் வைத்தியசாலையில் அனுமதிக்கப்பட்ட குழந்தைகளில் பெரும்பாலானோர் போஷாக்கின்மையால் பாதிக்கப்பட்டுள்ளதாக வைத்தியசாலையினால் மேற்கொள்ளப்பட்ட கணக்கெடுப்பில் தெரியவந்துள்ளது. குழந்தைகளுக்கு சத்தான உணவு கிடைக்காமையே இதற்குக் காரணம் என்றும் தெரியவந்துள்ளது.
கடந்த வருடம் வைத்தியசாலையில் அனுமதிக்கப்பட்ட குழந்தைகளில் சுமார் 100 பேர் நீரிழிவு நோயினால் பாதிக்கப்பட்டுள்ளதாகவும் மேலும் 900 சிறுவர்கள் புற்றுநோயால் பாதிக்கப்பட்டுள்ளதாகவும் வைத்தியசாலையின் சிறுவர் சிகிச்சை நிபுணர் வைத்தியர் தீபால் பெரேரா தெரிவித்திருக்கிறார்.
மேலும், கடந்த இரண்டு, மூன்று ஆண்டுகளாக பாடசாலைகள் மூடப்பட்டதால், சரியான சத்தான உணவு கிடைக்காததுடன், குழந்தைகளின் உள ஆரோக்கியமும் வெகுவாக பாதிக்கப்பட்டுள்ளது. சிறார்களை இந்த போசாக்கின்மை நிலையிலிருந்து காப்பாற்றாவிட்டால் எதிர்காலத்தில் அவர்களின் மூளை வளர்ச்சி குறைந்து அவர்களின் புத்திசாலித்தனம் குறையும் அபாயம் உள்ளது எனவும் அவர் தெரிவித்துள்ளார்.
பொருளாதார நெருக்கடிமிக்க இக் காலப்பகுதியில் வறுமைக் கோட்டுக்குட்பட்ட பிள்ளைகள் பாடசாலைகளில் வழங்கப்படும் மதிய உணவுகளையே நம்பியுள்ளனர். எனினும் தற்போது 60 ரூபா பெறுமதியான உணவே வழங்கப்படுகிறது. ஒரு முட்டையின் விலையே 60 ரூபாவை விட அதிகமாகவுள்ள இன்றைய நிலையில், இத் தொகைக்குள் எவ்வாறு மாணவர்களுக்கு ஊட்டச்சத்துணவு கொண்ட உணவு வழங்கப்படும் என்பது கேள்விக்குறியே. எனவே இத் தொகையை அதிகரிக்க கல்வியமைச்சு நடவடிக்கை எடுக்க வேண்டும்.
பாடசாலை மாணவர்களுக்கு செலவிடப்படும் பகல் உணவுக்கான 60 ரூபாவை 150 ரூபா வரை அதிகரிப்பதற்கு அரசாங்கம் கவனம் செலுத்தி வருவதாக கல்வியமைச்சருமான சுசில் பிரேமஜயந்த நேற்று சபையில் தெரிவித்திருக்கிறார். இதனை உடனடியாக நடைமுறைப்படுத்த முன்வர வேண்டும்.
அத்துடன் நாடளாவிய ரீதியில் போசாக்கின்மையால் பாதிக்கப்பட்டுள்ள சுமார் 6 மில்லியன் மக்களுக்கான விசேட நிவாரண வேலைத்திட்டத்தை அரசாங்கம் நடைமுறைப்படுத்த வேண்டும். இதற்கான கோரிக்கையை சர்வதேச உதவி அமைப்புகளிடம் முன்வைக்க வேண்டும். இன்றேல் போசாக்கின்மையால் பாதிக்கப்பட்ட எதிர்கால சமூகம் ஒன்றை உருவாக்கவே இன்றைய நெருக்கடி நிலைமை வழிவகுக்கும்.- Vidivelli