- முஸ்லிம் தரப்பின் எதிர்ப்பால் பிக்குகள் அடங்கிய குழுவினர் பின்வாங்கினர்
- தனி நபருக்கு சொந்தமான காணி என்றும் சுட்டிக்காட்டு
- அம்பாறை மாவட்ட முஸ்லிம் எம்.பி.க்களை தலையிடுமாறும் கோரிக்கை
- அரசாங்க அதிபர், பிரதேச செயலாளர் நேரில் சென்று பார்வையிட்டனர்
(எஸ்.என்.எம்.சுஹைல்)
பொலிஸ் மற்றும் இராணுவ வீரர்களின் பாதுகாப்புடன் அட்டாளைச் சேனை பிரதேச செயலகத்திற்குட்பட்ட பாலமுனை முள்ளிமலை பகுதியில் பௌத்த பிக்குகள் தலைமையிலான குழுவொன்று நேற்று அதிகாலை சென்று அங்கு பௌத்த விகாரை ஒன்றை நிர்மாணிக்க முயற்சித்துள்ளனர்.
எனினும் அந்த இடத்துக்கு முஸ்லிம் தரப்பினர்கள் சென்று இது தனி நபர் ஒருவருக்கு சொந்தமான காணி என்றும் இன முறுகலை ஏற்படுத்தும் வகையில் அத்துமீறி செயற்பட வேண்டாம் எனவும் சுட்டிக்காட்டியதுடன் தமது எதிர்ப்பை வெளியிட்டு தம் பக்க நியாயத்தையும் முன் வைத்ததனால் குறித்த இடத்தில் விகாரை அமைக்கும் முயற்சியை அவர்கள் கை விட்டுள்ளனர்.
இச் சம்பவம் குறித்து மேலும் தெரியவருவதாவது, அண்மைக்காலமாக இப்பகுதியில் சிலை வைக்கும் முயற்சியில் சில சிங்கள இளைஞர்கள் முனைப்பு காட்டி வந்ததாகவும் முஸ்லிம்களின் எதிர்ப்பினால் இயலாமல் போனதாகவும் தெரிவிக்கப்படுகிறது.
இந்நிலையிலேயே, நேற்று புதன் கிழமை அதிகாலை 5 மணியளவில் பொலிஸ் பாதுகாப்புடன் பௌத்த பிக்குகளும் சில சிங்கள இளைஞர்களும் இராணுவத்தினரும் அந்த இடத்திற்கு வருகை தந்துள்ளனர். குறித்த சந்தர்ப்பத்தில் அம்பாறை மாவட்ட ஸ்ரீலங்கா பொதுஜன பெரமுன பாராளுமன்ற உறுப்பினர் ஒருவரும் வருகை தந்ததாக தெரியவருகிறது. அத்தோடு, குறித்த இடத்தில் காணி பூஜை செய்வதற்கான ஏற்பாடுகளுடன் வந்துள்ளனர். லொறி மூலம் மணல் கொண்டு வரப்பட்டுள்ளதுடன் சீமெந்தும் எடுத்து வரப்பட்டுள்ளது. இதுதவிர குறித்த இடத்தில் அடிக்கல் நடுவதற்கான குழிகளும் வெட்டப்பட்டுள்ளது.
இந்நிலையில் விடயத்தை பொதுமக்கள் பிரதேச அரசியல்வாதிகளுக்கு அறிவித்துள்ளனர். இதனையடுத்து, முன்னாள் கிழக்கு மாகாண சபை அமைச்சர் எம்.எஸ். உதுமாலெப்பை, கிழக்கு மாகாண சபை முன்னாள் உறுப்பினர் ஏ.எல். தவம், அட்டாளைச்சேனை பிரதேச சபையின் முன்னாள் தவிசாளர் எம்.ஏ. அன்ஸில், அட்டாளைச்சேனை பிரதேச சபை தவிசாளர் ஏ. அமானுல்லா உள்ளிட்ட பலரும் அங்கு சென்றுள்ளனர்.
பிரதேச மக்கள் பலரும் வெளியிட்ட எதிர்ப்பை அடுத்து அக்கரைப்பற்று பொலிஸார் மற்றும் பாதுகாப்பு படையினரின் தலையீடுகளுடன் அரசாங்க அதிபரூடாக பிரச்சினையை தீர்க்க முடிவு செய்யப்பட்டதுடன் அங்கிருந்து எல்லோரும் வெளியேற்றப்பட்டு பாதுகாப்பு படையினர் பாதுகாப்பு கடமையில் ஈடுபட்டு வருகின்றனர்.
இதேவேளை அத்துமீறி நடவடிக்கை மேற்கொண்ட தரப்புடன் கிழக்குமாகாண முன்னாள் அமைச்சர் எம்.எஸ்.உதுமாலெவ்வை சுமுகமான பேச்சுவார்த்தையில் ஈடுபட்டதுடன், சம்பவ இடத்திற்கு அம்பாறை மாவட்ட அரசாங்க அதிபரை வரவழைத்து நிலமையை விளங்கப்படுத்தியிருந்தார். விடயங்களை மிக அவதானத்துடன் கேட்டறிந்துகொண்ட அரசாங்க அதிபர் உடனடியாக தீர்வினை வழங்குவதாக உறுதியளித்தார்.
குறித்த இடத்திலிருந்த பிக்குகள் தரப்பிடம், “இது முஸ்லிம்களுக்கு சொந்தமான காணி, காணி உறுதிப்பத்திரத்திரமும் உள்ளது. இங்கு அத்துமீறி செயற்படுவதானது இன முறுகலை தோற்றுவிக்கும். பிரதேச மக்கள் சகவாழ்வுடன் இருக்கின்றனர். இங்கு குழப்பத்தை ஏற்படுத்த எத்தனிக்க வேண்டாம்” என்று கிழக்கு மாகாண சபை முன்னாள் அமைச்சர் உதுமா லெப்பை தெரிவித்தார்.
இதேவேளை அம்பாறை மாவட்டத்தை பிரதிநிதித்துவப்படுத்தும் முஸ்லிம் பாராளுமன்ற உறுப்பினர்கள் அனைவரும் இந்த விடயம் தொடர்பில் அரசாங்கத்தின் கவனத்திற்குக் கொண்டு சென்று இந்த ஆக்கிரமிப்பை தடுத்து நிறுத்த நடவடிக்கை எடுக்க வேண்டும் என நாம் ஸ்தலத்திலிருந்தே தொலைபேசி மூலம் வேண்டுகோள் விடுத்துள்ளோம் என்றும் மேலும் குறிப்பிட்டார்.-Vidivelli