ஜனாதிபதித் தேர்தல் என்பது ஒரு நாட்டின் முக்கியமான தேர்தலாகும். இந்தப் பிரதான தேர்தலில் பிரதான அபேட்சகர்கள் மாத்திரம் போட்டியிடுவதே நன்மை பயக்கும். பொது மக்களின் நம்பிக்கையைத் தன்னகத்தே ஈர்த்துள்ள, அவர்களின் விருப்பத்துக்குரிய சிலர் மாத்திரமே ஜனாதிபதித் தேர்தலில் போட்டியிடவேண்டும். அபிவிருத்தியடைந்துள்ள நாடுகளில் இந்நிலைமையினை எம்மால் நோக்கமுடிகிறது.
எதிர்வரும் 16 ஆம் திகதி எமது நாட்டில் நடைபெறவுள்ள ஜனாதிபதித் தேர்தல், வேட்பாளர்களின் எண்ணிக்கையில் வரலாறு படைத்துள்ளது. இம்முறை ஜனாதிபதித் தேர்தலில் 35 வேட்பாளர்கள் போட்டியிடுகிறார்கள். தேர்தல் வாக்குச் சீட்டின் நீளம் 26 அங்குலமாக நீண்டுள்ளது.
இந்த 35 வேட்பாளர்களில் 13 வேட்பாளர்கள் இரு பிரதான அபேட்சகர்களுக்கு ஆதரவு வழங்குவதற்காகக் களமிறங்கியுள்ளார்கள். அவர்கள் உண்மையான வேட்பாளர்கள் அல்ல என கடந்த வாரம் தேர்தல் ஆணையாளர் மஹிந்த தேசப்பிரிய கருத்து வெளியிட்டிருந்தார்.
பிரதான இரண்டு வேட்பாளர்களுக்கு ஆதரவாக அவர்களது அடியாளர்களாகக் களமிறங்கியுள்ள 13 அபேட்சகர்களையும் தேர்தல் ஆணைக்குழு இனங்கண்டுள்ளதாகவும் அவர் தெரிவித்துள்ளார்.
அத்தோடு இந்த 13 வேட்பாளர்களில் 7 பேர் ஒரு வேட்பாளருக்கு ஆதரவு வழங்கி வருவதாகவும் ஏனைய ஆறு பேரும் மற்றைய வேட்பாளருக்கு ஆதரவு வழங்கி வருவதாகவும் தேர்தல் ஆணைக்குழுவின் உறுப்பினர்கள் இதனை தங்களது கண்காணிப்பு நடவடிக்கைளின்போது அடையாளம் கண்டுள்ளார்கள். அவர்கள் சார்ந்துள்ள கட்சிகளின் செயலாளர்கள் பிரதான ஜனாதிபதி வேட்பாளர்கள் இருவரது தேர்தல் பிரசார மேடைகளில் உரையாற்றியிருக்கிறார்கள். இச்செயற்பாடுகள் குறிப்பிட்ட 13 ஜனாதிபதி வேட்பாளர்களும் பிரதான வேட்பாளர்கள் இருவரதும் ஆதரவாளர்கள் அவர்களது வெற்றிக்காக உழைப்பவர்கள் என்பது நிரூபிக்கப்பட்டுள்ளது.
இவ்வாறான போலி வேட்பாளர்களால் தேர்தல் ஆணைக்குழுவும் வாக்காளர்களும் பாதிக்கப்பட்டுள்ளார்கள் என்றே கூறவேண்டும். இவ்வாறான வேட்பாளர்களினாலே தேர்தல் ஆணைக்குழுவின் செலவினங்கள் அதிகரித்துள்ளன. இந்த அதிகரித்த செலவுகள் தேர்தல் ஆணைக்குழுவின் அதிகாரிகளினாலோ அல்லது வேட்பாளர்களினாலோ செலவழிக்கப்படுவதில்லை. நாட்டு மக்களின் பணமே இதற்குச் செலவழிக்கப்படுகிறது. இவ்வாறான வீணான அதிகரித்த செலவுகள் காரணமாகவே எமது நாட்டின் பொருளாதாரமும் ஸ்திரமற்ற நிலைக்குள்ளாகியுள்ளது.
தேர்தலின் பின்பு இவ்வாறான வேட்பாளர்களைக் தேடிக்கண்டுபிடிக்க முடியாமற் கூட போகலாம். அவர்களினால் நாட்டுக்கு ஏற்பட்ட நஷ்டங்களை மீட்டிக்கொள்வதற்கான சட்ட ஏற்பாடுகள் கூட எமது நாட்டில் இல்லை.
ஜனநாயகம் என்பது எந்தவொரு மோசடிக்காரருக்கும் ஜனாதிபதி வேட்பாளராகும் சந்தர்ப்பம் வழங்குவதாக இருக்கக்கூடாது. இன்னொருவரின் நன்மைக்காக வேட்பாளராகக் களமிறங்குவது நாட்டு மக்களின் ஜனநாயகத்தை சவாலுக்குட்படுத்தும் முயற்சியாகும்.
இவ்வாறான போலி வேட்பாளர்களின் உள்வாங்கலைத் தவிர்ப்பதற்காக எதிர்காலத்தில் ஜனாதிபதித் தேர்தலில் போட்டியிடுவதற்குச் செலுத்தப்படும் கட்டுப்பணத் தொகையை அதிகரிக்க முடியும். அத்தோடு இவ்வாறான நடவடிக்கையில் இறங்கும் அரசியல் கட்சிகள் பதிவு செய்யப்படுவது நிராகரிக்கப்படும் என தேர்தல் ஆணையாளர் கூறியுள்ளார்.
எதிர்வரும் 16 ஆம் திகதி நடைபெறவுள்ள ஜனாதிபதித் தேர்தலையடுத்து அடுத்த ஜனாதிபதி தேர்தலுக்கு 5 வருட கால இடைவெளி இருக்கிறது. ஜனாதிபதித் தேர்தலுக்கு பின்பு பொதுத்தேர்தல் நடாத்தப்படும். புதிய அரசாங்கம் பதவியில் அமரும். எனவே ஜனாதிபதித் தேர்தலில் பிரதான அபேட்சகர்களுக்கு மாத்திரம் போட்டியிடும் வகையில் மட்டுப்படுத்தப்படுவதற்கான சட்டம் இந்தக் கால எல்லையில் இயற்றிக் கொள்ளப்பட வேண்டும்.
இந்தப் பொறுப்பினை தேர்தல் ஆணைக்குழுவின் மீது சுமத்திவிட்டு அரசாங்கமும் எதிர்க்கட்சியும் மெளனமாக இருப்பதன் மூலம் பிரச்சினைகளுக்குத் தீர்வுகாண முடியாது. இது விடயத்தில் பொது மக்களுக்கும் பொறுப்பிருக்கிறது. அதிகரிக்கும் ஜனாதிபதி வேட்பாளர்களின் எண்ணிக்கையினால் தங்களுக்கு ஏற்படும் அசௌகரியங்கள், மேலதிக செலவினங்கள், வாக்களிக்கும் போது எதிர்நோக்கும் பிரச்சினைகள் தொடர்பில் பொதுமக்கள் சட்ட ரீதியான தீர்வுகள் பெற்றுக் கொள்வதற்கு ஒன்றிணையவேண்டும். இதற்கான சட்ட தீர்வுகளை அவர்கள் வேண்டி நிற்கலாம்.-Vidivelli