(கலேவெல, குருநாகல் நிருபர்கள்)
விளையாடிக்கொண்டிருந்த இரு சிறுமிகள் மீது வீட்டின் இரும்பு வாயிற் கதவு விழுந்ததில் ஒருவர் உயிரிழந்ததுடன் மற்றுமொரு சிறுமி படுகாயமடைந்து கவலைக்கிடமான நிலையில் குருணாகல் போதனா வைத்தியசாலையில் அனுமதிக்கப்பட்டுள்ளார்.
தொடன்கஸ்லந்த – தெலம்புகல்ல கிராமத்தில் வெள்ளிக் கிழமை (24) மாலை வேளையில் இவ் அனர்த்தம் இடம் பெற்றுள்ளது.
ஹிரிப்பிடிய, தித்தவெல்கால பிரதேசத்தைச் சேர்ந்த மொஹமட் இர்ஷாத் மரியம் (03 வயது) என்ற சிறுமியே தெலம்புகல்லவிலுள்ள தமது உறவினர் வீட்டிற்கு வந்திருந்த வேளையில் இவ்வாறு உயிரிழந்துள்ளார்.
வீட்டின் இரும்பு நுழைவாயில் கதவில் சிறுமிகள் இருவரும் ஏறி இறங்கியும் அதனைத் தள்ளி இழுத்தும் விளையாடிக் கொண்டிருந்த வேளையில் இவ் அனர்த்தம் ஏற்பட்டிருக்கக் கூடும் என சிறுமிகளின் உறவினர்கள் பொலிஸ் விசாரணைகளின் போது தெரிவித்தனர்.
நுழைவாயில் பொருத்தப் பட்டிருந்த இரும்பு கதவு பிரதான பீலியிலிருந்து அகன்று சிறுமிகள் இருவர் மீதும் விழுந்திருப்பதாகவும், இதனால் தலையில் ஏற்பட்ட பலத்த காயங்களினால் வைத்திய சாலையில் அனுமதிக்கப்பட்ட வேளையில் மொஹமட் இர்ஷாத் மரியம் (03 வயது) என்பவர் உயிரிழந்து காணப் பட்டதாகவும் தலை மற்றும் பாதங்களில் ஏற்பட்ட கடும் காயங்களுடன் மிகவும் ஆபத்தான நிலையில் காணப்பட்ட எம்.என்.ஸெயித் (04 வயது) என்ற மற்றைய சிறுமி குருணாகல் போதனா வைத்திய சாலையில் அனுமதிக்கப் பட்டிருப்பதாகவும் பொலிஸார் தெரிவித்தனர்.
குருணாகல் மாநகர திடீர் மரண விசாரணை அதிகாரி மொஹமட் பர்ஸான் மரண விசாரணைகளை மேற் கொண்ட பின்னர் ஜனாஸா உறவினர்களிடம் ஒப்படைக்கப் பட்டதுடன் தித்தவெல்கால மைய வாடியில் நல்லடக்கம் செய்யப்பட்டது.
சம்பவம் தொடர்பான விசாரணைகளைத் தொடர்ந்து முன்னெடுத்து வருவதாக மதுராகொட பொலிஸார் தெரிவித்தனர்.- Vidivelli