(எம்.எப்.எம்.பஸீர்)
நவரசம் என்ற கவிதைத் தொகுப்பு புத்தகத்தை எழுதியமைக்காக கைது செய்யப்பட்டுள்ள அஹ்னாப் ஜஸீம் விவகாரம் தொடர்பிலான வழக்கில், அவருக்கு எதிராக சாட்சிகள் இருப்பின் அவற்றின் சுருக்கத்தை மன்றில் முன்னிலைப்படுத்தி, அவரை நீதிமன்றில் ஆஜர் செய்த சட்ட பிரிவு தொடர்பில் விளக்கமளிக்குமாறு கொழும்பு நீதிவான் நீதிமன்றம் கடந்த திங்கட்கிழமையன்று சி.ரி.ஐ.டி. எனும் பயங்கரவாத தடுப்பு மற்றும் புலனாய்வுப் பிரிவுக்கு உத்தரவிட்டது.
கொழும்பு மேலதிக நீதிவான் சந்திம லியனகே முன்னிலையில் குறித்த வழக்கு திங்களன்று, அஹ்னாப் ஜஸீமின் சட்டத்தரணிகள் ஊடாக நகர்த்தல் பத்திரம் ஒன்றினை முன் வைத்து விசாரணைக்கு எடுத்துக்கொள்ள செய்யப்பட்டது. இதன்போதே எதிர்வரும் 29 ஆம் திகதி மன்றில் ஆஜராகி விளக்கமளிக்க பயங்கரவாத தடுப்பு மற்றும் புலனாய்வுப் பிரிவுக்கு இந்த உத்தரவு பிறப்பிக்கப்பட்டது.
இந்த விவகாரம் குறித்த வழக்கு விசாரணைகள், விசாரணைக்கு வந்த போது, அஹ்னாப் ஜஸீம் சார்பில் ஜனாதிபதி சட்டத்தரணி ஏ.ஏ.எம். இலியாஸ், சட்டத்தரணி சஞ்சய வில்சன் ஜயசேகர மற்றும் சட்டத்தரணி ஸ்வஸ்திகா அருலிங்கம் ஆகியோர் மன்றில் ஆஜராகினர். பயங்கரவாத தடுப்பு மற்றும் விசாரணைப் பிரிவு சார்பில் எவரும் மன்றில் ஆஜராகவில்லை.
இதன்போது மன்றில் சட்டத்தரணி சஞ்சய வில்சன் ஜயசேகர வாதங்களை முன் வைத்தார்.
‘கடந்த 11 ஆம் திகதி வெள்ளியன்று, அஹ்னாப் ஜெஸீம், தங்காலை சி.ரி.ஐ.டி. தடுப்பு நிலையத்திலிருந்து கொழும்புக்கு அழைத்து வரப்பட்டு, மறுநாள் சனிக்கிழமை கொழும்பு 8 ஆம் இலக்க நீதிவான் நீதிமன்றில், 1979 ஆம் ஆண்டின் 48 ஆம் இலக்க பயங்கரவாத தடை சட்டத்தின் 7 (2) ஆம் அத்தியாயம் பிரகாரம் முன்னிலைப்படுத்தப்பட்டுள்ளார். இதனையடுத்து அவர் எதிர்வரும் 22 ஆம் திகதிவரை விளக்கமறியலில் வைக்கப்பட்டுள்ளார்.
இதன்போது அவருக்கு சட்ட உதவிகளைப் பெற்றுக்கொள்ள எந்த வாய்ப்பும் வழங்கப்பட்டிருக்கவில்லை.
அத்துடன் அஹ்னாப் ஜஸீமை நீதிமன்றில் ஆஜர் செய்வதாக பயங்கரவாத தடுப்பு மற்றும் புலனாய்வுப் பிரிவு அவரது சட்டத்தரணிக்கோ அல்லது குடும்பத்தாருக்கோ கூட அறிவிக்கவில்லை. இதனால் அவர் சார்பில் மன்றில் முன் வைக்க வேண்டிய முக்கியமான விடயங்களை அன்றைய தினம் முன் வைக்க முடியாமல் போயுள்ளது.
அஹ்னாப் ஜஸீமின் குடும்பத்தார் கடந்த 12 ஆம் திகதி சனிக் கிழமை அவருடன் பேசுவதற்காக பயங்கரவாத தடுப்பு மற்றும் புலனாய்வுப் பிரிவினருக்கு தொலைபேசியில் அழைத்துள்ள போதும், அப்போது கூட ஒவ்வொரு நேரத்தை கூறி பிறகு அழைக்குமாறு தெரிவித்துள்ளதுடன், நீதிமன்றில் ஆஜர் செய்யப்படுவதை அவர்கள் மறைத்துள்ளனர். 14 ஆம் திகதியே அஹ்னாப் விளக்கமறியலில் வைக்கப்பட்டுள்ளதை அறிய முடிந்துள்ளது.
ஏற்கனவே அஹ்னாப் ஜஸீமின் கைதும் தடுப்புக் காவலும் சட்ட விரோதமானது எனக் கூறி உயர் நீதிமன்றில் எஸ்.சி.எப்.ஆர். 114/ 2021 எனும் இலக்கத்தின் கீழ் அடிப்படை உரிமை மீறல் மனு தாக்கல் செய்யப்பட்டுள்ளது.
விளக்கமறியலில் உள்ள அஹ்னாபை பார்வையிட்டு அவருடன் சட்டத்தரணிகள் சந்தித்து கலந்துரையாட அவகாசம் ஏற்படுத்தித் தரல் வேண்டும்.’ என சட்டத்தரணி சஞ்சய வில்சன் ஜயசேகர, ஜனாதிபதி சட்டத்தரணி ஏ.ஏ.எம். இலியாஸ் மற்றும் சட்டத்தரணி ஸ்வஸ்திகா அருலிங்கம் ஆகியோருடன் ஆஜராகி மன்றினை கோரினார்.
கோரிக்கைகளுக்கு அனுமதியளித்த நீதிவான் சந்திம லியனகே, இது குறித்து பயங்கரவாத தடுப்பு மற்றும் புலனாய்வுப் பிரிவினரின் தரப்பு வாதங்களையும் கேட்க வேண்டும் என தெரிவித்து எதிர்வரும் 29 ஆம் திகதி மன்றில் ஆஜராகி விளக்கமளிக்குமாறு பயங்கரவாத தடுப்பு மற்றும் புலனாய்வுப் பிரிவினருக்கு உத்தரவிட்டார்.- Vidivelli