ஒக்டோபர் மாதம் பிறந்து விட்டால் சர்வதேச தினம், உலக தினம் என்பனவற்றிற்குப் பஞ்சம் இருக்காது. விஷேட தினம், மகிழ்ச்சியான தினம் எனத் தினந்தோறும் மாதம் முடியும் வரை விழாக்களும், கொண்டாட்டங்களும் களை கட்டும். சிறுவர் தினம், முதியோர் தினம், ஆசிரியர் தினம், தபால் தினம் எனத் தொடங்கி உலக நகர தினத்தில் முடிவுறும்.
சிறப்பான தினங்களை நினைவு கூர்ந்து மகிழ்ச்சியில் மக்களும் உலகமும் இருக்கும் அவ்வேளை, இலங்கையின் வடக்கு முஸ்லிம்கள் அந்தக் கறை படிந்த ஒக்டோபர் மாதக் கரி நாளை நினைவு கூர்கின்றனர். பரம்பரை பரம்பரையாகத் தமது பூர்வீக மண்ணில் வாழ்ந்து வந்த முஸ்லிம்களை ஆயுதமேந்திய புலிகள், ஒக்டோபர் 22 முதல் 30 வரையான காலப்பகுதியில் வெளியேற்றிய துயரமிகு நாட்களே அந்த நாட்கள். குழந்தைகள் முதல் வயோதிபர் வரை ஆண்கள், பெண்கள் என அத்தனை பேரையும் வெறுங்கையுடன் வெளியேற்றி 28 வருடங்கள் பூர்த்தியாகும் நாளே ஒக்டோபர் 30ஆம் நாள்.
என்ன செய்வது, ஏது செய்வது, எங்கே செல்வது என்றறியாது திக்குமுக்காடிய நாட்கள் அந்த ஒன்பது நாட்கள். பூமியை அழிப்பதற்காக எக்காளம் ஊதுமாறு இறைவன் கட்டளை பிறப்பித்தால், பூமியும் அதில் உள்ளவைகளும் நடுக்கத்தால் எவ்வாறு அல்லோல கல்லோலப்படுமோ அதற்கோர் ஒத்திகை