ஏ.ஆர்.ஏ.பரீல்
எமது நாட்டில் அமுலிலுள்ள1951 ஆம் ஆண்டின் முஸ்லிம் விவாக விவாகரத்துச் சட்டத்தில்(MMDA) அரசாங்கத்தினால் மேற்கொள்ளப்படவுள்ள திருத்தங்கள் முஸ்லிம் சமூகத்தின் மத்தியில் சர்ச்சையைக் கிளப்பியுள்ளன. சமூகத்தின் பல தரப்புகளிலிருந்தும் எதிர்ப்புகள் கிளம்பியுள்ளன.
முஸ்லிம் விவாக விவாகரத்துச் சட்டத் தின் பல முக்கிய விடயங்களை அமைச்சரவை ஏற்கனவே தீர்மானித்து விட்டதன் பின்பு நீதியமைச்சர் அலிசப்ரி இச்சட்டத்தில் திருத்தங்களை மேற்கொள்வதற்கு ஆலோசனை வழங்குவதற்காக நியமிக்கப்பட்ட 10 பேர் கொண்ட ஆலோசனை குழு வெறும் ஒரு கண் துடைப்பென்றே சமூகம் கருதுகிறது.
முஸ்லிம் தனியார் சட்டம்
முஸ்லிம் தனியார் சட்டம் என்றழைக்கப்படும் முஸ்லிம் விவாக, விவாகரத்துச் சட்டம் இலங்கை முஸ்லிம்களுக்கென்று 17 ஆம் நூற்றாண்டில் இந்தோனேசியாவில் இருந்து கொண்டுவரப்பட்டது. பின்பு அச்சட்டம் 1806 ஆம் ஆண்டு முகம்மதியன் கோவையாக வடிவமைக்கப்பட்டது. பின்பு எம்.ரி. அக்பர் தலைமையில் நியமிக்கப்பட்ட ஒரு குழுவினால் 1929 ஆம் ஆண்டு முஸ்லிம் விவாக விவாகரத்துச் சட்டமாக மாற்றப்பட்டு அங்கீகரிக்கப்பட்டது. 1951 ஆண்டு இச்சட்டம் 13 ஆம் இலக்க சட்டமாக மாற்றம் பெற்றது.
இச்சட்டத்தில் 1975 ஆம் ஆண்டு வரை திருத்தங்கள் மேற்கொள்ளப்பட்டன. என்றாலும் அதன் பின்னரும் திருத்தங்கள் மேற்கொள்வதற்கு முயற்சிக்கப்பட்டாலும் அவை வெற்றியளிக்கவில்லை.
2009 ஆம் ஆண்டு அப்போதைய நீதியமைச்சர் மிலிந்த மொரகொடவினால் முன்னாள் நீதியரசர் சலீம் மர்சூபின் தலைமையில் முஸ்லிம் விவாக, விவாகரத்துச் சட்டத்தில் திருத்தங்களை செய்வதற்காக குழுவொன்று நியமிக்கப்பட்டது. இக்குழு 9 வருடங்களாக ஆராய்ந்து மேற்கொள்ளப்படவேண்டிய திருத்தங்கள் தொடர்பான சிபாரிசு அறிக்கை 2018 ஆம் ஆண்டு அப்போதைய நீதியமைச்சர் தலதா அத்துகோரளவிடம் கையளிக்கப்பட்டது. இத் திருத்தங்களுக்கு முஸ்லிம் பாராளுமன்ற உறுப்பினர்களும் அங்கீகாரம் வழங்கினார்கள். திருத்தங்களுக்கான வரைபும் தயாரிக்கப்பட்டது. என்றாலும் கடந்த நல்லாட்சி அரசாங்கத்தின் பதவிக்காலத்தில் இப்பணியினை நிறைவு செய்ய முடியாமற்போனது. கடந்த பொதுத்தேர்தலில் பொது ஜன பெரமுன கட்சியே ஆட்சியைக் கைப்பற்றியது. அலிசப்ரி நீதியமைச்சராக நியமனம் பெற்றார்.
பெரும்பான்மை அடிப்படைவாதிகளும் தீவிரமதக் கொள்கைகளைக் கொண்டுள்ள ஒரு சில பெளத்த குருமாரும் முஸ்லிம் தனியார் சட்டத்தை நீக்க வேண்டும். அனைத்து இனத்தினரும் ஒரே சட்டத்தின் கீழ் ஆளப்படவேண்டும் என தொடராக குரல்கொடுத்து வந்தனர். இச்சட்டத்தை நீக்குவதற்கு பாராளுமன்ற உறுப்பினர் அத்துரலியே ரதன தேரர் தனிநபர் பிரேரணையொன்றினையும் முன்வைத்தார். இவ்வாறு இச்சட்டம் பல சவால்களை தொடராக எதிர்கொண்டு வந்துள்ளது.
ஆணைக்குழு நியமனம்
இவ்வாறான சவால்களுக்கு மத்தியில் முஸ்லிம் விவாவ, விவாகரத்து சட்டத்தில் திருத்தங்களை செய்வதற்கு ஆலோசனை வழங்குவதற்கு நீதியமைச்சர் அலி சப்ரி வக்பு சபையின் தலைவரான சட்டத்தரணி சப்ரி ஹலீம்தீன் தலைமையில் 10 உறுப்பினர்களைக் கொண்ட ஆலோசனைச் சபையொன்றினை நியமித்தார்.
இக்குழுவில் வக்பு சபையின் தலைவர், மற்றும் முன்னாள் தலைவர், முஸ்லிம் சமய பண்பாட்டலுவல்கள் திணைக்களத்தின் பணிப்பாளர், கொழும்பு பல்கலைக்கழக சட்டபீட விரிவுரையாளர், உலமா சபையின் பிரதிநிதிகள் மற்றும் சட்டத்தரணிகள், இரு பெண் சட்த்தரணிகள் அங்கம் பெற்றனர். ஆலோசனைக் குழுவின் உறுப்பினர்கள் சட்டத்தரணி சப்ரி ஹலீம்தீன் (தலைவர்), சட்டத்தரணி நாபிக் நாபாத், அஷ் ஷெய்க் ஏ.பி.எம். அஷ்ரப், சட்டத்தரணி எஸ்.எம்.எம். யாசின், சட்டத்தரணி எம்.ஏ.எம்.ஹக்கீம், சட்டத்தரணி எர்மிஸா தீகல், சட்டத்தரணி ருஷ்தி ஹபீப், சட்டத்தரணி சபானா குல்பேகம், அஷ்ஷெய்க் எம்.அர்கம் நூராமித், அஷ்ஷெய்க் முஈஸ் புகாரி ஆகியோராவர்.
அமைச்சரவையின் தீர்மானம்
இச்சட்டத்தில் திருத்தங்களை மேற்கொள்வதற்கு ஆலோசனை வழங்குவதற்கு முன்பு அமைச்சரவை ஏற்கனவே சில தீர்மானங்களை மேற்கொண்டிருந்தமை குறிப்பிடத்தக்கது. இத்தீர்மானங்கள் ஆலோசனைக் குழுவிற்கு அறிவிக்கப்பட்டது. தீர்மானங்கள் மேற்கொள்ளப்பட்ட விடயங்கள் தவிர ஏனைய விடயங்கள் தொடர்பிலே நீதியமைச்சரினால் ஆலோசனை கோரப்பட்டது.
முஸ்லிம் பெண்களின் திருமண வயது 18 ஆக அதிகரிக்கப்படவேண்டும். திருமணத்துக்கு மணமகளின் சம்மதமும் கையொப்பமும் பெற்றுக்கொள்ளப்பட வேண்டும், பெண்கள் காதிகளாக நியமிக்கப்படவேண்டும் என அமைச்சரவை தீர்மானித்துள்ளதாக குழு 2020.12.31 ஆம் திகதி நியமிக்கப்பட்டபோதே தெரிவிக்கப்பட்டது.
அத்தோடு காதிநீதிமன்ற முறைமை ஒழிக்கப்பட வேண்டும். முஸ்லிம் ஆண்களின் பலதாரமணம் தடை செய்யப்படவேண்டுமென 2021.03.08 ஆம் திகதிய அமைச்சரவையில் தீர்மானம் நிறைவேற்றப்பட்டுள்ளதாக 2021.04.29 ஆம் திகதி ஆலோசனைக்குழுவுக்கு அறிவிக்கப்பட்டது.
காதிநீதிமன்ற முறைமையை இல்லாதொழிக்க வேண்டாம்
ஆலோசனைக்குழு தனது ஆலோசனைகள் அடங்கிய அறிக்கையை அண்மையில் நீதியமைச்சரிடம் கையளித்தது. காதிநீதிமன்ற முறைமையை இல்லாதொழிக்க வேண்டாம். அதன் கட்டமைப்பை மேம்படுத்துங்கள், அது தொடர்பில் கவனம் செலுத்துங்கள் என்று ஆலோசனைக் குழு அமைச்சரவைக்கு பரிந்துரைகளை வழங்கியுள்ளது.
அமைச்சரவை காதி நீதிமன்ற முறைமையை இல்லாதொழிக்க வேண்டும் என ஏற்கனவே தீர்மானம் நிறைவேற்றி அது தொடர்பில் ஆலோசனைகளை எதிர்பார்க்காத நிலையில் ஆலோசனைக்குழு இவ்வாறான சிபாரிசினை முன் வைத்திருப்பது பாராட்டத்தக்கதாகும். காதி நீதிபதிகள் மற்றும் அவர்களது தகைமைகள் தொடர்பில் குற்றச்சாட்டுகள் முன்வைக்கப்பட்டு வருவதால் இக்கட்டமைப்பினை மேம்படுத்துவதற்காக காதிநீதிபதிகளாக நியமிக்கப்படுவோர் சட்டத்தரணிகளாகவும், முஸ்லிம் விவாக விவாகரத்துச் சட்டம் தொடர்பில்அறிவுள்ள 5 வருட அனுபவம் கொண்ட சட்டத்தரணியாக இருக்கவேண்டுமெனவும் சிபாரிசு செய்துள்ளது. அவர்களது வயதெல்லை 25 வயதுக்கும் -55 வயதுக்கும் இடைப்பட்டதாக இருக்க வேண்டுமெனவும் குறிப்பிடப்பட்டுள்ளது.
காதிகள் மேன்முறையீட்டு சபைக்கு நியமனம் பெறும் உறுப்பினர்கள் 10 வருட அனுபவம் கொண்ட சட்டத்தரணியாகவும், முஸ்லிம் விவாக விவாகரத்துச் சட்டம் தொடர்பில் அறிவுள்ளவராகவும் 35வயதுக்கும் 65 வயதுக்கும் – இடைப்பட்டவராக இருக்க வேண்டுமென சிபாரிசு செய்துள்ளது.
காதிநீதிபதிகளுக்கு ஏனைய நீதிபதிகளுக்கு வழங்கப்படுவது போன்ற பயிற்சிகள் தொடராக வழங்கப்படவேண்டுமெனவும் ஆலோசனை வழங்கியுள்ளது. அத்தோடு ஏனைய நீதிபதிகளின் சம்பளம் காதிநீதிபதிகளுக்கும் வழங்கப்படவேண்டுமென ஆலோசனை வழங்கியுள்ளது.
அத்தோடு காதிநீதிமன்ற முறைமை இல்லாமலாக்கப்பட்டால் திருமணம் தொடர்பான விடயங்களுக்கு மாற்றுத் தீர்வாக குடும்ப நீதிமன்றம் நிறுவப்படவேண்டும். குடும்ப நீதிமன்றம் நிறுவப்படாத பட்சத்தில் மாவட்ட நீதிமன்றமே தீர்வாக அமைய வேண்டும் என ஆலோசனை வழங்கப்பட்டுள்ளது.
இலங்கை மக்களுக்கு மிகவும் அவசியமான தீர்வுகளை சீர்திருத்தங்கள் வழங்கும் என குழு ஆத்மார்த்தமாக நம்புகிறது. முன்மொழிவுகளை கவனத்தில் கொண்டு சமத்துவம் மற்றும் அனைத்தும் உள்ளடங்கிய முடிவொன்றினை மேற்கொள்ளுமாறும் ஆலோசனைக்குழு ஆலோசனை வழங்கியுள்ளது.
நீதியமைச்சர் அலி சப்ரி
முஸ்லிம் விவாக, விவாகரத்து சட்டம் தொடர்பிலான, அமைச்சரவையினால் மேற்கொள்ளப்பட்டுள்ள திருத்தங்கள் தொடர்பில் நீதியமைச்சர் அலிசப்ரி மீதே சமூகம் விரல் நீட்டுகிறது. பல நூற்றாண்டு காலமாக அமுலிலிருந்து வரும் முஸ்லிம் விவாக, விவாகரத்து சட்டத்தில் முக்கிய திருத்தங்களை அமைச்சரவையே மேற்கொண்டுள்ளது என்பது தெளிவாகிறது.
இதனை நீதியமைச்சர் அலி சப்ரியின் விளக்கம் உறுதி செய்கிறது. அவ்வாறெனின் நீதியமைச்சரின் ஆலோசனைகளைக் கூட பெற்றுக்கொள்ளாது முக்கிய திருத்தங்கள் நிறைவேற்றப்பட்டுள்ளன.
“முஸ்லிம் விவாக விவாகரத்து சட்ட சீர்திருத்தம் தொடர்பில் நான் அமைச்சரவைக்கு சில ஆலோசனைகளையே முன்வைத்தேன். அதில் முஸ்லிம் ஆண்கள் நான்கு திருமணம் செய்து கொள்ளவுள்ள உரிமை தடை செய்யப்படவேண்டுமென்றோ மற்றும் காதி நீதிமன்ற முறைமை ஒழிக்கப்படவேண்டுமென்றோ நான் வலியுறுத்தவில்லை. அத்தோடு இத்தகைய சிபாரிசுகளை முன்வைக்கவும் இல்லை. என்றாலும் அமைச்சரவை, நான் முஸ்லிம் விவாக விவாகரத்து சட்டதிருத்தம் தொடர்பில் ஆலோசனைகளை முன்வைத்தபோது பலதார மணத்தையும், காதி நீதிமன்ற முறைமையையும் தடை செய்ய வேண்டுமென தீர்மானித்தது” என நீதியமைச்சர் சட்டத்தரணி அலிசப்ரி விளக்கமளித்தார்.
மேலும் முஸ்லிம்களின் திருமண வயதெல்லை 18 ஆக அதிகரிக்கப்பட வேண்டும், திருமணத்தின்போது மணமகளின் சம்மதம் பெற்றுக்கொள்ளப்படவேண்டும். திருமணப் பதிவில் மணமகளின் கையொப்பமும் பெறப்படவேண்டும் என்றும் அமைச்சரவை தீர்மானித்துள்ளது. இதுவே அமைச்சரவையில் இடம்பெற்றது. அது அமைச்சரவையின் தீர்மானங்களாகும். இந்தத் தீர்மானங்களை அமைச்சரவை மாற்றிக்கொள்ளும் என்று நான் நம்பவில்லை என்று அவர் விளக்கமளித்தார்.
இதே வேளை நீதியமைச்சர் அலிசப்ரி கடந்த காலங்களில் ‘ஒரே நாடு ஒரே சட்டம்’ என்பதை பல இடங்களில் வலியுறுத்தியுள்ளார். ஊடகங்களுக்கு வழங்கியுள்ள நேர்காணல்களிலும் பகிரங்க நிகழ்வுகளிலும் இதனை உறுதிப்படுத்தியுள்ளார். ‘ஒரே சட்டம்’ என்ற கொள்கையின்கீழ் தனியார் சட்டங்கள் பாதுகாக்கப்படுமா என்ற சந்தேகம் நிலவுகிறது. அத்தோடு மிக விரைவில் ‘முஸ்லிம் விவாக விவாகரத்து சட்டம் உரிய திருத்தங்களுடன் நிறைவேற்றப்படவுள்ளது என அவர் கடந்த வருடம் தெரிவித்திருந்தார். முஸ்லிம் சமூகத்தின் ஏற்புடன் அவர்களுக்கு எவ்விதமான பாதிப்புகளும் ஏற்படாது, நிறைவேற்றப்படும் எனவும் அவர் அன்று கூறினார். ஆனால். இன்று அவர் சிபாரிசு செய்யாமலே ‘முஸ்லிம் விவாக விவாகரத்து சட்டத்தில் பாரதூரமான திருத்தங்களை அமைச்சரவை மேற்கொண்டுள்ளது. இது கவலைக்குரிய விடயமா-கும். காதிநீதிமன்ற முறையையே ஒழிப்பதற்கு பெரும்பான்மையின அமைச்சரவை தீர்மானித்திருக்கிறது.
நீதியமைச்சர்களின்உறுதிமொழிகள்
‘முஸ்லிம் விவாக விவாகரத்து சட்டத்தில் காலத்துக்கேற்ற திருத்தங்கள் மேற்கொள்ளப்படும் என எமது நாட்டில் பதவி வகித்த நீதியமைச்சர்கள் பல உறுதிமொழிகளை வழங்கினார்களேயன்றி அதற்கான முன்னெடுப்புகளை மேற்கொள்வதில் அவர்கள் அக்கறையின்றியே இருந்தார்கள். இவ்வரிசையில் நீதியமைச்சர்களாகப் பதவி வகித்த மிலிந்த மொரகொட, ரவூப் ஹக்கீம்,விஜயதாச ராஜபக்ஷ, தலதா அத்துகோரள, நிமல் சிறிபாலடி சில்வா ஆகியோரைக் குறிப்பிடலாம்.தற்போது நீதியமைச்சராகப் பதவி வகிப்பவரே ஜனாதிபதி சட்டத்தரணி அலிசப்ரி. இந்நிலையில் ‘ஒரே சட்டம்’ என்ற கொள்கையின் கீழ் முஸ்லிம் தனியார் சட்டம் சவாலுக்குள்ளாகியுள்ளதாகவே காணப்படுகிறது. இதனைக் காப்பாற்றிக்கொள்வதற்கு நீதியமைச்சரினால் முடியுமா என்பதனைப் பொறுத்திருந்துதான் பார்க்கவேண்டும்.
ஆலோசனை குழு உறுப்பினர்சட்டத்தரணி ருஷ்தி ஹபீப்
‘முஸ்லிம் விவாக விவாகரத்து சட்டத்தில் திருத்தங்களைச் செய்வதற்கான ஆலோசனைகளை வழங்குவதற்கு நீதியமைச்சரினால் நியமிக்கப்பட்ட ஆலோசனை குழுவிற்கு, இச்சட்டத்தின் பிரதான முக்கியமான விடயங்கள் ஏற்கனவே அமைச்சரவை உப குழுவினரால் தீர்மானிக்கப்பட்டுவிட்டதாக அறிவிக்கப்பட்டது. இத்தீர்மானத்தை அமைச்சரவையினால் எடுக்க முடியாது. முஸ்லிம் சமூகமே தீர்மானங்கள் மேற்கொள்ள வேண்டும். பிரதான விடயங்களைத்தவிர்த்து ஏனைய விடயங்களைத் தீர்மானிக்கும் படி வேண்டுவது பயனற்றது என நான் ஆலோசனைக் குழுவின் அமர்வுகளில் எனது கருத்தினைத் தெரிவித்து வாதிட்டிருக்கிறேன் என ஆலோசனைக் குழுவின் உறுப்பினர்களில் ஒருவரான சட்டத்தரணி ருஷ்தி ஹபீப் விடிவெள்ளியிடம் தெரிவித்தார்.அவர் மேலும் எம்மிடம் விளக்கமளிக்கையில் ‘ முஸ்லிம்களின் திருமண வயதெல்லை 18 ஆக அதிகரிக்கப்படவேண்டும். திருமணத்தின்போது மணமகளின் சம்மதமும் கையொப்பமும் பெற்றுக்கொள்ளப்பட வேண்டும். காதிநீதிமன்ற முறைமை ஒழிக்கப்பட வேண்டும். மற்றும் முஸ்லிம் ஆண்களின் பலதாரமணம் தடை செய்யப்படவேண்டும் என்ற அமைச்சரவை உபகுழுவின் தீர்மானங்கள் முஸ்லிம் விவாக விவாகரத்து சட்டத்தில் முக்கிய விடயங்களாகும். இவற்றைத் தவிர்த்து ஏனைய விடயங்களுக்கு மாத்திரம் ஆலோசனை வழங்குவது முழுமையான ம-றுசீரமைப்பாகாது.இக்குழுவுக்கு முழுமையான மறுசீரமைப்புக்கு அவகாசம் இருக்கவில்லை என்றும் கூறினார்.
முரண்பட்ட கருத்துகள்
ஆலோசனைக் குழுவின் அமர்வுகளின் போது அங்கத்தவர்கள் சில விடயங்களில் முரண்பட்டுக் கொண்டதாகவும் அறிய முடிகிறது. தற்போது அமுலிலுள்ள சட்டத்தில் ‘வொலி’ யின் பிரசன்னம் கட்டாயமாகும். என்றாலும் இவ்விடயம் தொடர்பில் முரண்பாடு ஏற்பட்டது. ‘வொலி’ யின் பிரசன்னம் அவசியமில்லை என இரு அங்கத்தவர்கள் முரண்பட்டதாகத் தெரிவிக்கப்பட்டது.
இதேவேளை ஆலோசனைக் குழுவின் உறுப்பினர் ஒருவர் குழுவின் 3 அமர்வுகளிலே கலந்து கொண்டிருந்ததாகவும் அதன்பின்பு அவர் குழுவிலிருந்தும் விலகிக் கொண்டதாகவும் அறிய முடிகிறது.
ஆலோசனைக் குழுவுக்கு முஸ்லிம் விவாக, விவாகரத்து சட்டத்தினது முழுமையான மறுசீரமைப்புக்கு அதிகாரம் வழங்கப்பட்டிருக்க வேண்டும். ஆனால் பிரதான விடயங்களை அமைச்சரவை உபகுழுவே தீர்மானித்திருந்தது என குறிப்பிட்ட உறுப்பினர் தெரிவித்தார். இந்நிலையில் அமைச்சரவை தீர்மானங்கள் சட்டத்துக்குள் உட்படுத்தப்படும் போது அதனை நீதிமன்றில் சவாலுக்குட்படுத்துவதற்கு தீர்மானித்திருப்பதால் அவர் அக்குழுவிலிருந்து விலகியதாகவும் தெரிவிக்கப்படுகிறது.
ஒரே நாடு ஒரே சட்டம்
முஸ்லிம் விவாக, விவாகரத்து சட்டம் மற்றும் காதி நீதிமன்ற முறைமை சவாலுக்குட்படுத்தப்பட்டுள்ள இச்சந்தர்ப்பத்தில் கடந்த வருடம் பாராளுமன்ற உறுப்பினர் ரிசாத் பதியுதீன் பாராளுமன்றில் நிகழ்த்திய உரை மீட்டு நோக்க வேண்டியதொன்றாகும். ‘ஒரே நாடு ஒரே சட்டம்’ அமுலாக்கலின் கீழ் சிறுபான்மை சமூகத்தினர் ஆளப்பட்டு வரும் முஸ்லிம் விவாக, விவாகரத்துச் சட்டம், தேசவழமைச் சட்டம், கண்டிய சட்டம் என்பனவற்றுக்கு விடைகொடுக்கப்பட்டு விடுமா? என்று சிறுபான்மை சமூகத்தினர் அச்சத்தில் ஆழ்ந்துள்ளனர்.
இந்த நாட்டில் எல்லோருக்கும் ஒரே சட்டம் என்ற கோஷம் நாட்டில் வெவ்வேறு பிரிவினருக்கு வெவ்வேறு சட்டம் இருப்பது போன்ற தோற்றப்பாட்.டைத் தோற்றுவித்துள்ளது. அது பிழையான சிந்தனையாகும். வெவ்வேறு சமூகங்களின் சமூக கலாசார மரபுகளோடு சம்பந்தப்பட்ட அந்த மக்கள் தொன்று தொட்டு பேணி வருகின்ற விடயங்கள் மன்னர் காலத்திலிருந்தே அங்கீகரிக்கப்பட்டுள்ளவை என்ற உண்மையை இந்த உயரிய சபை ஏற்றுக்கொள்ள வேண்டும். அவற்றினால் தான் அந்தந்த சமூகங்களுக்கு பாதிப்பில்லாத முறை மன்னர் காலத்திலிருந்தே நடைமுறையில் இருந்து வருகிறது.
இவ்வாறு காலாகாலமாக பழக்கத்திலிந்து வருகின்ற வழக்காறுகள், மரபுரிமைகள் டச்சுக் காரர் காலத்தில் தொகுக்கப்பட்டன. பின்னர் அவற்றுக்கு சட்ட வடிவம் கொடுக்கப்பட்டு இன்று அவை தனியார் சட்டங்களாக அடையாளம் காணப்படுகின்றன. ‘ஒரே நாடு ஒரே சட்டம்’ என்ற பிரமையின் கீழ் இவற்றில் கைவைக்க முற்படுவது சமூகங்களின் கலாசார மரபுகள் மீது கை வைப்பதற்கு ஒப்பானதாகும். அத்தோடு சர்வதேச சாசனங்கள் வரையறுத்துள்ள சமய, கலாசார உரிமைகளை மீறுவதாகும். ஒரு சமூகம் தனது மரபுகளை மாற்ற வேண்டுமா? இல்லையா? என்பதை அந்தந்த சமூகங்கள் தான் தீர்மானிக்க வேண்டும். சிறுபான்மை சமூகங்களின் தனித்துவத்தில் அத்துமீறி சட்டங்களை திணிக்க முயல்வது நாகரீகமான அல்லது ஜனநாயக செயற்பாடாக அமையாது என அவர் அன்று தெரிவித்தார். இதுவே முஸ்லிம் சமூகத்தின் நிலைப்பாடு எனவும் அவர் கூறினார்.
பாராளுமன்ற உறுப்பினர் இம்ரான் மஹ்ரூப்
‘நூற்றாண்டு காலமாக இலங்கையில் அமுலில் இருந்துவரும் காதிநீதிமன்றங்களை ஒழிக்க வேண்டும் என அமைச்சரவை தீர்மானம் நிறைவேற்றியுள்ளதாக ஊடகங்கள் வாயிலாக அறிந்து கொண்டேன். இந்நிலையில் இது குறித்து அரசுக்கு ஆதரவு வழங்கி வரும் முஸ்லிம் அரசியல் கட்சிகளின் நிலைப்பாடு என்ன? என்று திருகோணமலை மாவட்ட பாராளுமன்ற உறுப்பினர் இம்ரான் மஹ்ரூப் கேள்வியெழுப்பியுள்ளார்.
அவர் இது தொடர்பில் ஊடகங்களுக்கு மேலும் கருத்து தெரிவிக்கையில், ‘எமது நாடு சுதந்திரம் பெறுவதற்கு முன்பிருந்தே நாட்டில் முஸ்லிம் தனியார் சட்டம் அமுலிலிருந்து வருகிறது. முஸ்லிம்களுக்கு நூற்றாண்டு காலமாக சட்டரீதியாக வழங்கப்பட்டு வந்த உரிமையில் அமைச்சரவை கைவைத்துள்ளது. அமைச்சரவையின் தீர்மானம் அரசாங்கம் முஸ்லிம் சமூகத்துக்கு எதிராக எவ்வாறு செயற்படுகிறது என்பதை தெளிவாக எடுத்துக் காட்டுகிறது.
அமைச்சரவையின் இந்த தீர்மானம் குறித்து அரசுக்கு ஆதரவு வழங்கி வரும் ஸ்ரீ லங்கா முஸ்லிம் காங்கிரஸ், அகில இலங்கை மக்கள் காங்கிரஸ், தேசிய காங்கிரஸ் எனும் அரசியல் கட்சிகள் இதுவரை எவ்வித கருத்துகளையும் முன்வைக்கவில்லை. அதனால் இந்த மௌனம் சம்மதத்திற்கு அறிகுறியா என்ற சந்தேகம் எழுகின்றது. இந்தக் கட்சிகள் முஸ்லிம் மக்களின் உரிமைகளை வென்றெடுப்பதற்காக உருவாக்கப்பட்ட கட்சிகள் என்று கூறிக்கொண்டே மக்கள் மத்தியில் ஊடுருவின. இக்கட்சிகள் எல்லா தேர்தல் மேடைகளிலும் முஸ்லிம்களின் உரிமைகள் பற்றியே பேசின. காதி நீதிமன்றங்கள் முஸ்லிம் சமூகத்தின் வாழ்வியலுடன் சம்பந்தப்பட்டவை. இஸ்லாமிய சட்டங்களின் அடிப்படையில் தீர்ப்புகள் வழங்குபவைகள். இது முஸ்லிம்களின் உரிமைகளில் பிரதானமாகும். இந்த காதி நீதிமன்றங்களை ஒழிப்பதற்கே அமைச்சரவை தீர்மானம் நிறைவேற்றியுள்ளது. இலங்கை முஸ்லிம்களைப் பொறுத்தவரையில் இதனை விட உரிமை மீறல் எதுவும் இருக்க முடியாது. எனவே முஸ்லிம் அரசியல் கட்சிகள் தமது நிலைப்பட்டினை மக்களுக்குத் தெளிவுபடுத்த வேண்டும் என்று கூறியுள்ளார்.
காதி நீதிபதிகள் போரம்
‘காதி நீதிமன்ற முறைமை இல்லாமலாக்கப்பட வேண்டும் என அமைச்சரவை உப குழு மேற்கொண்டுள்ள தீர்மானத்தினை அறிந்து காதிநீதிபதிகள் போரம் கவலையும், அதிர்ச்சியும் அடைந்துள்ளதாக காதிநீதிபதிகள் போரத்தின் தலைவரும் இரத்தினபுரி நீதி நிர்வாகப் பிரிவின் காதி நீதிபதியுமான எம்.இப்ஹாம் யெஹ்யா குறிப்பிட்டுள்ளார்.
அவர் தொடர்ந்தும் இது தொடர்பில் கருத்து தெரிவிக்கையில், ‘ஒரு குறிப்பிட்ட சிறிய கொடுப்பனவுடனே காதி நீதிமன்றங்களை அரசு செயற்படுத்தி வருகிறது. காதி நீதிமன்றங்களுக்கு வளங்கள் அதிகரிக்கப்பட்டு மேம்படுத்தப்பட வேண்டும். அவர்களுக்கு உரிய பயிற்சிகள் தொடராக வழங்கப்பட வேண்டும். 2018 ஆம் ஆண்டின் பின்பு இன்றுவரை காதிநீதிபதிகளுக்கு பயிற்சிகள் வழங்கப்படவில்லை. சம்பந்தப்பட்ட அமைச்சு இது தொடர்பில் கவனம் செலுத்த வேண்டும்.
காதிநீதிமன்றங்களை ஒழிப்பதற்கு முன்பு அவர்களது பிரச்சினைகளைக் கேட்டறிய வேண்டும். பேச்சுவார்த்தைகள் மூலம் பல்வேறு நன்மைகளைப் பெறலாம். பிரச்சினைகளுக்குத் தீர்வு காணலாம். எமது பிரச்சினைகள் தொடர்பில் கலந்துரையாடுவதற்கு நேரம் ஒதுக்கித்தருமாறு நீதியமைச்சரிடம் 2020.11.04ஆம் திகதி கடிதம் மூலம் கோரிக்கை விடுத்தோம். ஆனால் நீதியமைச்சர் இதுவரை நேரம் ஒதுக்கித் தராமை கவலையளிக்கிறது. மீண்டும் 29.06.2021 ஆம் திகதி நீதியமைச்சருக்கு கடிதமொன்றினை அனுப்பி வைத்துள்ளோம்.
பெண்களை காதிநீதிபதிகளாக நியமிப்பதையோ, திருமண வயதெல்லை 18 ஆக அதிகரிப்பதையோ நாம் எதிர்க்கவில்லை. நூற்றாண்டு காலம் பழமைவாய்ந்த எமது சட்டத்தை சமூகத்துடன் கலந்துரையாடாது ஒவ்வொருவரின் விருப்பத்துக்கு அமைய சிதைத்து விடாதீர்கள் என்றே கோருகிறோம்.
காதிநீதிபதிகள் சிலரிடம் குறைகள் இருக்கலாம். அதற்காக காதிநீதிமன்றக் கட்டமைப்பையே அழிக்க முயல்வது சமூகத்துக்குச் செய்யும் துரோகமாகவே நாம் கருதுகிறோம். காதிநீதிபதிகளின் குறைகளைப் பற்றியே பேசிக் கொண்டிருப்பவர்கள் காதிநீதிபதிகளுக்கு வழங்கப்பட்டு வரும் கொடுப்பனவும் மற்றும் ஏனைய வசதிகள் குறித்து ஏன் சிந்திப்பதில்லை. சமூகத்தின் தலைவர்கள் இது தொடர்பில் குரல் எழுப்ப வேண்டும்.
நீண்ட காலமாக காதிகள் மேன்முறையீட்டுச் சபையில் செயலாளர் ஒருவர் தொடராக இயங்கவில்லை. இதனால் முஸ்லிம் சமூகம் பல்வேறு இன்னல்களை எதிர்கொண்டுள்ளது. இது தொடர்பில் சம்பந்தப்பட்ட அதிகாரிகள், அமைச்சு அக்கறை கொள்வதில்லை. காதி நீதிமன்ற முறைமையை இல்லாமற் செய்வதற்காகவே இந்த முன் ஏற்பாடுகள் என நாம் சந்தேகிக்கிறோம் என்றும் அவர் தெரிவித்துள்ளார்.
காதி நீதிமன்ற கட்டமைப்புக்கு எதிரான பிரசாரங்கள்
காதிநீதிவான் பாலியல் இலஞ்சம் கோரினார், எதிர்த்தரப்பினரிடம் இலஞ்சம் பெற்றுக்கொண்டு அவர்களுக்கு சாதகமான தீர்ப்பினை வழங்கினார், எனது பக்க நியாயங்கள் கவனத்தில் கொள்ளப்படவில்லை என்றெல்லாம் தாங்கள் பாதிக்கப்பட்டவர்கள் என்று கூறிக்கொள்ளும் சில பெண்கள் இனவாத ஊடகங்களுக்கு உறுதிப்படுத்தப்படாத அல்லது தவறான தகவல்களை வழங்கி வருவது கவலைக்குரியதாகும்.
காதிநீதிமன்றத்தில் வழக்குத் தாக்கல் செய்த ஒருவர் வழக்கு விசாரணையின்போது நீதிவான் பக்கசார்பாக நடந்து கொள்கிறார் என சந்தேகம் கொண்டால் குறிப்பிட்ட வழக்கினை விசாரிக்க விசேடகாதி நீதிவான் ஒருவரை நியமித்துக்கொள்ள முடியும்.அதற்காக நீதிச்சேவை ஆணைக்குழுவின் செயலாளருக்கு விண்ணப்பிக்க முடியும்.
அத்தோடு காதி நீதிமன்றில் நியாயமான தீர்ப்புக்கிடைக்கவில்லை என எவராவது கருதினால் அத்தீர்ப்புக்கு எதிராக காதிகள் மேன்முறையீட்டு சபைக்கு (Board of Quazis) மேன்முறையீடு செய்யலாம். எமது நாட்டில் அமுலிலுள்ள சட்டத்தில் இத்தகைய அனுகூலங்கள் இருக்கும்போது இத்தகைய நடவடிக்கைகள் எதனையும் மேற்கொள்ளாது எமது சமூகத்தில் சிலர் இனவாத ஊடகங்கள் முன்னிலையில் எமக்கு ‘ஒரே நாடு ஒரே சட்டம்’ தேவை காதிநீதிமன்ற முறைமை இல்லாமற் செய்யப்படவேண்டுமென உணர்ச்சிவசப்பட்டு தெரிவிப்பது மடமைத்தனமாகும்.
மேலும் தகுதியற்ற அரசியல் செல்வாக்குள்ளவர்களே காதி நீதிபதிகளாக நியமிக்கப்படுகிறார்கள் என்றெல்லாம் குற்றம் சுமத்துவது அடிப்படையற்றதாகும். காதி நீதிபதிகளை நீதிச்சேவை ஆணைக்குழு நியமிக்கிறது. விண்ணப்பங்கள் அரச வர்த்தமானி மூலம் கோரப்படுகிறது. விண்ணப்பதாரிகள் பட்டதாரிகளாக அல்லது ஓய்வு பெற்ற பதவி நிலை உத்தியோகத்தராக அல்லது மெளலவி பட்டம் பெற்றவராக இருக்க வேண்டும். நீதிச்சேவை ஆணைக்குழுவில் நீதிபதிகளால் நேர்முகப்பரீட்சை நடத்தப்பட்டே நியமனம் வழங்கப்படுகிறது. இந்நிலையில் தகுதியற்றவர்கள் நியமிக்கப்படுகிறார்கள் என்பது அடிப்படையற்றதாகும்.
மீள்பரிசீலனை செய்யப்பட வேண்டும்
அமைச்சரவை உபகுழு மேற்கொண்டுள்ள தீர்மானங்கள் மற்றும் ஆலோசனைக் குழுவின் ஆலோசனைகள் என்பனவற்றை நீதியமைச்சர் மீள்பரிசீலனை செய்யவேண்டுமென்பதே சமூகத்தின் அசையாத நிலைப்பாடாகும். திருத்தங்கள் மற்றும் தீர்மானங்கள் தொடர்பில் சமூகத்தின் ஆணைபெற்றுக் கொள்ளப்படவேண்டும். இந்த நிலைப்பாட்டிலே அகில இலங்கை ஜம்இய்யத்துல் உலமா சபையும் இருக்கிறது.
Vidivelli