கருமலையூற்று பள்ளிவாசல் காணியை உடன் விடுவிக்குக
கடந்த கால வாக்குறுதிகள் நிறைவேற்றப்படவில்லை என்றும் மக்கள் சுட்டிக்காட்டு
திருகோணமலை மாவட்ட கருமலையூற்று பள்ளிவாசல் அமைந்துள்ள காணியை உடனடியாக அரசாங்கம் விடுவிக்க வேண்டும் என பிரதேச மக்கள் கோரிக்கை விடுக்கின்றனர்.
அரசாங்கத்தினால் வடக்கு கிழக்கில் இராணுவ முகாம்கள் அமைந்திருந்த காணிகள் விடுவிக்கப்பட்டுள்ள நிலையில் கருமலையூற்று பள்ளிவாசல் காணப்படுகின்ற காணி இன்னும் விடுவிக்கப்படவில்லை எனவும் மக்கள் சுட்டிக்காட்டுகின்றனர்.
இக் காணியை விடுவிக்க நடவடிக்கை எடுக்கப்படும் என தேர்தல் காலங்களில் பல்வேறு கட்சிகளைச் சேர்ந்த அரசியல்வாதிகளும் உறுதியளித்த போதிலும் அந்த வாக்குறுதிகள் நிறைவேற்றப்படவில்லை.
அண்மைக் காலமாக வடக்கு கிழக்கில் அதிகளவிலான பிரதேசங்களில் மக்கள் பாவனைக்காக பல காணிகள் விடுவிக்கப்பட்டிருந்தபோதிலும் முஸ்லிம்கள் வணக்க வழிபாடுகளை மேற்கொள்வதற்கு ஒதுக்கப்பட்ட கருமலையூற்று பள்ளிவாசல் இன்னும் இராணுவத்தின் கட்டுப்பாட்டிலேயே காணப்படுவதாகவும் மக்கள் விசனம் தெரிவிக்கின்றனர்.
ஆரம்ப காலத்தில் கடற்படைக்குச் சொந்தமான காணி எனக் கூறப்பட்ட போதிலும் தற்போது துறைமுக அதிகார சபைக்குச் சொந்தமான காணி எனக் கூறி பள்ளிவாசல் விடயத்தில் இழுத்தடித்து வருவதாகவும் குற்றம் சுமத்துகின்றனர்.
எனவே கருமலையூற்று பள்ளி விவகாரம் தொடர்பில் நல்லாட்சி அரசும், திருகோணமலை மாவட்ட அரசியல்வாதிகளும் கூடிய கவனம் செலுத்தி வணக்கவழிபாடுகளை மேற்கொள்வதற்கேற்ற வகையில் பள்ளிவாசல் காணியை விடுவிப்பதற்கு உரிய நடவடிக்கைகளை எடுக்க வேண்டும் எனவும் பிரதேச மக்கள் கோரிக்கை விடுக்கின்றனர்.
-Vidivelli