ஞானசார தேரரை கைது செய்யாது எனது கணவரை கைது செய்துள்ளமை அநீதியானது
ரிஷாத் பதியுதீனின் மனைவி ஜனாதிபதிக்கு கடிதம்
(ஏ.ஆர்.பரீல்)
“உயிர்த்த ஞாயிறு குண்டுத்தாக்குதல் தொடர்பான ஜனாதிபதி விசாரணை ஆணைக்குழுவின் அறிக்கையில் ஞானசார தேரரும் அவரது செயற்பாடுகளும் குண்டுத்தாக்குதலுக்கு பிரதான காரணியாக அமைந்தது என குறிப்பிடப்பட்டுள்ளது. ஆனால் அவரோ அல்லது இதற்குப் பொறுப்புக்கூற வேண்டியவர்கள் என இனங் காணப்பட்டவர்களோ இதுவரை கைது செய்யப்படவோ, விசாரணைக்கு உட்படுத்தப்படவோ இல்லை. அதேவேளை எனது கணவர் ரிசாத் பதியுதீனுக்கும் உயிர்த்த ஞாயிறு தின தாக்குதல்களுக்கும் தொடர்பிருப்பதாக இதுவரையில் நிரூபிக்கப்படவில்லை. ஆனால் அவர் கைது செய்யப்பட்டுள்ளார். எனவே அவரை உடனடியாக விடுதலை செய்வதற்கு நடவடிக்கை எடுங்கள்” என ரிசாத் பதியுதீனின் மனைவி ஆயிஷா ரிசாத் ஜனாதிபதி கோத்தாபய ராஜபக்ஷவுக்கு அனுப்பி வைத்துள்ள கடிதத்தில் தெரிவித்துள்ளார்.
கடந்த 3 ஆம் திகதி ஆயிஷா ரிசாத் ஜனாதிபதிக்கு அனுப்பி வைத்துள்ள கடிதத்தில் மேலும் தெரிவிக்கப்பட்டுள்ளதாவது; “உயிர்த்த ஞாயிறு குண்டுத்தாக்குதல்கள் நடாத்த தீவிரவாதி சஹ்ரான் ஹாஷிம் பயங்கரவாத குழுவொன்றினை வழி நடத்தினார். இரண்டு வருடங்களுக்கு முன்பு தற்கொலை குண்டுத்தாக்குதல் நடத்தினார். இலங்கையில் தாக்குதல்கள் மேற்கொள்ள 10 காரணங்களை இனங்கண்டு அவர் வீடியோ பதிவொன்றினை வெளியிட்டிருந்தார். அவற்றில் 8 காரணங்கள் கட்டாயமாக பேசப்படவேண்டும் என நாம் நம்புகிறோம்.
• பகிரங்கமாக அல்லாஹ்வை அவமதித்தமை, வசை பாடியமை.
• குளியாப்பிட்டியில் இடம்பெற்ற சம்பவமொன்றில் பன்றியின் உருவப்படத்தில் அல்லாஹ் என எழுதப்பட்டிருந்தமை.
• அல்லாஹ் மீண்டும் பிறப்பாரென ஞானசார தேரர் கருத்து வெளியிட்டமை.
• நபிகள் நாயகம் (ஸல்) அவர்களை பகிரங்கமாக அவமதித்தமை, அவதூறு செய்தமை.
• குர்ஆனை கிழித்தமையும், எரித்தமையும்.
• பள்ளிவாசல்களை அழித்தமை.
• முஸ்லிம்களின் வீடுகளை அழித்தமை மற்றும் காணிகளை பலவந்தமாக கைப்பற்றியமை.
• முஸ்லிம் பெண் ஒருவர் உளவுப் பிரிவு அதிகாரிகளால் வல்லுறவுக்குட்படுத்தப்ப ட்டமை.
எனது கணவர் ரிசாத் பதியுதீன் சட்டத்துக்கு முரணாக கைது செய்யப்பட்டமையினால் நானும் எனது பிள்ளைகளும் மிகுந்த கவலைக்குள்ளாகியிருக்கிறோம். ரமழான் மாதத்தில் கடந்த ஏப்ரல் 24 ஆம் திகதி அதிகாலை 3.00 மணியளவில் குற்ற விசாரணைப் பிரிவினர் எமது வீட்டுக்குள் நுழைந்து எனது கணவரைக் கைது செய்தனர். கைது செய்கின்றமைக்கான காரணங்கள் எதையும் அப்போது அவர்கள் கூறவில்லை. பின்னர் எனது கணவர் கைத்தொழில் மற்றும் வர்த்தக அமைச்சராக இருந்தபோது அவருக்கும் அமைச்சின் மேலதிக செயலாளர் பாலசுப்ரமணியம் என்பவருக்கும் இடையில் இடம்பெற்ற தொலைபேசி உரையாடல்கள் பற்றிய விசாரணைக்காக கைது செய்யப்பட்டிருக்கிறார் என்று அறிந்தோம். அத்தோடு பாலசுப்ரமணியத்துக்கு இன்சாப் தொலைபேசி அழைப்புகளை மேற்கொண்டதாகவும் கூறப்பட்டது.
1979 ஆம் ஆண்டு ஏப்ரல் 27 ஆம் திகதி வெளியிடப்பட்ட 33/24 ஆம் இலக்க வர்த்தமானி அறிவித்தலை உங்கள் கவனத்திற்கு கொண்டுவர விரும்புகிறேன். இந்த அறிவித்தலின்படி உலோக கழிவுகளை ஏற்றுமதி செய்வதற்கான அனுமதியை வழங்கும் அதிகாரம் கைத்தொழில் மற்றும் வர்த்தக அமைச்சின் செயலாளருக்குள்ளது. அச்சந்தர்ப்பத்தில் இந்த அதிகாரம் அமைச்சின் செயலாளரினால் மேலதிக செயலாளருக்-கு ஒப்படைக்கப்பட்டிருந்தது. 2019.03.27 ஆம் திகதி ஜனாதிபதி செயலகத்தில் கூட்டமொன்று ஏற்பாடு செய்யப்பட்டிருந்தது. கூட்டத்தில் அமைச்சின் செயலாளர், மேலதிக செயலாளர் மற்றும் பல்வேறு ஏற்றுமதியாளர்கள் கலந்து கொண்டிருந்தனர். ஆனால் கூட்டம் தொடர்பில் எனது கணவருக்கு எவ்வித தகவலும் வழங்கப்படவில்லை. அக்கூட்டத்துக்கு எனது கணவர் சென்றிருக்கவுமில்லை. என்றாலும் அக்கூட்டத்தில் உலோகக்கழிவுகளை ஏற்றுமதி செய்வதற்கு அனுமதி வழங்கத் தீர்மானிக்கப்பட்டது.
இதனடிப்படையிலே கொலோசஸ் பிரைவட் லிமிடெட் நிறுவனத்துக்கும் மேலதிகமாக மேலும் இரு நிறுவனங்களுக்கும் அ-னுமதி வழங்கப்பட்டது. என்றாலும் கொலோசஸ் நிறுவன உரிமையாளரான இன்சாப் அஹமட் தற்கொலை குண்டுதாரியாக மாறுவார் என்ற சந்தேகம் அப்போது எவருக்கும் இருக்கவில்லை. ஆகவே தமது அதிகாரங்களின் அடிப்படையில் அமைச்சின் செயலாளர் ரஞ்சித் அசோக மற்றும் மேலதிக செயலாளர் பாலசுப்ரமணியம் ஆகியோரே ஏற்றுமதிக்கான அனுமதியை வழங்கினார்கள்.
இதேவேளை கொண்டச்சி கைத்தொழில்பேட்டை மற்றும் வெலிஓயா கைத்தொழில்பேட்டை ஆகியவற்றை விரிவுபடுத்துவதற்கான திட்டம் தொடர்பில் கலந்துரையாடுவதற்காக 2019.03.27 மற்றும் 28 ஆம் திகதிகளில் பாலசுப்ரமணியத்தினால் எனது கணவருக்கு மேற்கொள்ளப்பட்ட தொலைபேசி அழைப்புகள் தற்போது விசாரணைகளுக்கு உட்படுத்தப்பட்டுள்ளது. அதன்போது கொலோசஸ் நிறுவனம் தொடர்பிலோ அல்லது ஏற்றுமதி தொடர்பிலோ எதுவும் கலந்துரையாடப்படவில்லை என்று என்னால் உறுதியாகக் கூற முடியும்.
உயிர்த்த ஞாயிறு தாக்குதல்களை எனது கணவர் கடுமையாக கண்டித்திருந்தார். என்றாலும் இதன்மீது தொடர்புடையவரென அவர் மீது விரல் நீட்டப்பட்டது. அவர் அமைச்சர் பதவியினை இராஜினாமா செய்ய வேண்டுமென சில குழுக்கள் வலியுறுத்தின. அதற்கு மதிப்பளித்து எனது கணவர் பதவி விலகி விசாரணைக்கு ஒத்துழைத்தார். அவர் மீதான குற்றச்சாட்டுக்கள் தொடர்பில் விசாரணைகளை முன்னெடுக்க விசேட பிரிவொன்று நிறுவப்பட்டது. விசாரணைகளின் முடிவில் எனது கணவர் நிரபராதி என அறிக்கை வெளியிடப்பட்டது.
எனது கணவர் கடந்த 20 வருடங்களாக பாராளுமன்ற உறுப்பினராக இருந்து அர்ப்பணிப்புடன் செயற்பட்டு வருகின்றார். அவருக்கும் உயிர்த்த ஞாயிறு தாக்குதல்களுக்கும் தொடர்பிருப்பதாக இதுவரை நிரூபிக்கப்படவில்லை. இந்நிலையில் நீதிமன்ற உத்தரவின்றி அவர் கைது செய்யப்பட்டிருப்பது நியாயமற்றதாகும் என்பதை நீங்கள் ஏற்றுக்கொள்வீர்கள் என்பதில் சந்தேகமில்லை. அத்தோடு அவர் விசாரணைகளுக்கு முழுமையான ஒத்துழைப்பை வழங்கி வந்த நிலையில் பயங்கவரவாத தடைச்சட்டத்தின் கீழ் கைது செய்யப்பட்டமையை ஏற்றுக்கொள்ளமுடியாது.
எனவே இவையனைத்தையும் கருத்திற்கொண்டு எனது கணவரையும், அவரது சகோதரரையும் விடுதலை செய்யுமாறு சட்டமா அதிபருக்கு அதிபருக்கு உத்தரவு பிறப்பிக்குமாறு வேண்டிக்கொள்கிறேன் எனத் தெரிவிக்கப்பட்டுள்ளது.- Vidivelli