றாபிததுன் நளீமிய்யீன் எனப்படும் ஜாமிஆ நளீமிய்யாவின் பழைய மாணவர் அமைப்பின் ஒன்று கூடலும் ஒன்பதாவது பொதுக் கூட்டமும் கடந்த ஞாயிறு, திங்கள் (2,3.07.2023) ஆகிய இரு தினங்களில் பேருவளை ஜாமிஆ நளீமிய்யா வளாகத்தில் இடம் பெற்றது.
இந்நிகழ்வில் கலந்து கொள்வதற்காக நாட்டின் பல பாகங்களில் இருந்தும் ஐக்கிய இராச்சியம், கட்டார், அவுஸ்திரேலியா உள்ளிட்ட வெளிநாடுகளில் இருந்தும் ஆயிரத்துக்கும் அதிகமான பழைய மாணவர்கள் வருகை தந்திருந்தனர்.
கொழும்பு ஸாஹிரா கல்லூரியின் பொருளியல் பிரிவின் சிரேஷ்ட ஆசிரியரும் றாபிதாவின் தலைவருமான சட்டத்தரணி ரி.ஷாகீர் தலைமையில் இடம்பெற்ற அங்குரார்ப்பண நிகழ்வில் பிரதம அதிதியாக நளீமிய்யாவின் பரிபாலன சபைத் தலைவரும் மர்ஹூம் நளீம் ஹாஜியார் அவர்களின் புதல்வருமான யாகூத் நளீம் அவர்களும் கெளரவ அதிதியாக நிறுவனத்தின் முதல்வர் அஷ்ஷைக் அகார் முஹம்மத் அவர்களும் கலந்து கொண்டு உரைகளை நிகழ்த்தினர்.
பிரதம பேச்சாளராக கலந்து கொண்ட தென்கிழக்கு பல்கலைக்கழகத்தின் சிரேஷ்ட விரிவுரையாளரும் பேராசிரியருமான அஷ்ஷைக் மஸாஹிர் (நளீமி) நளீமிய்யா எதிர்காலத்தில் எத்தகைய இலக்குகளை அடைந்து வளர்ச்சி காண வேண்டும் என்பதை விளக்கினார்.
கலாபீடத்தின் முதல்வர் அஷ்ஷைக் அகார் முஹம்மத் ‘ஜாமிஆ நளீமிய்யாவின் தற்போதைய நிலை’ எனும் தலைப்பிலும், மிஷ்காத் நிறுவனத்தின் பணிப்பாளர் அஷ்ஷைக் உஸ்தாத் மன்சூர் ‘நளீமீக்களது முன்னுரிமைகள்’ எனும் தலைப்பிலும், நளீமிய்யா இஸ்லாமிய கற்கைகள் பீடத்தின் பீடாதிபதி அஷ்ஷைக் பளீல் ‘நளீமீக்களது அடைவுகளும் சாதனைகளும்’ எனும் தலைப்பிலும் உரைகளை நிகழ்த்தினர்.
றாபிதாவின் உயர்மட்ட ஆலோசனைக் குழுவின் தலைவராக உள்ள நளீமிய்யாவின் கல்வித்துறைப் பணிப்பாளர் அஷ்ஷைக் ஸீ.ஐயூப் அலி உட்பட அதன் ஏனைய அங்கத்தவர்களான அஷ்ஷைக் பளீல், முன்னை நாள் தேர்தல்கள் ஆணையாளர் அஷ்ஷைக் முஹம்மத், இறைவரித் திணைக்களத்தின் பிரதி ஆணையாளர் நாயகம் அஷ்ஷைக் மிப்லி, சவூதி அரேபியாவுக்கான முன்னை நாள் கொன்ஸியூலர் ஜெனரல் அஷ்ஷைக் இனாமுல்லாஹ், மிஷ்காத் நிறுவனத்தின் தலைவர் அஷ்ஷைக் அப்துர் ராஸிக் ஆகியோர் நிகழ்ச்சிகளின் போது இடம்பெற்ற தனித்தனியான அமர்வுகளுக்கு தலைமை வகித்ததுடன் புதிய நிறைவேற்றுக் குழுவை தெரிவு செய்யும் நிகழ்வையும் நெறிப்படுத்தினர்.
முதலீட்டு ஊக்குவிப்பு அமைச்சின் செயலாளர் அல்ஹாபிழ் அஷ்ஷைக் நயீமுதீன் உள்ளிட்ட மேலும் ஐந்து பேரின் பங்கேற்புடன் ‘நளீமீக்களது வகிபாகம்’ எனும் தலைப்பிலான குழுக்கலந்துரையாடல் ஒன்றும் இடம்பெற்றது.
கொழும்பு முஸ்லிம் மகளிர் கல்லூரியின் க.பொ.த.(உ/த) பிரிவின் பொறுப்பாளரும் பொருளியல் துறையில் முதுமாணிப் பட்டம்பெற்றவருமான அஷ்ஷைக் ழாபிர் மதனி அடுத்த மூன்று வருடங்களுக்கான றாபிதா மத்திய செயற்குழுவின் தலைவராகவும் மேலும் 21 பேர் உறுப்பினர்களாகவும் பொதுச் சபையால் தெரிவு செய்யப்பட்டனர்.
இலங்கையின் 13 பிராந்தியங்களில் றாபிதாவின் கிளைகள் இருப்பதால் அவற்றுக்கான பதவிதாங்குநர்களும் கிளைகளது கலந்துரையாடல்களின் போது நியமிக்கப்பட்டதுடன் கடந்த காலத்தில் சிறப்பாக செயற்பட்ட பிராந்தியக் குழுக்களுக்கான விருதுகளும் வழங்கப்பட்டன.
ஜாமிஆவில் நீண்ட காலமாக விரிவுரையாளர்களாக கடமை புரிவோருக்கு இங்கிலாந்தில் வதியும் நளீமிய்யாவின் பழைய மாணவர்களது அனுசரணையுடன் விருதுகளும் பண முடிச்சுகளும் வழங்கப்பட்டன.
மாதம்பை இஸ்லாஹிய்யா அரபுக் கல்லூரி விரிவுரையாளர் உஸ்தாத் ரம்ஸீ பஜ்ரு தொழுகையின் பின்னர் நிகழ்த்திய ஆன்மீக உரை தாக்கம் மிக்கதாக அமைந்தது. நிகழ்ச்சி நிரலின் படி விளையாட்டுக்கள்,கலை நிகழ்ச்சிகள் என்பனவும் இடம்பெற்றன.
ஜாமிஆவில் கல்வி கற்ற முதல் ஐந்து தொகுதிகளையும் சேர்ந்த மாணவர்களது மனப்பதிவுகளையும் ஜாமிஆவின் ஆரம்பகால வரலாற்றையும் உள்ளடக்கிய ‘எமது ஜாமிஆ நளீமிய்யா முதல் தொகுதி மாணவர்களின் அனுபவப் பகிர்வு’ எனும் நூல் வெளியிட்டு வைக்கப்பட்டது. இந்நூலை ஜாமிஆவின் பழைய மாணவரும் ஓய்வு பெற்ற உதவிக் கல்விப் பணிப்பாளருமான புத்தளம் ஸன்ஹீர் எழுதியிருந்தமை குறிப்பிடத்தக்கது.
பொதுக்கூட்ட நிகழ்வுகளை றாபிதாவின் தலைவர்,பொதுச் செயலாளர் அஷ்ஷைக் இல்ஹாம் முபாரிஸ், பொருளாளர் அஷ்ஷைக் எம்.ஜே.எம். ரம்ஸான் உள்ளிட்ட மத்திய செயற்குழுவின் ஏனைய அங்கத்தவர்களும் பேருவளை வலயத்தைச் சேர்ந்தவர்களும் ஜாமிஆ நளீமிய்யா நிர்வாகத்துடன் இணைந்து ஏற்பாடு செய்திருந்தமை குறிப்பிடத்தக்கது.- Vidivelli