மாவனெல்லை இரட்டை கொலை: பர்ஹான் உள்ளிட்டோர் சிக்கினர் வெல்லம்பிட்டி படுகொலை தொடர்பிலும் சந்தேக நபர்கள் கைது
(எம்.எப்.எம்.பஸீர்)
மாவனெல்லையை சேர்ந்த இரு இளைஞர்களின் படு கொலை தொடர்பில், ரம்புக்கனை பகுதியின் பிரபல ஐஸ் போதைப் பொருள் வர்த்தகர் என கூறப்படும் ஹுரீமலுவ பர்ஹான் என அறியப்படும் மொஹம்மட் பர்ஹான் உள்ளிட்ட அனைத்து சந்தேக நபர்களும் கைது செய்யப்பட்டு விளக்கமறியலில் வைக்கப்பட்டுள்ளனர்.
புத்தளம் பகுதியில் வீடொன்றில் மறைந்திருந்த போது, கேகாலை வலய குற்றத் தடுப்புப் பிரிவின் சிறப்புக் குழுவினர் அங்கு சென்று பர்ஹானை கைது செய்த நிலையில், அவருடன் இருந்த கொலையுடன் தொடர்புபட்ட மற்றொரு சந்தேக நபரான ஹலீம் என்பவரையும் பொலிசார் கைது செய்தனர்.
கடந்த 19 ஆம் திகதி இக்கைது நடவடிக்கை இடம்பெற்றதுடன், அவர்களுக்கு தங்குமிடம் மற்றும் உணவளித்த ஒருவரையும் பொலிஸார் கைது செய்தனர்.
அதன்படி இந்த இரட்டை கொலையுடன் தொடர்புபட்ட அனைவரையும் பொலிசார் கைது செய்துள்ளனர்.
ஏற்கனவே மாவனெல்லை மற்றும் கெலி ஓய பகுதிகளில் வைத்து இரு சந்தேக நபர்கள் கைது செய்யப்பட்ட நிலையில், அவர்களில் ஒருவரின் வீட்டிலிருந்து கொல்லப்பட்ட இளைஞர் ஒருவருக்கு சொந்தமான மோட்டார் சைக்கிளும் மீட்கப்பட்டது.
இதனிடையே கடந்த 15 ஆம் திகதி கொலன்னாவை – வெல்லம்பிட்டி பகுதியில், 62 வயது மூதாட்டி ஒருவர், அவரது வீட்டில் வேலைக்கு அமர்த்தப்பட்டிருந்த பெண் மற்றும் அவரது கள்ளக் காதலனால் கொலை செய்யப்பட்ட சம்பவத்திலும் சந்தேக நபர்கள் கைது செய்யப்பட்டுள்ளனர்.
மேல் மாகாண தெற்கு குற்றத் தடுப்புப் பிரிவின் பணிப்பாளர் சிரேஷ்ட பொலிஸ் அத்தியட்சர் லலித் அபேசேகரவின் மேற்பார்வையில் நடந்த விசாரணைகளில் அவ்விருவரும் கைது செய்யப்பட்டுள்ளனர். 28 வயதான பெண்ணும் 24 வயதான அவரது மச்சான் முறையிலான ஆணுமே இவ்வாறு பொலிசாரால் கைது செய்யப்பட்டு, நீதிமன்றில் ஆஜர் செய்யப்பட்டு விளக்கமறியலில் வைக்கப்பட்டுள்ளனர்.- Vidivelli