கட்டுப்பொத்த கடை தீக்கிரை : நஷ்டஈடு கோருவதில் தொடர்ந்தும் சிரமங்கள்
இரசாயன பகுப்பாய்வு , பொலிஸ் அறிக்கை தாமதம் காரணம்
கடந்த மாதம் சியம்பலாகஸ்கொட்டுவ, கட்டுப்பொத்த நகரில் தீக்கிரையாக்கப்பட்ட முஸ்லிம் வர்த்தகர் ஒருவருக்குச் சொந்தமான இரண்டு கடைகளினது இரசாயன பகுப்பாய்வு அறிக்கை மற்றும் பொலிஸ் அறிக்கை இன்னும் தயாராகாமையினால் நஷ்டஈட்டினைக் கோருவதில் தான் சிரமங்களை எதிர்கொண்டுள்ளதாக கடைகளின் உரிமையாளர் ஏ.எச்.எம்.சிபாய் தெரிவித்தார். கட்டுபொத்த நகரில் முஸ்லிம்களுக்கென்று குறிப்பிட்ட இரு கடைகளே இருந்தன. இந்தக் கடைகளின் உரிமையாரே கட்டிடத்துக்கும் உரிமையாளராவார். இந்தக் கடைகளுக்கு கடந்த ஜூன் மாதம் 10 ஆம் திகதி இரவு தீ வைக்கப்பட்டதாகவும் இதனால் தனக்கு 75 இலட்சம் ரூபா நஷ்டம் ஏற்பட்டுள்ளதாகவும் உரிமையாளர் தெரிவிக்கிறார்.
அண்மையில் இடம்பெற்ற முஸ்லிம்களுக்கு எதிரான வன்செயல்களின்போது சியம்பலாகஸ்கொட்டுவ கட்டுப்பொத்த பகுதிகளில் முஸ்லிம்களின் சொத்துகள் அழிக்கப்பட்டன. அதற்குப் பின்பே கடந்த ஜூன் மாதம் 10 ஆம் திகதி இந்தக் கடைகளுக்குத் தீ வைக்கப்பட்டது. இந்த இரு கடைகளிலும் வர்த்தகம் செய்வதற்கு அப்பகுதி மக்கள் ஏற்கனவே எதிர்ப்புத் தெரிவித்திருந்தனர். இக்கடைகளில் ஒன்று பென்சி சாமான்கள் அடங்கியதாகவும் அடுத்த கடை கொப்பரா போன்ற கொள்முதல் கடையாகவும் இயங்கிவந்தன. தனது தீக்கிரையாக்கப்பட்ட கடைகளுக்கான அறிக்கையைக் கோரியபோது இரசாயன பகுப்பாய்வு அறிக்கை இன்னும் கிடைக்கவில்லை எனத் தெரிவிக்கப்பட்டதாக கடைகளின் உரிமையாளர் ஏ.எச்.எம். சிபாய் தெரிவிக்கிறார்.
vidivelli