எம்.எப்.எம்.பஸீர்
பிரபல றக்பி வீரர் வஸீம் தாஜுதீன் படு கொலை செய்யப்பட்டு 9 வருடங்கள் பூர்த்தியாகின்றன. கடந்த 2012 மே 17 ஆம் திகதி வஸீம் தாஜுதீன் படுகொலை செய்யப்பட்ட நிலையில் ஜனாஸா அவரது காருக்குள் இருந்து நாரஹேன்பிட்டி சாலிகா மைதானத்துக்கு அருகில் இருந்து மீட்கப்பட்டிருந்தது. எனினும் இன்று வரை குற்றவாளிகள் சட்டத்தின் முன் நிறுத்தப்படவில்லை. கொலையாளிகள் அடையாளம் காணப்படவோ கைது செய்யப்படவோ இல்லை.
இந் நிலையில், கடந்த 17 ஆம் திகதி ஞாயிறன்று, வஸீம் தாஜுதீனின் சகோதரி ஆய்ஷா தாஜுதீன், தனது முகப் புத்தகத்தில் வஸீமின் படுகொலைக்கு இதுவரை நியாயம் கிடைக்காமையை சுட்டிக்காட்டி, ‘ நீதி என்பதுஒரு மாயை ‘ என வர்ணித்திருந்தார்.
“புயலைப் போல, பல ஆண்டுகள் கடந்துவிட்டன, விடயங்கள் அமைதியாகிவிட்டன, நீதி என்பது ஒரு மாயை. ஆனால் காயங்கள் இன்னும் புதிதாகவே எரிகிறது. அதனை ஒரு போதும் வெல்ல முடியாது. 9 ஆண்டுகளுக்கு முன்னர் அந்த சமயம் நடந்தது என்ன என்பது இன்னும் எமக்கு கேள்விக் குறியே. மறக்க முடியாமல் உமது இறுதி நாள் தருணங்களில் நாம் வாழ்ந்து கொண்டிருக்கின்றோம் வஸீம். நாம் உன்னை இழந்துவிட்டோம்.” என ஆய்ஷா தாஜுதீன் பதிவிட்டுள்ளார்.
கடந்த 2015 இல் ஆட்சி மாற்றத்தின்போது வஸீம் தாஜுதீன் கொலையாளிகளை பிடிப்போம் என்ற வாக்குறுதிக்கும் முக்கிய பங்கு இருந்தது. எனினும் அது நடக்கவே இல்லை. பல தடங்கல்களைக் கடந்து அந்த விசாரணைகளை முன்னெடுத்து, சந்தேக நபர்களை நெருங்கிக்கொண்டிருந்த நிலையில், அதனை விசாரித்த சி.ஐ.டி. விசாரணை அதிகாரி, அவ்விசாரணைகளை நெறிப்படுத்திய உதவி பொலிஸ் அத்தியட்சர் ( தற்போது பொலிஸ் அத்தியட்சர்) உள்ளிட்ட குழு, சி.ஐ.டி.யை விட்டே மாற்றப்பட்டு விட்டனர். இந்த 8 வருடத்தில் சாட்சியங்களை மறைத்தமை, அழித்தமை தொடர்பில் மட்டும் மூவர் கைது செய்யப்பட்டனர்.
மேல் மாகாணத்தில் கொலை நடந்த அன்று சிரேஷ்ட பிரதிப் பொலிஸ் மா அதிபராக இருந்த அனுர சேனநாயக்க, அப்போது கொலை நடந்த பொலிஸ் பிரிவின் குற்றவியல் பொறுப்பதிகாரியாக இருந்த பொலிஸ் பரிசோதகர் சுமித் பெரேரா ஆகியோருக்கு எதிராக தகவல்களை மறைத்தமை தொடர்பில் குற்றம் சுமத்தப்பட்டது. அக்குற்றச்சாட்டுக்கள் தொடர்பில் அவர்கள் இருவரும் கைது செய்யப்பட்டனர். வஸீம் தாஜுதீன் விவகாரத்தில், கொலையின் பின்னர் மேலதிக ஆய்வுக்காக எடுக்கப்பட்ட வஸீமின் உடற் பாகங்கள் சில காணாமல் போனமை தொடர்பில் சி.ஐ.டி. முன்னெடுத்த விசாரணைக்கு அமைவாக முன்னாள் கொழும்பு சட்ட வைத்திய அதிகாரி ஆனந்த சமரசேகர கைது செய்யப்பட்டிருந்தார்.
இந் நிலையில் அவர்களில் முன்னாள் சிரேஷ்ட பிரதிப் பொலிஸ் மா அதிபர் அனுர சேனநாயக்க, முன்னாள் கொழும்பு சட்ட வைத்திய அதிகாரி ஆனந்த சமரசேகர ஆகியோருக்கு எதிராக சட்ட மா அதிபர் கொழும்பு மேல் நீதிமன்றில் தண்டனை சட்டக் கோவையின் 198 ஆவது அத்தியாயத்தின் கீழ் தண்டனைக் குரிய குற்றம் ஒன்றினை செய்துள்ளதாக கூறி வழக்கு தொடரப்பட்டது. எவ்வாறாயினும், வழக்கு விசாரணை ஆரம்பத்தில் ஆனந்த சமரசேகரவும், பின்னர் அண்மையில் அனுர சேனநாயக்கவும் உயிரிழந்தனர். எனினும் கொலையாளிகள் இதுவரை கண்டறியப்படவில்லை. வஸீமின் குடும்பத்திற்கு நீதி நிலைநாட்டப்படவும் இல்லை. கொலையாளிகள் மாத்திரம் சுதந்திரமாக நடமாடிக் கொண்டிருக்கின்றனர்.- Vidivelli