முஸ்லிம் பெண்கள் முகத்திரையை நீக்கி ஆள் அடையாளத்தை உறுதிப்படுத்த வேண்டும்
தேர்தல் ஆணைக்குழு திட்டவட்டமாக தெரிவிப்பு
எதிர்வரும் ஜனாதிபதித் தேர்தலில் வாக்களிப்பதற்காக வாக்களிப்பு நிலையங்களுக்கு முகத்திரை (புர்கா, நிகாப்) அணிந்து செல்லும் முஸ்லிம் பெண்கள் வாக்களிப்பு நிலையங்களுக்குள் தமது ஆளடையாளத்தை நிரூபிப்பதற்காக முகத்திரையை நீக்க வேண்டும் என தேர்தல் ஆணைக்குழுவின் உறுப்பினர் பேராசிரியர் ரத்னஜீவன் ஹூல் தெரிவித்தார். தேர்தலில் வாக்களிக்கச்செல்லும் முஸ்லிம் பெண்களின் ஆடை தொடர்பில் வினவியபோதே அவர் ‘விடிவெள்ளி’க்கு இவ்வாறு தெரிவித்தார்.
அவர் தொடர்ந்தும் விளக்கமளிக்கையில், ‘வாக்களிப்பதற்காகச் செல்லும் முஸ்லிம் பெண்கள் முகத்திரை (புர்கா–நிகாப்) அணிவதற்கு எந்தத் தடையுமில்லை. அவர்கள் முகத்திரை அணிந்து செல்லலாம். அதற்கு எவரும் தடைவிதிக்க முடியாது. ஆனால் வாக்களிப்பு நிலையங்களுக்குள் சென்று வாக்களிப்பதற்கான நடைமுறைகளுக்கு உள்ளாகும் போது வாக்களிப்பு நிலைய அதிகாரிகள் ஆளடையாளத்தை நிரூபிக்கும்படி கோருவார்கள். அப்போது முகத்திரையை அகற்றியே தமது அடையாளத்தை நிரூபிக்க வேண்டியேற்படும். சில சந்தர்ப்பங்களில் தலையை மறைத்திருப்பதையும் அகற்றும்படி கோரப்படலாம்’ என்றார்.
ஏப்ரல் 21 ஆம் திகதி மேற்கொள்ளப்பட்ட தற்கொலைக் குண்டுத் தாக்குதலையடுத்து அவசரகாலச் சட்டம் அமுல்படுத்தப்பட்டபோது முஸ்லிம் பெண்கள் அணியும் முகத்திரைக்கும் தடைவிதிக்கப்பட்டது. பின்பு அவசர காலச்சட்டம் நீக்கப்பட்டதை யடுத்து முகத்திரைக்கான தடையும் நீங்கியது. என்றாலும் நாட்டின் பல பகுதிகளில் பெண்கள் அணியும் முகத்திரைக்கு சவால்கள் விடுக்கப்பட்டுவருகின்றன. பொது போக்குவரத்து பஸ் வண்டிகளில் இந்தத் தடை தொடர்ந்து அமுல்படுத்தப்பட்டு வருகிறது. பொது இடங்களில் இனவாதிகளால் பிரச்சினைகள் உருவாக்கப்படு கின்றன. இப்பிரச்சினையைத் தீர்ப்பதற்கு அகில இலங்கை ஜம்இய்யத்துல் உலமா சபை அவசரமாக நடவடிக்கை எடுக்க வேண்டுமென கண்டியைத் தளமாகக் கொண்டுள்ள தேசிய ஐக்கியத்துக்கும் அபிவிருத்திக்குமான புத்திஜீவிகள் ஒன்றியம் கோரிக்கை விடுத்துள்ளமை குறிப்பிடத்தக்கது. தற்போதைய சூழ்நிலையைக் கருத்திற்கொண்டு முஸ்லிம் பெண்கள் பொது இடங்களில் முகத்தினை மறைப்பதை தவிர்ப்பதற்கான அறிவுறுத்தல்களை உலமா சபை பொ-து மக்களுக்கு வழங்க வேண்டுமெனவும் புத்திஜீவிகள் ஒன்றியம் கோரியுள்ளமையும் குறிப்பிடத்தக்கதாகும்.தேர்தலில் வாக்களிப்பதற்குச் செல்லும் முஸ்லிம் பெண்கள் முகத்திரை அணிந்து செல்வதற்குத் தடையில்லை. ஆனால் வாக்களிப்பு நிலையங்களுக்குள் முகத்திரையை அகற்றி தமது ஆளடையாளத்தை உறுதிசெய்ய வேண்டும்.-Vidivelli
- ஏ.ஆர்.ஏ.பரீல்